AMUDARYo TUMANIDA “OSOYIShTA SARHAD — BARChAMIZNIKI” ShIORI OSTIDA TARGʻIBOT-TAShVIQOT TADBIRI OʻTKAZILDI

Amudaryo tumani Madaniyat boʻlimida Davlat xavfsizlik xizmati Chegara qoʻshinlari tomonidan “Osoyishta sarhad — barchamizniki” shiori ostida targʻibot-tashviqot tadbiri tashkil etildi. Unda DXX Chegara qoʻshinlari masʼullari, tuman hokimi oʻrinbosari Jasur Yaxshimov, Oʻzbekiston mahallalari uyushmasi tuman boʻlimi boshligʻi Alisher Yoʻldashev, tegishli tashkilot va idoralar vakillari, mahalla faollari hamda yoshlar ishtirok etdi. Tadbirda mamlakatimiz davlat chegaralarining daxlsizligini taʼminlash, sarhadlarimizni ishonchli himoya qilish, yurtimiz tinchligi va osoyishtaligini asrash borasida amalga oshirilayotgan ishlar haqida maʼlumot berildi. Shuningdek, davlat chegarasi xavfsizligini taʼminlashda vakolatli organlar va jamoatchilik hamkorligining ahamiyati taʼkidlandi. Tadbir davomida “Davlat chegarasi toʻgʻrisida”gi Qonunning mazmun-mohiyati, asosiy qoidalari, davlat chegarasini qoʻriqlash va himoya qilish sohasidagi vakolatlar hamda fuqarolarning ishtiroki masalalari yoritildi. Jumladan, Qonunning 9-moddasida mahalliy davlat hokimiyati organlarining, 28-moddasida fuqarolarning, 30-moddasida esa Davlat xavfsizlik xizmati Chegara qoʻshinlarining davlat chegarasini qoʻriqlash va himoya qilish sohasidagi vakolat hamda majburiyatlari belgilanganiga eʼtibor qaratildi. Taʼkidlanganidek, chegara xavfsizligini taʼminlashda hushyorlik, qonunlarga rioya qilish va fuqarolik masʼuliyati muhim oʻrin tutadi. Ayniqsa, chegaraoldi hududlarida yashovchi aholining huquqiy savodxonligini oshirish, shubhali holatlarga befarq boʻlmaslik va vakolatli organlar bilan hamkorlik qilish dolzarb ahamiyatga ega ekani taʼkidlandi. Qayd etilishicha, mamlakatimizdagi qariyb 9 mingta mahallaning 552 tasi chegaraoldi hududlarida joylashgan. Ushbu mahallalarda istiqomat qiluvchi aholining davlat chegarasi toʻgʻrisidagi qonunchilikdan xabardorligini oshirish, mahalla faollari va tegishli tashkilotlar hamkorligini kuchaytirish muhim vazifalardan hisoblanadi. Tadbirda tumandagi mahallalarda aholi turmush sharoitini yaxshilash, infratuzilmani rivojlantirish va zamonaviy sharoitlar yaratish borasida amalga oshirilayotgan ishlar haqida ham soʻz yuritildi. Xususan, “Obod mahalla” dasturi doirasida 2026-yilda tumanda 88 kilometr ichki yoʻlga asfalt qoplamasi yotqizilgani, 31 kilometr masofada toza ichimlik suvi tarmoqlari tortilgani, shuningdek, zamonaviy sharoitlarga ega uchta umumtaʼlim maktabida qurilish-rekonstruktsiya ishlari amalga oshirilgani qayd etildi. Mazkur ishlar mahallalar infratuzilmasini yaxshilash, aholiga qulay sharoitlar yaratish va yoshlarning sifatli taʼlim olishi uchun imkoniyatlarni kengaytirishga xizmat qilmoqda. Uchrashuvda yoshlarni Vatanga muhabbat, milliy qadriyatlarga hurmat va vatanparvarlik ruhida tarbiyalash, ularda tinchlik va osoyishtalikni qadrlash tuygʻularini mustahkamlash masalalariga ham alohida eʼtibor qaratildi. Taʼkidlanganidek, davlat chegaralarining daxlsizligini taʼminlash nafaqat tegishli idoralar, balki har bir fuqaroning ham masʼuliyatidir. Shu bois bunday targʻibot-tashviqot tadbirlari aholining huquqiy savodxonligini oshirish, jamoatchilik hamkorligini mustahkamlash hamda fuqarolarda yurt tinchligi va xavfsizligiga daxldorlik hissini kuchaytirishda muhim ahamiyat kasb etadi. Charos Arslonova, tuman hokimligining Axborot xizmati rahbari.