Gʻalla oʻrimiga bagʻishlangan seminar boʻlib oʻtdi

Amudaryo tumanining Bogʻ mahallasidagi yetakchi xoʻjaliklardan biri – “Rahimboyev Azizbek” fermer xoʻjaligi dalasida joriy yilgi gʻalla oʻrim-yigʻimi mavsumining boshlanishiga bagʻishlangan amaliy seminar tashkil etildi. Tadbirda Qoraqalpogʻiston Respublikasi Joʻqorgʻi Kengesining agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anuarbek Jumanazarov, Sanoat, qurilish, transport va aloqa masalalari qoʻmitasi raisi Islam Sdikov, tuman hokimi Sobir Xoʻjametov, hokim oʻrinbosarlari, qishloq xoʻjaligi sohasi mutaxassislari, nuroniy otaxonlar, fermerlar, jamoatchilik vakillari hamda OAV vakillari ishtirok etdi.

Tadbir avvalida “Yusuf Eshon bobo” jomʼe masjidi imom-xatibi Abdurahmon Matsapayev Qurʼon tilovat qilib, ushbu mavsumning barakali va betalafot oʻtishini soʻrab duo qildi.

Seminarda tuman hokimi Sobir Xoʻjametov soʻzga chiqib, gʻalla mavsumi har bir fermer, har bir dehqon uchun muhim sinov davri boʻlishi bilan birga, yurtimiz oziq-ovqat xavfsizligi uchun gʻoyat dolzarb ahamiyat kasb etishini taʼkidladi.

Maʼlumot oʻrnida aytish joizki, tumanda 2025-yil hosili uchun 270 ta fermer xoʻjaligi va qishloq xoʻjaligi korxonalari tomonidan 4800 gektar maydonga gʻalla ekilib, ushbu maydonlarda yetishtirilgan hosilning 11 ming 130 tonnasini kontraktatsiya shartnomasi boʻyicha qabul maskanlariga topshirish rejalashtirilgan.

Tumanda gʻalla hosilini 4-iyundan 20-iyungacha nest-nobud qilmasdan oʻrib-yigʻib olish maqsadida 23 ta otryadlar tashkil qilinib, ushbu otryadlarga jami 69 nafar malakali mutaxassislar biriktirilgan. Shundan, 23 nafari otryad rahbarlari, 23 nafar Ichki ishlar boʻlimi, yana 23 nafari esa Favqulodda vaziyatlar boʻlimi xodimlaridir. 4800 gektar maydondagi gʻallani oʻrib-yigʻib olish ishlariga jami 131 dona texnikalar jalb qilingan.

Seminar davomida soʻzga chiqqanlar hosilni optimal muddatlarda yigʻib olish, texnika va mexanizatorlarning tayyorgarligi, xavfsizlik choralariga qatʼiy rioya qilish, shuningdek, gʻallani daladan omborga sifatli yetkazib berish boʻyicha zarur tavsiyalar berdilar, oʻzaro fikr-mulohazalar almashildi.

Shundan soʻng, dala chetidagi zamonaviy kombaynlar harakatga tushirildi. Ilk oʻrim jarayoni koʻrgazmali tarzda tashkil etilib, mehmonlar fermer xoʻjaligidagi texnik salohiyat, ishchi kuchining boshqarilishi va agrotexnik tadbirlarning samarali amalga oshirilishiga bevosita guvoh boʻlishdi.

Yigʻilish ishtirokchilari ushbu tadbirni nafaqat tajriba almashish, balki mehnatga, xalqimizning rizq-roʻziga boʻlgan hurmat, ehtirom ifodasi sifatida ham qabul qilishdi. Bunday maʼnaviy-maʼrifiy ruhda oʻtgan seminarlar yurtimiz qishloq xoʻjaligida mehnatkash dehqonlar salohiyatini yuzaga chiqarish, ularni ragʻbatlantirish va milliy qadriyatlarimizni mustahkamlashda muhim oʻrin tutadi.

Charos Arslonova, tuman hokimligining Axborot xizmati rahbari.