Ғалла ўримига бағишланган семинар бўлиб ўтди

Амударё туманининг Боғ маҳалласидаги етакчи хўжаликлардан бири – “Раҳимбоев Азизбек” фермер хўжалиги даласида жорий йилги ғалла ўрим-йиғими мавсумининг бошланишига бағишланган амалий семинар ташкил этилди. Тадбирда Қорақалпоғистон Республикаси Жўқорғи Кенгесининг аграр, сув хўжалиги, табиатни муҳофаза қилиш ва экология масалалари қўмитаси раиси Ануарбек Жуманазаров, Саноат, қурилиш, транспорт ва алоқа масалалари қўмитаси раиси Ислам Сдиков, туман ҳокими Собир Хўжаметов, ҳоким ўринбосарлари, қишлоқ хўжалиги соҳаси мутахассислари, нуроний отахонлар, фермерлар, жамоатчилик вакиллари ҳамда ОАВ вакиллари иштирок этди.

Тадбир аввалида “Юсуф Эшон бобо” жомъе масжиди имом-хатиби Абдураҳмон Матсапаев Қуръон тиловат қилиб, ушбу мавсумнинг баракали ва беталафот ўтишини сўраб дуо қилди.

Семинарда туман ҳокими Собир Хўжаметов сўзга чиқиб, ғалла мавсуми ҳар бир фермер, ҳар бир деҳқон учун муҳим синов даври бўлиши билан бирга, юртимиз озиқ-овқат хавфсизлиги учун ғоят долзарб аҳамият касб этишини таъкидлади.

Маълумот ўрнида айтиш жоизки, туманда 2025 йил ҳосили учун 270 та фермер хўжалиги ва қишлоқ хўжалиги корхоналари томонидан 4800 гектар майдонга ғалла экилиб, ушбу майдонларда етиштирилган ҳосилнинг 11 минг 130 тоннасини контрактация шартномаси бўйича қабул масканларига топшириш режалаштирилган.

Туманда ғалла ҳосилини 4 июндан 20 июнгача нест-нобуд қилмасдан ўриб-йиғиб олиш мақсадида 23 та отрядлар ташкил қилиниб, ушбу отрядларга жами 69 нафар малакали мутахассислар бириктирилган. Шундан, 23 нафари отряд раҳбарлари, 23 нафар Ички ишлар бўлими, яна 23 нафари эса Фавқулодда вазиятлар бўлими ходимларидир. 4800 гектар майдондаги ғаллани ўриб-йиғиб олиш ишларига жами 131 дона техникалар жалб қилинган.

Семинар давомида сўзга чиққанлар ҳосилни оптимал муддатларда йиғиб олиш, техника ва механизаторларнинг тайёргарлиги, хавфсизлик чораларига қатъий риоя қилиш, шунингдек, ғаллани даладан омборга сифатли етказиб бериш бўйича зарур тавсиялар бердилар, ўзаро фикр-мулоҳазалар алмашилди.

Шундан сўнг, дала четидаги замонавий комбайнлар ҳаракатга туширилди. Илк ўрим жараёни кўргазмали тарзда ташкил этилиб, меҳмонлар фермер хўжалигидаги техник салоҳият, ишчи кучининг бошқарилиши ва агротехник тадбирларнинг самарали амалга оширилишига бевосита гувоҳ бўлишди.

Йиғилиш иштирокчилари ушбу тадбирни нафақат тажриба алмашиш, балки меҳнатга, халқимизнинг ризқ-рўзига бўлган ҳурмат, эҳтиром ифодаси сифатида ҳам қабул қилишди. Бундай маънавий-маърифий руҳда ўтган семинарлар юртимиз қишлоқ хўжалигида меҳнаткаш деҳқонлар салоҳиятини юзага чиқариш, уларни рағбатлантириш ва миллий қадриятларимизни мустаҳкамлашда муҳим ўрин тутади.

Чарос Арслонова, туман ҳокимлигининг Ахборот хизмати раҳбари.