“Qumli ovul” fermer xoʻjaligida gʻalla oʻrim-yigʻim ishlari avjida

Ayni kunlarda Amudaryo tumanidagi hosildor dala maydonlarida bobodehqonlar hamda mirishkor fermerlar uchun yilning eng masʼuliyatli va mehnattalab palla — gʻalla oʻrim-yigʻim ishlari boshlandi. Bu palla dehqon uchun imtihon. Yurtning oziq-ovqat xavfsizligi esa aynan shu imtihon natijasiga bogʻliq. Yil davomida sidqidildan qilingan mehnat, yaxshi niyat bilan yerga tashlangan urugʻ bugun oʻz samarasini koʻrsatmoqda. Endigi vazifa — hosilni oʻz vaqtida va yoʻqotishlarsiz yigʻib olib, yuksak gʻalla xirmonini bunyod etishdir.

Tumanda mavsumga puxta tayyorgarlik koʻrilgan. Gʻalla oʻrim-yigʻim ishlarini samarali tashkil etish, texnikalarni ishga shay holatga keltirish, mutaxassislarni jalb qilish va xavfsizlikni taʼminlash yuzasidan aniq rejalar asosida ish olib borilmoqda.

Joriy yilda tumandagi 270 ta fermer xoʻjaligi tomonidan 4 ming 800 gektar maydonga bugʻdoy ekilgan. Ushbu yerlardan olingan hosilning 11 ming 130 tonnasini kontraktatsiya shartnomasi asosida qabul maskanlariga topshirish rejalashtirilgan. Yalpi hosilning qolgan qismi esa fermerlar va dehqonlar ixtiyorida qoladi.

Tumanning Xolimbeg ovulida faoliyat yuritayotgan “Qumli ovul” fermer xoʻjaligi raisi, koʻp yillik tajribaga ega fermer Otabek Yoʻldoshev boshchiligidagi jamoa bu yil 13 gektar maydonga bugʻdoy ekib, 40 tonna hosilni kontraktatsiya shartnomasi asosida sotishni maqsad qilgan. Barcha agrotexnik tadbirlar oʻz vaqtida amalga oshirilgani bois dalalarda moʻl hosil yetishtirildi.

Yuqori hosilga erishish uchun sidqidildan mehnat qilish, tuproq bilan tillashish, parvarish ishlarini oʻz vaqtida va toʻgʻri amalga oshirish talab etiladi. Dalada hosil moʻl boʻlsa, el dasturxoni ham toʻkin boʻladi. Ana shunda dehqon oʻz maqsadiga yetadi.

Mavsum davomida ishlar aniq reja asosida tashkil etilgan. Jumladan, tumanda 23 ta maxsus otryad tuzilgan boʻlib, har biriga 3 nafardan mutaxassis biriktirilgan. Bu jamoalar tarkibida 23 nafar otryad rahbari, 23 nafar ichki ishlar boʻlimi xodimi hamda 23 nafar Favqulodda vaziyatlar boshqarmasi vakili faoliyat olib bormoqda. Bunday chora-tadbirlar oʻrim samaradorligini oshirish va xavfsizlikni taʼminlashga xizmat qilmoqda.

Gʻalla oʻrish ishlarini sifatli va qisqa muddatda amalga oshirish maqsadida 131 ta qishloq xoʻjaligi texnikasi, jumladan, 18 ta zamonaviy gʻalla oʻrish kombayni, yuk tashuvchi vositalar hamda boshqa zarur texnikalar jalb etilgan. Har bir texnika toʻliq profilaktikadan oʻtkazilgan, xizmatga shay holatda. Dala ishlari muntazam nazorat qilinayotgani esa ish samaradorligiga ijobiy taʼsir koʻrsatmoqda.

Dehqon uchun eng ulugʻ mukofot — xirmonlar toʻlib, el dasturxonida toʻkinlik hukm surishi. Mirishkorlar mehnati samarasida omborlar donga toʻlmoqda.

Tumandagi fermerlar bu yil ham halol mehnat samarasini yaqin kunlarda namoyon etadi. Agar hosil toʻliq va sifatli yigʻib olinsa, omborlar don bilan toʻladi, xalq dasturxonida toʻkinlik boʻladi. Dehqonning xirmoni toʻlsa — yurtda baraka boʻladi.

Bu — faqat dehqonning yutugʻi emas, balki butun xalq dasturxonidagi toʻkinlik, farovonlik timsolidir. Chunki har bir boshoq don ortida halol mehnat, yurt farovonligini taʼminlash masʼuliyati turadi.

Shohzod Qurbonboyev.