31-sonli DMTTda “Xayr, bogʻcha – salom, maktab!” nomli tadbir oʻtkazildi

Yosh avlod tarbiyasi – jamiyat taraqqiyotining asosiy poydevori sanaladi. Bolalarning ilk qadamlari, taʼlimga boʻlgan muhabbati va kelajakka ishonchi maktabgacha taʼlim muassasalarida shakllanadi. Amudaryo tumanining Toʻlqin ovuli hududida joylashgan 31-sonli davlat maktabgacha taʼlim tashkiloti ham ana shu ezgu maqsadlarga xizmat qilmoqda.

Yaqinda ushbu muassasada bolajonlarni maktabga kuzatish munosabati bilan “Xayr, bogʻcha – salom, maktab!” nomli bayram tadbiri tashkil etildi. Joriy yilda mazkur muassasaning 38 nafar tarbiyalanuvchisi maktab ostonasiga qadam qoʻyish arafasida turibdi. Ularning koʻzlaridagi samimiy hayajon, yangi taʼlim maskani sari intilish bayramona tadbirda yaqqol aks etdi. Tadbir doirasida bolajonlar Toʻlqin ovulidagi 33-sonli umumtaʼlim maktabi hamda ustozlari bilan tanishtirildi.

Tadbirning adabiy-badiiy qismi ovuldagi aholi dam olish maskanlaridan birida davom ettirildi. Unda muassasa direktori Hurriyat Toʻqliboyeva, tarbiyachilar, bolajonlar hamda ularning onalari va buvilari faol ishtirok etdi. Tadbir Oʻzbekiston va Qoraqalpogʻiston Respublikalarining davlat madhiyalari bilan boshlandi.

Shundan soʻng koʻp yillik tajribaga ega ustoz-tarbiyachi Tursunoy Rametova soʻzga chiqib, barcha tarbiyalanuvchilarga kelgusi maktab hayotida muvaffaqiyatlarga tilakdoshlik bildirdi. Shuningdek, bolalarni maktabda ham ana shunday bilimga chanqoqlik bilan oʻqishga chorladi.

Soʻzga chiqqanlar tomonidan maktabgacha taʼlim tizimida olib borilayotgan islohotlar, bogʻchalarda bolalarni har tomonlama rivojlantirish uchun yaratilgan sharoitlar haqida soʻz yuritildi. Taʼkidlanganidek, bogʻchada yaxshi tarbiya olgan bola maktab taʼlimini oʻzlashtirishda ziyrakligi va faolligi bilan boshqa tengdoshlaridan ajralib turadi.

Maʼlumot oʻrnida qayd etish joizki, bugungi kunda 31-sonli maktabgacha taʼlim tashkilotida 36 nafar ishchi va xodim faoliyat yuritmoqda. Ulardan 15 nafari tarbiyachi-pedagoglar boʻlib, 13 nafari oliy maʼlumotli mutaxassislardir. Shuningdek, muassasada uch nafar 1-toifali va ikki nafar 2-toifali tarbiyachi faoliyat olib bormoqda. Yordamchi tarbiyachilar esa muntazam kasbiy oʻquvlarda qatnashib, bolalar qalbidan munosib oʻrin egallashgan. Hozirda muassasada 5 ta guruhda jami 150 nafar bola taʼlim-talim-tarbiya olmoqda.

Bolajonlarning ijodiy chiqishlari tadbirning hayajonli qismiga aylandi. Ular ona Vatan, maktab, bogʻcha va bolalik haqidagi sheʼrlarni oʻzbek, rus va ingliz tillarida ifodali tarzda yoddan oʻqishdi. Shoʻx qoʻshiqlar sadosi ostida raqslar ijro etib, ishtirokchilarga koʻtarinki kayfiyat ulashdi.

Shuningdek, bolalarning onalari va buvilari ham soʻzga chiqib, tarbiyachilar mehnatini yuksak baholadilar hamda samimiy minnatdorlik izhor etdilar. Ota-onalar farzandlarining kelgusi taʼlim bosqichlarida ham fidoiy ustozlar qoʻl ostida yaxshi natijalarga erishishiga tilakdoshlik bildirdilar.

Tadbir nafaqat kichkintoylar, balki ularning ota-onalari uchun ham unutilmas xotira sifatida yodda qoldi.

Ravila Choʻtboyeva, 31-sonli maktabgacha taʼlim tashkiloti direktori oʻrinbosari.