Choykoʻllik xotin-qizlar – farovon hayot va bunyodkorlik yoʻlida

Bugungi kunda jamiyatimizda xotin-qizlarning har sohada faol ishtiroki, ularning ijtimoiy-iqtisodiy hayotdagi oʻrni yildan-yilga ortib bormoqda. Hududlar kesimida joylarda ayol-qizlar bandligini taʼminlash, ularni kasb-hunarga oʻrgatish, tadbirkorlikka yoʻnaltirish borasida olib borilayotgan ishlar salmoqli natijalar bermoqda.

Bu borada Amudaryo tumanining Choykoʻl ovuli ijobiy tajribalarga boy. Bu yerda xotin-qizlar faoliyatini qoʻllab-quvvatlash, ularning bandligini taʼminlash yoʻlida amalga oshirilayotgan ishlar boshqa hududlar uchun ibrat boʻla oladi.

Ovulda faoliyat yuritayotgan xotin-qizlar faoli Saylixon Murodboyeva tashabbuskorligi bilan ayollarni ijtimoiy qoʻllab-quvvatlash, ularni “Ayollar daftari”ga kiritib, zarur yordamlar koʻrsatish tizimli yoʻlga qoʻyilgan. Natijada koʻplab xotin-qizlar oʻzining oilasiga qoʻshimcha daromad olib kirayotgan, oʻz tadbirkorligini boshlagan, jamiyat hayotida faol ishtirok etayotgan fuqarolarga aylanishmoqda.

Xususan, ovulda yashovchi Saida Esenboyeva ana shunday ilgʻor ayollardan biridir. U “Ayollar daftari”ga kiritilgach, xotin-qizlar faoli va mutasaddilar koʻmagida kasb-hunarga oʻqitildi, subsidiya asosida tikuv mashinasi bilan taʼminlandi. Shu orqali u oʻzining tikuvchilik faoliyatini yoʻlga qoʻydi. Hozirda esa nafaqat oʻziga, balki yana 10 nafar xotin-qizga ish oʻrni yaratgan holda, ular bilan birgalikda tikilgan mahsulotlarini Qozogʻiston Respublikasiga eksport qilmoqda.

Shuningdek, Oʻgʻiloy Meliyeva ham oʻz tashabbusini roʻyobga chiqarish uchun astoydil harakat qilgan ayollardan biri. U mahalla masʼullarining koʻmagida subsidiya asosida tikuv mashinasi olib, bugunga kelib 4 nafar shogirdni tayyorlamoqda. Uning maqsadi – hunar orqali yosh avlodni ish bilan taʼminlash, tajribasini ulashish orqali jamiyatga foydali inson boʻlishdir.

Ovulda istiqomat qiluvchi tajribali gulchi Bibirobiya Usmonova uzoq yillardan buyon farzandlari va nevaralari bilan birgalikda gulchilik bilan shugʻullanadi. U yetishtirayotgan gullar turfa xildaligi bilan ajralib turadi: xrizantema, turk gvozdikasi, adonis, situs, seren, liliya va 8 xil turdagi atirgullar. Bundan tashqari, mevali daraxtlar nihollari, 9 xil uzum navini parvarishlab, nafaqat ovul aholisini, balki butun tuman bozorlarini oʻz mahsulotlari bilan taʼminlab kelmoqda. Gulchilik nafaqat iqtisodiy foyda keltiradi, balki atrof-muhitni obodlashtiradi, fayz baxsh etadi.

Bibirobiya Usmonovaning mehnati beqiyos eʼtirofga sazovor boʻlib, u “Ibratli ayol” koʻkrak nishoni bilan taqdirlandi. Bu faqat bir ayolga emas, balki bir avlodga berilgan eʼtibor deyish mumkin. Zero, uning qizi – Dilrabo Oʻrazimbetova ham onasining izidan borib, “Umid uchquni” koʻkrak nishoni bilan taqdirlangan. Bu esa oilada qadrlangan mehnat, mehr va sabrning bevosita samarasidir.

Choykoʻllik yana bir faol ayol – Dilnoza Aytimbetova ham "Ayollar daftari" orqali oʻz orzusini roʻyobga chiqardi. U mahalla masʼullari yordamida parrandachilik uchun imtiyozli kredit olib, parrandachilikni yoʻlga qoʻydi. Joriy mavsumda u 4 marotaba joʻjalar yetishtirib, mahalladoshlariga sotdi va moʻmay daromad topdi. Endilikda esa bu faoliyatni yanada kengaytirish, parrandachilikni biznesga aylantirish niyatida. U ham hozirda boshqa xotin-qizlar uchun hayotiy namunadir.

Choykoʻl ovulidagi bu kabi misollar orqali ayollarga berilgan eʼtibor va koʻrsatilgan yordamlar natijasida qanday katta ijobiy oʻzgarishlarga erishish mumkinligini yaqqol koʻrsatadi. Har bir xotin-qiz oʻz oilasi, mahallasi va nihoyat jamiyat taraqqiyotida muhim rol oʻynaydi. Ularning harakatiga qanot bagʻishlash, imkoniyat eshiklarini ochish esa jamiyatimizning buguni va ertangi kuniga xizmat qiladi. Zero, ayollar qoʻli bilan yaratilgan mehnat, tinchlik va baraka olib keladi. Choykoʻllik ayollar esa buning yorqin dalilidir.

 Charos Arslonova, tuman hokimligining Axborot xizmati rahbari.