“Nodavlat notijorat tashkilotlari uyi”da “Ochiq eshiklar kuni” tadbiri oʻtkazildi
Soʻnggi yillarda yurtimizda fuqarolik jamiyatini rivojlantirish, jumladan, nodavlat notijorat tashkilotlari faoliyatini qoʻllab-quvvatlashga qaratilgan tizimli islohotlar amalga oshirilmoqda. Mamlakat ijtimoiy-siyosiy hayotida NNTlarning oʻrni va taʼsiri tobora ortib bormoqda. Ular jamiyatdagi dolzarb muammolarni keng jamoatchilikka yetkazish, fuqarolarning huquqiy bilimini yuksaltirish, aholining faolligini oshirish, atrof-muhit muhofazasi, taʼlim va tibbiyot kabi qator sohalarda muhim tashabbuslarni ilgari surmoqda.
Ana shunday jarayonda NNTlarning huquqiy bilim va maslahatlarga boʻlgan ehtiyojini qondirish, ularning faoliyatida uchrayotgan muammolarni oʻrganish va yechim topish maqsadida Qoraqalpogʻiston Respublikasida “Ochiq eshiklar kuni” tadbiri oʻtkazildi.
Nukus shahridagi “Nodavlat notijorat tashkilotlari uyi”da tashkil etilgan mazkur tadbir Oʻzbekiston nodavlat notijorat tashkilotlari milliy assotsiatsiyasining Qoraqalpogʻiston hududiy boʻlinmasi hamda “Madad” NNT Nukus shahar huquqiy byurosi hamkorligida amalga oshirildi. Tadbirda Qoraqalpogʻistonda faoliyat yuritayotgan bir qator NNTlar, fuqarolik jamiyati institutlari va faol fuqarolar ishtirok etdi.
Ochiq muloqot shaklida oʻtgan tadbirda ishtirokchilar oʻzlarini qiynab kelayotgan muammolar yuzasidan bevosita mutaxassislardan huquqiy maslahatlar olish imkoniga ega boʻlishdi. Xususan, NNTlar tomonidan huquqbuzarlik holatlari aniqlanganida yuzaga keladigan javobgarlik masalalari, hisobotlarni toʻgʻri va shaffof yuritish, faoliyatlari bilan bogʻliq hujjatlarni rasmiylashtirish, davlat tomonidan belgilangan imtiyozlar va boshqa qonuniy meʼyorlar haqida batafsil tushuntirishlar berildi.
“Ochiq eshiklar kuni” tadbiri ishtirokchilari NNT faoliyatida uchraydigan huquqiy muammolar yuzasidan yakka tartibda maslahat olish imkoniyatiga ega boʻldilar. Shuningdek, ishtirokchilarga qonunchilikdagi yangiliklar, davlat tomonidan taqdim etiladigan imtiyozlar va qoʻllab-quvvatlash mexanizmlari haqida batafsil maʼlumotlar berildi. Tadbir doirasida mutaxassislar tomonidan huquqbuzarliklar sodir etilishining oldini olish, hisobotlarni tayyorlash va yuritishda yoʻl qoʻyiladigan xatolar va ularni bartaraf etish yoʻllari borasida ham tavsiyalar taqdim etildi.
Mazkur tadbir NNTlarning faoliyatini yanada samarali yoʻlga qoʻyish, huquqiy asoslardan toʻgʻri foydalanish va ularning jamiyatdagi rolini mustahkamlashda muhim qadam boʻldi. Fuqarolik jamiyatini shakllantirishda, inson huquqlarini himoya qilishda, ijtimoiy adolatni taʼminlashda nodavlat notijorat tashkilotlarining ishtiroki tobora muhim ahamiyat kasb etmoqda.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
