Mustaqillik bayrami arafasida “Hokim kubogi” musobaqalari oʻtkazildi

Joriy yilning 20–25-avgust kunlari davomida Amudaryo tumanidagi ovul va mahallalar jamoalari oʻrtasida mini futbol boʻyicha oʻtkazilgan “Hokim kubogi” musobaqasi bayram arafasidagi eng yorqin voqealardan biri boʻldi. Mamlakatimiz Mustaqilligining 34 yilligiga bagʻishlab oʻtkazilgan sport tadbirlari davomida har bir ovul va mahalla jamoasi gʻalaba uchun bor kuchini safarbar etgan holda gʻoliblik uchun kurashdi. Tomoshabinlar ham mini futbol maydonlaridagi qizgʻin, bir-biridan qiziqarli bahslarga guvoh boʻlishdi. Ular har bir oʻyinda oʻz hududining jamoasini qoʻllab-quvvatlab, haqiqiy sport bayrami muhitini yaratishdi.

Shiddatli bellashuvlar yakuniga koʻra 1-oʻrin Toʻlqin ovuli jamoasiga, 2-oʻrin Navoiy nomli mahalla yoshlariga, 3-oʻrin esa Kuyuk-koʻpir ovulining mini futbol jamoasiga nasib etdi.

27-avgust kuni boʻlib oʻtgan tantanali taqdirlash marosimida gʻolib va faol ishtirok etgan jamoalar diplom, medal va qimmatbaho sovgʻalar bilan taqdirlandi.

Tadbirda tuman hokimi oʻrinbosari Nodirbek Kamolov soʻzga chiqib, jismoniy tarbiya va sportning inson salomatligidagi ahamiyati, yoshlarning maʼnaviy va jismoniy barkamolligini taʼminlashdagi beqiyos hissasi haqida alohida toʻxtaldi.

Hokim oʻrinbosari oʻz soʻzida ushbu musobaqa sportchilar mahoratini sinovdan oʻtkazishga, yoshlarda bir-biriga hurmat, doʻstlik, hamjihatlik kabi fazilatlarni mustahkamlashga hissa qoʻshganini alohida taʼkidladi. “Sogʻlom avlod – yurt kelajagi, bizning eng katta boyligimizdir”, — dedi u oʻz nutqida.

Darhaqiqat, bugungi kunda mamlakatimizda sportni rivojlantirish davlat siyosatining muhim yoʻnalishlaridan biriga aylangan. Soʻnggi yillarda barcha hududlarda zamonaviy sport inshootlari barpo etilmoqda, mahallalarda sport maydonchalari tashkil qilinmoqda, yoshlarga sport bilan muntazam shugʻullanish uchun keng imkoniyatlar yaratilmoqda.

Prezidentimiz tashabbusi bilan “Sogʻlom turmush tarzi” va “Besh tashabbus” loyihalari asosida yoshlarni ommaviy sportga jalb etish, qizlar sportini rivojlantirish, isteʼdodli sportchilarni qoʻllab-quvvatlash borasida keng koʻlamli ishlar amalga oshirilmoqda. Bugun yoshlarimiz nafaqat respublika, balki xalqaro maydonlarda ham yurtimiz sharafini munosib himoya qilmoqda.

Tumanimizda tashkil etilgan “Hokim kubogi” musobaqasi ham ushbu yuksak islohotlarning amaliy ifodasidir. Sport – sogʻlik garovi, birlik va doʻstlik ramzi, yoshlar tarbiyasining muhim maktabidir. Mustaqillik bayrami arafasida oʻtkazilgan bu kabi tadbirlar yoshlar qalbida Vatanga mehr, sogʻlom turmushga intilish va doʻstlik rishtalarini yanada mustahkamlaydi.

Charos Arslonova, tuman hokimligining Axborot xizmati rahbari.