Мустақиллик байрами арафасида “Ҳоким кубоги” мусобақалари ўтказилди

Жорий йилнинг 20–25 август кунлари давомида Амударё туманидаги овул ва маҳаллалар жамоалари ўртасида мини футбол бўйича ўтказилган “Ҳоким кубоги” мусобақаси байрам арафасидаги энг ёрқин воқеалардан бири бўлди. Мамлакатимиз Мустақиллигининг 34 йиллигига бағишлаб ўтказилган спорт тадбирлари давомида ҳар бир овул ва маҳалла жамоаси ғалаба учун бор кучини сафарбар этган ҳолда ғолиблик учун курашди. Томошабинлар ҳам мини футбол майдонларидаги қизғин, бир-биридан қизиқарли баҳсларга гувоҳ бўлишди. Улар ҳар бир ўйинда ўз ҳудудининг жамоасини қўллаб-қувватлаб, ҳақиқий спорт байрами муҳитини яратишди.

Шиддатли беллашувлар якунига кўра 1-ўрин Тўлқин овули жамоасига, 2-ўрин Навоий номли маҳалла ёшларига, 3-ўрин эса Куюк-кўпир овулининг мини футбол жамоасига насиб этди.

27 август куни бўлиб ўтган тантанали тақдирлаш маросимида ғолиб ва фаол иштирок этган жамоалар диплом, медаль ва қимматбаҳо совғалар билан тақдирланди.

Тадбирда туман ҳокими ўринбосари Нодирбек Камолов сўзга чиқиб, жисмоний тарбия ва спортнинг инсон саломатлигидаги аҳамияти, ёшларнинг маънавий ва жисмоний баркамоллигини таъминлашдаги беқиёс ҳиссаси ҳақида алоҳида тўхталди.

Ҳоким ўринбосари ўз сўзида ушбу мусобақа спортчилар маҳоратини синовдан ўтказишга, ёшларда бир-бирига ҳурмат, дўстлик, ҳамжиҳатлик каби фазилатларни мустаҳкамлашга ҳисса қўшганини алоҳида таъкидлади. “Соғлом авлод – юрт келажаги, бизнинг энг катта бойлигимиздир”, — деди у ўз нутқида.

Дарҳақиқат, бугунги кунда мамлакатимизда спортни ривожлантириш давлат сиёсатининг муҳим йўналишларидан бирига айланган. Сўнгги йилларда барча ҳудудларда замонавий спорт иншоотлари барпо этилмоқда, маҳаллаларда спорт майдончалари ташкил қилинмоқда, ёшларга спорт билан мунтазам шуғулланиш учун кенг имкониятлар яратилмоқда.

Президентимиз ташаббуси билан “Соғлом турмуш тарзи” ва “Беш ташаббус” лойиҳалари асосида ёшларни оммавий спортга жалб этиш, қизлар спортини ривожлантириш, истеъдодли спортчиларни қўллаб-қувватлаш борасида кенг кўламли ишлар амалга оширилмоқда. Бугун ёшларимиз нафақат республика, балки халқаро майдонларда ҳам юртимиз шарафини муносиб ҳимоя қилмоқда.

Туманимизда ташкил этилган “Ҳоким кубоги” мусобақаси ҳам ушбу юксак ислоҳотларнинг амалий ифодасидир. Спорт – соғлик гарови, бирлик ва дўстлик рамзи, ёшлар тарбиясининг муҳим мактабидир. Мустақиллик байрами арафасида ўтказилган бу каби тадбирлар ёшлар қалбида Ватанга меҳр, соғлом турмушга интилиш ва дўстлик ришталарини янада мустаҳкамлайди.

Чарос Арслонова, туман ҳокимлигининг Ахборот хизмати раҳбари.