Boʻzatovda “Inson – insonga koʻmakchi” mavzusida seminar-kouching oʻtkazildi

Mamlakatimizda aholining ijtimoiy himoyasini kuchaytirish, fuqarolarning muammolarini bevosita mahalla darajasida hal etishga qaratilgan islohotlar izchil davom etmoqda. Ushbu islohotlarning amaliy ifodasi sifatida tashkil qilingan "Inson" ijtimoiy xizmatlar markazlari ijtimoiy himoyaga muhtoj aholining eng yaqin yordamchisiga aylanmoqda.

Bu boradagi ishlarni yanada jadallashtirish uchun aholining fikr-mulohazalarini oʻrganish va ularni sohadagi yangiliklar bilan yaqindan tanishtirish maqsadida Boʻzatov tumanidagi Koʻk suv mahallasida "Inson – insonga koʻmakchi" mavzusida seminar-kouching tashkil qilindi. Tuman "Inson" ijtimoiy xizmatlar markazi tomonidan tashkil etilgan ushbu tadbir mahalla aholisi va masʼul xodimlarni bir davraga birlashtirdi.

Seminar-kouchingni oʻtkazishdan asosiy maqsad – ijtimoiy himoya tizimida amalga oshirilayotgan yangiliklarni keng jamoatchilikka yetkazish, fuqarolarning huquqiy bilimini oshirish va aholi muammolarining yechimini birgalikda topishdan iboratdir.

Tadbirda tuman "Inson" ijtimoiy xizmatlar markazi xodimlari, mahallalarga biriktirilgan ijtimoiy xodimlar hamda aholi vakillari faol ishtirok etdi.

Aytish joizki, bugungi kunda mahallalarda har bir sohaga alohida eʼtibor qaratilib, jumladan aholining ijtimoiy himoyaga muhtoj qatlamini aniqlash hamda ularning muammolarini ijobiy hal etish boʻyicha masʼul xodimlar tomonidan amaliy ishlar yoʻlga qoʻyilgan. 2023-yilning sentyabr oyidan boshlab mahallalarda ijtimoiy xodimlar lavozimi joriy etildi va Koʻk suv mahallasiga tayinlangan Allambergen Embergenov shu kunga qadar aholining eng yaqin koʻmakchisi sifatida faoliyat yuritib kelmoqda.

Seminar-kouchingda asosiy eʼtibor amaldagi meʼyoriy hujjatlar va aholiga koʻrsatilayotgan xizmatlarning huquqiy asoslarini tushuntirishga qaratildi.

Markazning sektor bosh mutaxassisi Medet Arziyev yordamga muhtoj oilalar uchun gaz va elektr energiyasiga toʻlanadigan kompensatsiyalar haqida maʼruza qildi. Bu maʼlumotlar aholining ijtimoiy-iqtisodiy ahvolini yaxshilashga qaratilgan davlat tomonidan berilayotgan moliyaviy koʻmaklarni toʻgʻri va oʻz vaqtida olish uchun muhim ahamiyat kasb etadi.

Markazning yana bir sektor bosh mutaxassisi Bahodir Shamambetov Oʻzbekiston Respublikasi Vazirlar Mahkamasining 2025-yil 23-iyuldagi “Ayollar daftari," "Yoshlar daftari" va "Saxovat va koʻmak" jamgʻarmalari mablagʻlari hisobidan ijtimoiy yordam koʻrsatish tizimini takomillashtirish chora-tadbirlari toʻgʻrisida”gi qaroriga asosan "Saxovat va koʻmak" jamgʻarmasidan koʻrsatiladigan xizmatlar boʻyicha batafsil tushuntirish berdi. Bu jamgʻarma aholining moddiy yordamga muhtoj qatlamlariga tezkor va manzilli koʻmak berishda muhim rol oʻynashi taʼkidlandi.

Shuningdek, markazning sektor bosh mutaxassisi Qiyas Xabipov Oʻzbekiston Respublikasi Vazirlar Mahkamasining 2024-yil 30-aprel kuni "Muhtoj shaxslarni protez-ortopediya moslamalari va reabilitatsiya qilishning texnik vositalari bilan taʼminlash tartibi toʻgʻrisidagi nizomni tasdiqlash haqida"gi qarori haqida nutq soʻzladi. Bu mavzu nogironligi boʻlgan shaxslarning hayot sifatini yaxshilash va ularni jamiyatga toʻlaqonli integratsiya qilish uchun juda dolzarb ahamiyatga ega ekani alohida qayd qilindi.

Seminar-kouchingdagi eng muhim jihatlardan biri – uning interaktiv tarzda oʻtkazilganidir. Ishtirokchilar "Inson" ijtimoiy xizmatlar markazi faoliyati bilan tanishish bilan birga, interfaol oʻyin asosida markaz xodimlari rolida oʻzlarini sinab koʻrdilar. Bunday amaliy yondashuv fuqarolarning tizimga boʻlgan ishonchini oshirib, muammolarga masʼul xodimlar nazari bilan qarash imkonini berdi.

Tadbir davomida ishtirokchilarning fikr-mulohazalari tinglandi va barcha savollariga mutaxassislar tomonidan atroflicha javob berildi.  Boʻzatov tumanidagi ushbu tadbir "Inson – jamiyatning tayanchi" tamoyili asosidagi ijtimoiy himoya tizimining mahalla darajasidagi samaradorligini oshirishga qaratilgan amaliy qadam boʻldi.