“Inson” IHM xodimlari tomonidan “Yolgʻiz keksa” reyestriga kiritilgan fuqarolarning xonadonlarida hashar tashkil etildi

Mamlakatimiz boʻylab Oʻzbekiston Respublikasi davlat mustaqilligining 35 yillik bayramini munosib kutib olish va uni yuqori saviyada nishonlash maqsadida keng koʻlamli tayyorgarlik ishlari qizgʻin pallaga kirdi. Bayram arafasida yurtimizda “Yagona Vatan, yagona xalq boʻlib, yangi hayot va kelajak yaratamiz!” degan ezgu shior ostida barcha hududlarda xalqimizning mehr-oqibat, hamjihatlik va bagʻrikenglik kabi eng goʻzal fazilatlari yanada yaqqol namoyon boʻlmoqda.

Xususan, Oʻzbekiston Respublikasi Vazirlar Mahkamasining 2026-yil 17-iyuldagi yigʻilish bayoni ijrosini taʼminlashga qaratilgan “Dolzarb 40 kunlik” tadbirlari doirasida joylarda keng qamrovli obodonlashtirish, bunyodkorlik va ijtimoiy himoyaga muhtoj aholi qatlamlarini manzilli qoʻllab-quvvatlash ishlari uyushqoqlik bilan amalga oshirilmoqda. Ana shunday ezgu tashabbuslarning amaliy ifodasi sifatida Amudaryo tumanida ham aholining ijtimoiy himoyaga muhtoj qatlamlari, xususan, yolgʻiz keksalar va nogironligi boʻlgan shaxslar holidan xabar olish, ularning yashash sharoitlarini yaxshilashga qaratilgan tizimli ishlar yoʻlga qoʻyildi.

Jumladan, Amudaryo tumani “Inson” ijtimoiy xizmatlar markazining masʼul xodimlari tomonidan “Yolgʻiz keksa” reyestriga kiritilgan, doimiy eʼtibor va gʻamxoʻrlikka muhtoj fuqarolarning xonadonlarida hashar yoʻli bilan tozalik va obodonlashtirish tadbirlari tashkil etildi.

Tumandagi Choykoʻl ovuli hududida istiqomat qiluvchi, yolgʻiz yashovchi nogironligi boʻlgan shaxslar Rahima Jumaniyazova hamda Toʻxta Saburova, shuningdek, Uyshin mahallasida yashovchi yolgʻiz nogironligi boʻlgan fuqaro Shavkat Raximabayevning xonadonlarida sanitariya-tozalash ishlari olib borildi. Mazkur xayrli va savobli ishlar Amudaryo tumani “Inson” ijtimoiy xizmatlar markazi xodimlari, “Mahalla yettiligi” vakillari hamda “Qurboniyazov Jasur” masʼuliyati cheklangan jamiyati assistentlarining oʻzaro faol hamkorligida amalga oshirildi.

Jarayon davomida ushbu xonadonlar va ularning atrof hududlarida joylashgan daraxtlarga ohak surtilib, tevarak-atrofga shakl berildi. Bundan tashqari, chuqur tozalash ishlari olib borilib, hovli va uy atrofi turli xil maishiy chiqindilar hamda yovvoyi begona oʻtlardan toʻliq tozalandi. Natijada hudud qatʼiy sanitariya va gigiyena talablariga muvofiq holatga keltirilib, ozodalik va tartib oʻrnatildi.

Albatta, bunday tadbirlar faqatgina jismoniy mehnat yoki tozalash ishlari bilan cheklanib qolmaydi. Masʼullar tomonidan ushbu fuqarolarning holidan xabar olinib, ularning yashash sharoitlari, sogʻligʻi va ruhiy holati yaqindan oʻrganildi. Ular bilan oʻtkazilgan dildan suhbatlar davomida tibbiy, psixologik va boshqa turdagi maishiy-ijtimoiy xizmatlarga boʻlgan ehtiyojlari tahlil qilinib, mutaxassislar tomonidan tegishli maslahat va kerakli yoʻl-yoʻriqlar berildi.

Olib borilgan obodonlashtirish va koʻkalamzorlashtirish ishlari natijasida ushbu xonadonlarning sanitariya holati yaxshilanib, yolgʻiz keksalar va nogironligi boʻlgan shaxslarning munosib yashashi uchun yanada qulay va ozoda muhit yaratildi. Bunday xayrli va insonparvarlik tadbirlari jamiyatimizda yolgʻiz keksalar hamda nogironligi boʻlgan shaxslarni har tomonlama va manzilli qoʻllab-quvvatlash, ularning hayotga boʻlgan qiziqishi va turmush sifatini oshirishga xizmat qilishi bilan birga, mahallalarda mehr-oqibat, oʻzaro hurmat hamda hamjihatlik muhitini yanada mustahkamlashda muhim omil boʻlmoqda.

Mamlakatimiz boʻylab Oʻzbekiston Respublikasi davlat mustaqilligining 35 yillik bayramini koʻtarinki ruhda nishonlashga tayyorgarlik koʻrish hamda bayram tadbirlarini yuqori saviyada oʻtkazish yuzasidan belgilangan chora-tadbirlar ijrosi doirasidagi bu kabi ezgu ishlar tasdiqlangan reja asosida barcha hududlarda izchil davom ettirilmoqda. Hech bir inson mehr eʼtibordan chetda qolmaydigan yurtimizda haqiqiy bayram shukuhi har bir xonadonga, har bir yurtdoshimiz qalbiga kirib bormoqda.