OʻZBEKISTON KASABA UYuShMALARI HARAKATINING 120 YILLIGI KENG NIShONLANDI
Oʻzbekiston Kasaba uyushmalari harakatining 120 yilligi va 11-noyabr — “Kasaba uyushmalari kuni munosabati bilan 2025-yil 11-noyabr kuni Amudaryo tumani Madaniyat boʻlimining majlislar zalida tantanali bayram tadbiri boʻlib oʻtdi.
“Oʻzbekiston Kasaba uyushmalari 120-yil xalq bilan” shiori ostida oʻtkazilgan tadbirda tuman Maktabgacha va maktab taʼlimi boʻlimi boshligʻi Yalgʻashboy Shamuratov, Taʼlim va fan xodimlari kasaba uyushmasi tuman boʻlinmasi Kengashi raisi Ulugʻbek Abdurahmanov, Agrosanoat xodimlari kasaba uyushmasi tuman Kengashi raisi J. Qurboniyazov, Davlat va jamoat muassasalari xodimlari kasaba uyushmasi tuman Kengashi raisi D. Rajabov hamda tumandagi davlat va jamoat tashkilotlari rahbarlari, boshlangʻich kasaba uyushmalari tashkilotlari raislari ishtirok qildilar.
Tadbirda Taʼlim va fan xodimlari kasaba uyushmasi tuman boʻlinmasi Kengashi raisi Ulugʻbek Abdurahmanov soʻzga chiqib, Oʻzbekiston Kasaba uyushmalarining buyuk va xalqparvar siyosati hamda uning tarixi, jamiyat hayotida tutgan oʻrni, ishchi-xodimlar manfaatlarini himoya qilishdagi masʼuliyati va inson qadri ustuvor boʻlgan Yangi Oʻzbekiston taraqqiyotida ushbu tizimning ahamiyati haqida batafsil maʼruza qildi.
Bayram tadbirida soʻzga chiqqan Amudaryo tuman Maktabgacha va maktab taʼlim boʻlimi boshligʻi Yalgʻashboy Shamuratov va boshqalar mamlakatimizda kasaba uyushmalarining 120 yillik tarixi davomida davlat va jamoat tashkilotlarida erishilgan yutuqlar, mazkur yutuqlar uchun keng yoʻl ochgan kasaba uyushmalarining beqiyos xalqparvar siyosati, xodimlarning huquqiy, ijtimoiy va iqtisodiy manfaatlarini himoya qilishdagi gʻamxoʻrliklari xususida atroflicha toʻxtalib oʻtdilar.
Shuningdek, soʻzga chiqqanlar kasaba uyushmalarining ishchi-xizmatchilarni el-yurt farovonligi, mamlakatimiz taraqqiyoti yoʻlida birlashtirib, har bir mehnat jamoasida hamjihatlik, oʻzaro mehr-oqibat tuygʻulari ustuvorligini taʼminlashdagi ahamiyatini alohida taʼkidladilar hamda barcha kasaba uyushma tashkilotlari aʼzolarini, mehnat jamoalarini 11-noyabr — Oʻzbekiston Kasaba uyushmalari kuni bayrami bilan samimiy tabrikladilar.
Haqiqatan ham, kasaba uyushmalari har bir ishchi xodimning eng ishonchli gʻamxoʻri, huquq va erkinliklarining himoyachisi, mamlakatimizning millatlararo totuvlik va bagʻrikenglik, doʻstlik hamda tinchlik siyosatining yalovbardori sifatidagi missiyasini sharaf bilan ado etib kelmoqda. Ayniqsa, xalqimiz uchun eng ogʻir kechgan XX asr talotoʻplari, qatagʻon yillari sinovlari, Ikkinchi jahon urushi va turgʻunlik yillaridagi mislsiz qiyinchiliklarni yengib oʻtishda kasaba uyushmalari jafokash xalqimiz uchun togʻday suyanch boʻldi. Bu haqda tadbirda ishtirok etgan kasaba uyushma faollari toʻlqinlanib soʻz yuritdilar.
Bayram tadbiri davomida kasaba uyushma faollari va oʻzlarining fidoyi mehnatlari bilan el-yurt hurmatiga sazovor boʻlgan turli sohalar xodimlaridan bir guruhiga esdalik sovgʻalari va tashakkurnomalar topshirildi. Tadbirda Amudaryo tumani Madaniyat boʻlimi sanʼatkorlari tomonidan tayyorlangan kontsert dasturi namoyish etildi va bayramona kontsert dasturi barchaga xushkayfiyat bagʻishladi.
Robiya YOʻLDOShEVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
