TOShYoPLIKLAR IShONChINI QOZONGAN IJTIMOIY XODIM

Amudaryo tumanidagi Toshyop ovul fuqarolar yigʻinida kompleks xizmat koʻrsatuvchi ijtimoiy xodim Mavluda Qalandarova oʻz faoliyatini boshlaganiga hali koʻp vaqt boʻlgani yoʻq. Shunday boʻlsa-da, u oʻz xizmat vazifasini bajarish jarayonida samimiyligi, har bir ishga masʼuliyat bilan yondashishi, qishloq aholisi hayotiga doir muammolarni hal etishdagi fidoyiligi tufayli qisqa vaqt ichida toshyopliklarning hurmat va eʼtiborini qozonib ulgurdi.

Chunki u ilk ish kunidanoq Ijtimoiy himoya milliy agentligi tizimida belgilangan 104 xildagi ijtimoiy xizmat turlari boʻyicha aholining arizalarini qabul qilib, har bir murojaat boʻyicha "Mahalla yettiligi" aʼzolari bilan oʻzaro hamkorlikda oʻrganishlar olib bordi. Keys-menejment asosidagi oʻrganishlar natijasida qishloq fuqarolariga 34 xildagi ijtimoiy xizmatlarga ehtiyoj borligi aniqlandi va 2025-yil boshidan ayni kungacha aholidan 588 ta ariza qabul qilib olindi.

Mavluda Qalandarova arizalar bilan ishlashda ularning maʼno-mazmunidan kelib chiqib, individual yondashuv asosida muammolarni bartaraf etish choralarini koʻrdi. U birinchi galda yosh bolalar bilan bogʻliq masalalarga eʼtibor qaratdi.

Tibbiyot sohasi mutaxassislari ishtirokida tibbiy tekshiruvlar oʻtkazilib, 5 nafar taʼlimga tortilmagan bolalardan 1 nafari kunduzgi parvarishlashga, 2 nafar bola "Imkon" oʻquv markaziga, 2 nafar bola esa 10-sonli "Nurli makon" oʻquv markaziga taʼlimga qamrab olindi.

Yil boshidan beri 8 nafar nogironligi boʻlgan fuqarolar oʻzlariga yarasha ish bilan taʼminlandi. Yana 8 nafar nogironligi boʻlgan shaxslar adaptiv sport guruhlariga yoʻnaltirildi va 6 nafar nogironligi boʻlgan shaxslar tibbiy-ijtimoiy ekspertiza komissiyasining xulosalari asosida parasportga jalb etildi. Kam taʼminlangan, ehtiyojmand oilalarni qoʻllab-quvvatlash maqsadida 16 nafar fuqaroga kuzgi-qishgi mavsum uchun kiyim-kechaklar berildi.

Mavluda Qalandarovaning faoliyatida bu kabi xayrli ishlar talaygina. U vasiylik va homiylikka olingan bolalar boʻyicha monitoring yuritish, yakka-yolgʻiz yashovchi fuqarolarning ijtimoiylashuviga koʻmaklashish, ularning hayotga joʻshqin nazar bilan qarashlari uchun turli koʻngilochar madaniy-maʼrifiy tadbirlar tashkil etish, nogironligi bor shaxslarning salomatliklarini mustahkamlash maqsadida ularni tibbiy reabilitatsiya bilan qamrab olish, kam taʼminlangan oilalarni qoʻllab-quvvatlash choralarini koʻrish kabi muammolarga yechim topish maqsadida uyma-uy kirib boraveradi.

Natijada yil boshidan beri 4 nafar oʻzgalar parvarishiga muhtoj boʻlgan fuqarolarga qarab turish uchun assistentlar biriktirildi. 8 nafar nogironligi boʻlgan fuqarolarga statsionar sharoitda davolanishlari uchun koʻmaklashildi. 15 nafar tazyiq va zoʻravonlikka uchragan ayol-qizlarga zarur psixologik va huquqiy yordamlar koʻrsatildi. 171 nafar fuqaroga esa kommunal toʻlovlari uchun bir martalik moddiy yordam ajratilib, ularning bu boradagi muammolari ijobiy hal etildi.

Kambagʻallik reyestriga kiritilgan Toʻlgʻonoy Otajonova, Sohiba Oʻrozimbetovalarga issiq kiyim-kechaklar olishlari uchun "Saxovat va koʻmak" jamgʻarmasi hisobidan vaucherlar taqdim etildi. Shuningdek, Fotima Gulmonovaning murojaati oʻrganilib, uning 1-guruh nogironi boʻlgan umr yoʻldoshi Hayitboy Jumaniyozovga xonaga moʻljallangan maxsus oʻrindiqli nogironlik aravachasi bilan bir martalik moddiy yordam koʻrsatildi.

Mavluda Qalandarovaning fidoyiligi toshyoplik ehtiyojmand oilalar hayotida oʻz aksini topmoqda. Muhimi, u qishloq aholisiga kompleks ijtimoiy xizmat koʻrsatish orqali ularning ishonchini qozonmoqda. Xalq ishonchiga munosib mehnat qilish esa nafaqat elparvarlik, balki vatanparvarlikdir.

ROBIYa YOʻLDOShEVA.