“Inson” ijtimoiy xizmatlar markazi tomonidan kouching-seminari oʻtkazildi

Amudaryo tumani “Inson” ijtimoiy xizmatlar markazi tomonidan Qilichboy ovul fuqarolar yigʻini binosida Qilichboy hududidagi faollar ishtirokida “Inson – insonga yordamchi” mavzusida kouching-seminari tashkil etildi. Unda Qilichboy hududidagi barcha ovul va mahalla fuqarolar yigʻinlari massʼullari, aholi vakillari hamda “Inson” ijtimoiy xizmatlar markazi yetakchi mutaxassislari, ovul va mahallalarda faoliyat olib boruvchi kompleks xizmat koʻrsatuvchi ijtimoiy xodimlar ishtirok etdilar.

Ushbu kouching-seminarini oʻtkazishdan maqsad – ijtimoiy himoya tizimida amalga oshirilayotgan ishlar haqida keng jamoatchilikka maʼlumot berish, fuqarolarning huquqiy bilimini oshirish hamda muammolarni birgalikda hal etishdan iboratdir.

Maʼlumki, soʻnggi yillarda davlatimiz rahbari tashabbusi bilan mamlakatimizda aholini ijtimoiy jihatdan himoya qilishni yanada kuchaytirish, ijtimoiy xizmat turlarini koʻpaytirish va sifatini oshirish boʻyicha yangi tizim yaratildi. Bu yangi tizim oʻz navbatida mahallalardagi “Yettilik”ning aholi muammolarini oʻrganish va fuqarolarga kompleks xizmatlar hamda yordamlar koʻrsatish imkoniyatlarini yanada kengaytirdi.

Mahallalarda har bir yoʻnalishga alohida eʼtibor qaratilgan boʻlib, ayniqsa, aholining ijtimoiy himoyaga muhtoj qatlamini aniqlash hamda ularning muammolarini samarali hal etish boʻyicha masʼul xodimlar tomonidan amaliy ishlar yoʻlga qoʻyildi. 2024-yil aprel oyidan eʼtiboran mahallalarda ijtimoiy xodim lavozimi taʼsis etildi. Ushbu xodimlar tomonidan mahallalardagi 12 toifa aholi qatlamlariga 104 turdagi ijtimoiy xizmatlar va yordamlar koʻrsatilib kelinmoqda.

Kouching dasturi davomida Amudaryo tumani “Inson” ijtimoiy xizmatlar markazi xodimlari tomonidan faollarga tegishli tushuntirishlar berildi. Jumladan, aholiga koʻrsatiladigan ijtimoiy xizmatlar va yordamlar, shuningdek, “Saxovat va koʻmak” jamgʻarmasidan koʻrsatiladigan yordamlar haqida markazning mahallada ijtimoiy xizmat tashkil etish shoʻbasi mudiri Baxriddin Toʻrabayev batafsil tushuncha va maʼlumotlar berdi.

Shundan soʻng, Oʻzbekiston Respublikasi Vazirlar Mahkamasining 2021-yil 21-oktabrdagi “Aholini ijtimoiy himoya qilish tizimini yanada takomillashtirish chora-tadbirlari toʻgʻrisida”gi Qarori ijrosini taʼminlash yuzasidan Amudaryo tumanida amalga oshirilayotgan ishlar boʻyicha markazning ijtimoiy toʻlovlar shoʻbasi mudiri Sirojiddin Jumaboyev tadbir ishtirokchilariga zarur tushunchalar taqdim etdi.

Tadbir davomida Oʻzbekiston Respublikasi Vazirlar Mahkamasining 2024-yil 30-apreldagi “Muhtoj shaxslarni protez-ortopediya vositalari va reabilitatsiya qilishning texnik vositalari bilan taʼminlash tartibi toʻgʻrisida”gi Qarori va nogironlikni belgilash tizimining raqamlashtirilishi boʻyicha markazning nogironligi boʻlgan shaxslar bilan ishlash shoʻʼbasi mudiri Murodjon Boltayevning maʼruzasi tinglandi.

Bundan tashqari, qizgʻin savol-javoblar bilan davom etgan tadbirda “Vasiylik va homiylik toʻgʻrisida”gi masala yuzasidan markazning Bolalarni ijtimoiy himoya qilish shoʻʼbasi mudiri Jahongir Xolmurodov ham ishtirokchilarga keng tushunchalar berib, ularni qiziqtirgan savollar yuzasidan qimmatli maʼlumotlar ham taqdim etdi.

Kouching tadbirida Oʻzbekiston Respublikasi Vazirlar Mahkamasining 2025-yil 18-iyundagi “Oʻzgalar parvarishiga muhtoj shaxslarga vaucher asosida yangi ijtimoiy xizmatlardan foydalanish tartibini joriy etish chora-tadbirlari toʻgʻrisida”gi Qarori va undan kelib chiqadigan vazifalar mazmun-mohiyati xususida markazning katta yoshdagilar va ogʻir ijtimoiy vaziyatga tushib qolgan oilalar bilan ishlash shoʻʼbasi mudiri Joʻrabek Shermetov, Markaz psixologi Yulduz Sultanova hamda markazning huquqiy masalalar boʻyicha ekspert maslahatchisi Ergashali Bobojonovlar soʻzga chiqib, ogʻir ijtimoiy vaziyatga tushib qolgan shaxslar hamda psixolog va huquqiy masalalar boʻyicha maslahat va yordamga muhtoj fuqarolarni ijtimoiy qoʻllab-quvvatlash boʻyicha amalga oshirilishi lozim boʻlgan vazifalar yuzasidan oʻz fikrlarini bildirdilar.

Kouching-seminari soʻngida faollar tomonidan berilgan savollarga markaz xodimlari tomonidan toʻliq javoblar berildi va mazkur tadbirda faol qatnashgan ishtirokchilarga Markaz tomonidan esdalik sovgʻalari topshirildi.

Mazkur Kouching-seminari ijtimoiy himoya boʻyicha Qilichboy hududidagi ovul va mahallalar aholisining huquqiy savodxonligini, shu bilan birga ushbu yoʻnalishda amalga oshirilayotgan ishlar boʻyicha xabardorligini oshirishda muhim ahamiyat kasb etdi.