“GIYoHVANDLIK — ILLAT, UNGA QARShI KURAShISh HAR BIR INSONNING BURChI” MAVZUSIDA SEMINAR TAShKIL ETILDI

Giyohvandlik — asr vabosi. Bu illat insonni nafaqat aqlan va ruhan yemiradi, balki vaqtida aniqlanib, unga qarshi keskin kurash choralari qoʻllanilmasa, giyohvandlik odamni jisman yoʻq qiladi, yaʼni oʻlimga olib keladi. Shu bois, bu illatga qarshi kurash butun dunyoda global tus olgan va dunyo davlatlari siyosatida ustuvorlik kasb etgan. Bu borada mamlakatimizda ham aholini giyohvandlik balosidan asrash, ularning tinchligi va osoyishtaligini taʼminlashga qaratilgan keng qamrovli ishlar amalga oshirilmoqda. Amudaryo tumani Madaniyat boʻlimi binosida oʻtkazilgan “Giyohvandlik — illat, unga qarshi kurashish har bir insonning burchi” mavzusidagi seminar ham bu boradagi amaliy ishlarga misoldir.

Tadbir Amudaryo tumani hokimi oʻrinbosari Nodirbek Kamolov tomonidan ochildi va olib borildi. Seminarda Amudaryo tumani Ichki ishlar boʻlimi boshligʻi Temurbek Doshumbayev, tuman prokurori oʻrinbosari Omirbay Xudaybergenov hamda tuman mahallalarida istiqomat qiluvchi yoshlar, taʼlim-tarbiya va jamoat faollari ishtirok etdilar.

Seminar avvalida masʼullar yurtimizda jamoat xavfsizligini mustahkamlash va fuqarolarning huquqlarini himoya qilish maqsadida olib borilayotgan islohotlarga toʻxtaldilar. Alohida taʼkidlanganidek, joriy yilning 3-noyabr sanasida Prezidentimiz tomonidan qabul qilingan “Aholi salomatligi va millat genofondini giyohvandlik va narkojinoyatlardan samarali himoya qilish boʻyicha kompleks chora-tadbirlar toʻgʻrisida”gi muhim Farmon kuchga kirdi. Mazkur Farmon bilan giyohvandlik va narkojinoyatlarning barvaqt oldini olishga masʼul davlat organlarining ustuvor vazifalari belgilab berilgan.

Farmonda taʼlim muassasalarida, oʻquvchi va talabalar orasida psixofaol moddalarning tarqalishiga batamom chek qoʻyish, yoshlarda giyohvandlik illatiga murosasiz munosabatni shakllantirish, noqonuniy aylanmaga qatʼiy jinoiy-huquqiy mexanizmlar orqali barham berish va jazo choralarini keskin kuchaytirish, shuningdek, yoshlarga nisbatan sodir etiladigan narkojinoyatlar uchun javobgarlikni ogʻirlashtirish koʻzda tutilgan.

Seminarda soʻzga chiqqan Amudaryo tumani prokurorining oʻrinbosari Omirbay Xudaybergenov tumanda jinoyatchilikning barvaqt oldini olish maqsadida amalga oshirilayotgan chora-tadbirlarga eʼtibor qaratdi. Uning taʼkidlashicha, joriy yilning oʻtgan 10 oyi davomida giyohvandlik vositalari bilan bogʻliq 2 ta holat aniqlanib, jinoyat ishi qoʻzgʻatilgan.

Tuman Ichki ishlar boʻlimi boshligʻi Temurbek Doshumbayev esa giyohvandlik va narkojinoyatlarga qarshi kurashish boʻyicha 2024-2028-yillarga moʻljallangan milliy strategiya ijrosi yuzasidan IIB tomonidan amalga oshirilgan ishlar va tezkor tadbirlar natijalari haqida maʼlumotlar taqdim etdi.

Taʼkidlanganidek, 2025-yil 29-noyabr kuni olib borilgan “Tun” tezkor-tadbiri davomida tuman mahallalaridan birida yashovchi fuqaroning uyining qozonxonasidan “marixuana” giyohvandlik moddasi va urugʻlari, shuningdek, hech qanday hujjati boʻlmagan 1 dona pnevmatik qurol hamda 13 dona 12 kalibrli ov qurollari aniqlanib, hujjatlashtirilgan.

Yana bir fuqaroning giyohvand modda isteʼmol qilib yurganligi haqidagi murojaat boʻyicha tezkor tadbir oʻtkazilib, ushbu shaxs tibbiy ekspertiza xulosalariga koʻra Oʻzbekiston Respublikasi Jinoyat kodeksining tegishli moddalari asosida jinoiy javobgarlikka tortilgan.

Seminar davomida taʼlim-tarbiya sohasi va jamoat faollari hamda yoshlar giyohvandlikka qarshi kurashish nafaqat huquqni muhofaza qilish organlari xodimlari, balki har bir fuqaroning zimmasidagi burchi ekanligi xususida oʻz fikr-mulohazalarini bildirdilar.

Seminar yakunida ishtirokchilar uchun tuman Madaniyat boʻlimi sanʼatkorlari tomonidan tayyorlangan kontsert dasturi namoyish etildi.