BOʻZYoPLIKLARGA YaXShILIK ULAShAYoTGAN IJTIMOIY XODIM

Amudaryo tumanining Boʻzyop ovulida 1071 ta xonadonni qamrab olgan 1707 ta oilada salkam 5800 nafarga yaqin turli millatga mansub aholi istiqomat qiladi. Boʻzyopliklar uchun bir-birining muammolariga yelka tutish va oʻzaro yordam koʻrsatish azaliy qadriyat hisoblanadi. Aynan mana shunday hamjihatlik muhiti tufayli kompleks ijtimoiy xizmat koʻrsatuvchi xodim sifatida oʻz faoliyatini boshlagan Shodurdi Shamanov ovul aholisi bilan qisqa vaqt ichida yaqin munosabat oʻrnatdi va samarali faoliyat olib bormoqda.

Uning ovul fuqarolar yigʻini “Mahalla yettiligi” aʼzolari bilan hamkorlikdagi saʼy-harakatlari natijasida 12 toifadagi fuqarolarning roʻyxati shakllantirilib, ularga 100 dan ortiq ijtimoiy xizmat koʻrsatish yoʻlga qoʻyildi.

Ijtimoiy xodim eng avvalo ovuldagi oʻzgalar parvarishiga muhtoj, yolgʻiz keksalar va nogironligi boʻlgan shaxslar toifasi boʻyicha roʻyxatga olingan fuqarolarni ijtimoiy qoʻllab-quvvatlash choralarini koʻrdi. Aynan shu toifadagi 6 nafar fuqaroning uylariga borib oʻrganilgach, ularga assistent biriktirilib, namunali ijtimoiy xizmat koʻrsatish yoʻlga qoʻyildi.

Uning tashabbusi bilan ovul hududidagi 124 nafar nogironligi boʻlgan shaxslar va bolalarga ijtimoiy himoya choralari qoʻllanilib, ularga maʼlum maʼnoda hayotga joʻshqin nazar bilan qarashlariga imkon beruvchi ijtimoiy xizmat va yordamlar koʻrsatib kelinmoqda. Xususan, joriy yilning oʻtgan davri mobaynida 12 nafar nogironligi boʻlgan shaxsga protez-ortopediya moslamalari va reabilitatsiya texnik vositalari olib berildi. 13 nafar nogironligi boʻlgan shaxslar oʻz imkoniyatlariga yarasha barqaror daromadli ish bilan taʼminlandilar. 4 nafar nogironligi boʻlgan shaxsga “Saxovat va koʻmak” jamgʻarmasi hisobidan davolanib, salomatligini tiklashlari uchun yordam koʻrsatildi. 3 nafar fuqaro esa adaptiv sportga jalb etildi.

Ota-onalari chet davlatlarda, mehnat muhojirligida boʻlgan va yaqin qarindoshlari tomonidan vasiylik va homiylikka olingan 2 nafar bolani parvarishlayotgan oila va ularning taʼlim-tarbiyasi ijtimoiy xodim tomonidan doimiy nazoratga olingan.

Ovuldagi kam taʼminlanganlar toifasiga kiritilgan 78 ta oila doimiy eʼtiborda. Mazkur oilalarning barchasiga moddiy yordam va bolalar nafaqasi tayinlangan. Kambagʻallik reyestriga kiritilgan 50 ta oilani esa kambagʻallikdan chiqarish borasida ovulda faoliyat olib boruvchi hokim yordamchisi bilan hamkorlikda zarur choralar koʻrilmoqda.

Ijtimoiy xodimning samarali faoliyati natijasida 139 ta ehtiyojmand oilalarga kuz-qish mavsumi uchun bir martalik moddiy yordam ajratildi. 9 ta kam taʼminlangan oilaning farzandlari maktabgacha taʼlim tashkilotlariga imtiyozli ravishda joylashtirildi.

Shodurdi Shamanovning ish faoliyatida tazyiq va zoʻravonlikka uchragan ayol-qizlarni qoʻllab-quvvatlash masalasi ham muhim oʻrin tutadi. Joriy yil davomida tazyiq va zoʻravonlik holatlari tufayli 4 nafar ayol-qizga himoya orderlari rasmiylashtirilib, ularning xavfsizligi taʼminlandi. Belgilangan tartib-qoida asosida soʻrovnoma oʻtkazilib, ularga huquqiy va psixologik yordamlar koʻrsatildi.

Bugungi kunda oʻz xizmat faoliyati bilan boʻzyopliklarning eng yaqin va ishonchli davlat xizmatchisiga aylangan Shodurdi Shamanovning har bir ish kuni unga ishongan hamqishloqlari hayotiga doir muammolarni hal etish, ularning ijtimoiylashuviga koʻmaklashish, qalblarida hayotsevarlik tuygʻularini uygʻotish, yaxshilik ulashishga qaratilgan xayrli tadbirlar bilan oʻtadi. Zero, insonlarga yaxshilik ulashish zulmatga nur bagʻishlash bilan barobardir.

ROBIYa YOʻLDOShEVA.