Gaz taʼminoti barqarorligi — turmush farovonligining muhim omilidir

Aholi farovonligini taʼminlashda energetika tizimining barqarorligi muhim ahamiyat kasb etadi. Zero, xonadonlardagi fayz va baraka, avvalo, uyimizdagi issiqlik va yorugʻlik bilan bevosita bogʻliqdir. Ayni shu maqsad yoʻlida "Hududgaz Qoraqalpogʻiston" gaz taʼminoti filialining "Amudaryotumangaz" boʻlimi tomonidan tizimli va izchil ishlar amalga oshirilmoqda.

Xususan, Amudaryo tumanida tabiiy gaz yetib bormagan hududlarni suyultirilgan gaz bilan taʼminlash masalasi alohida nazoratga olingan boʻlib, bu jarayonda har bir isteʼmolchining manfaati va xavfsizligi bosh mezon etib belgilangan.

Bugungi kunda tuman boʻyicha suyultirilgan gaz isteʼmolchilarining umumiy soni 25 ming 933 tani tashkil etmoqda. Ularning asosiy qismi, yaʼni 25 ming 893 tasi aholi xonadonlaridir. Bu koʻrsatkich tuman aholisining salmoqli qismi aynan mana shu turdagi yoqilgʻi turiga ehtiyoj sezishini va tizimning masʼuliyati nechogʻlik yuqori ekanligini koʻrsatadi.

Geografik jihatdan keng hududni qamrab olgan Amudaryo tumanida gaz taʼminotining logistikasi va infratuzilmasi ham zamon talablariga mos ravishda shakllantirilgan. Ayni paytda tuman boʻyicha jami 38 ta ovul va mahalla toʻliq suyultirilgan gaz isteʼmoliga moslashtirilgan. Ushbu mahallalarda istiqomat qiluvchi fuqarolarga qulaylik yaratish, gaz ballonlarini oʻz vaqtida va sifatli yetkazib berish maqsadida maxsus tizim yoʻlga qoʻyilgan. Xususan, tuman hududida 1 ta ixtisoslashtirilgan servis markazi hamda 7 ta tarqatish shaxobchasi faoliyat yuritmoqda. Mazkur maskanlar orqali suyultirilgan gaz isteʼmolchilarga belgilangan grafiklar asosida, tartibli ravishda yetkazib berilmoqda.

Nafaqat suyultirilgan, balki tabiiy gaz bilan isteʼmolchilarni uzluksiz taʼminlash masalasi ham soha xodimlarining diqqat markazida. Tahlillar shuni koʻrsatdiki, 2024 va 2025-yillarda kelib tushgan murojaatlarning asosiy qismi aynan tabiiy gaz bosimining pastligi bilan bogʻliq boʻlgan. Isteʼmolchilarning haqli eʼtirozlarini inobatga olgan holda, "Hududgaz Qoraqalpogʻiston" gaz taʼminoti filiali tomonidan maxsus reja ishlab chiqildi va tumanda keng koʻlamli modernizatsiya ishlari boshlab yuborildi.

2024-yilning oʻzida jami 8,3 kilometr uzunlikdagi gaz quvurlari yangidan rekonstruktsiya qilindi. Ushbu jarayonda tumanning Chordara, Navoiy, Boʻston va Oybek nomli mahallalari hamda Oʻrta qalʼa ovuli hududlarida gaz quvurlari halqasimon tarzda yangidan montaj qilindi. Ushbu murakkab muhandislik yechimi aholi va ulgurji isteʼmolchilarga tabiiy gazni hech qanday uzilishlarsiz va bir maromda yetkazib berish imkonini yaratdi. Endilikda mazkur hududlarda qishning eng sovuq kunlarida ham gaz bosimining barqarorligi taʼminlanmoqda, bu esa yuzlab oilalarning mushkulini oson qildi.

Ishlar koʻlami joriy yilda ham susaytirilmagan holda davom ettirilmoqda. Belgilangan istiqbolli rejaga muvofiq, isteʼmolchilarga tayubiiy gazni yoʻqotishlarsiz va uzluksiz yetkazib berish maqsadida Beruniy mahallasida 1,2 kilometr uzunlikdagi yangi oʻrta bosimli gaz quvuri montaj qilindi. Shuningdek, Tosh yop mahallasida yillar davomida yigʻilib qolgan muammolarga chek qoʻyilib, 14,2 kilometrlik qoʻshqator va tartibsiz holatga kelib qolgan gaz quvurlari toʻliq tartibga keltirildi. Nafaqat texnik sozlash, balki estetik tashqi koʻrinish va tashqi muhit taʼsiridan himoyani taʼminlash maqsadida quvurlarni boʻyash ishlari ham sifatli amalga oshirildi. Bu kabi tadbirlar tarmoqdagi texnik yoʻqotishlarni kamaytirish bilan birga, xavfsizlik choralarini kuchaytirishga xizmat qiladi.

Amalga oshirilayotgan mazkur saʼy-harakatlarning samaradorligini raqamlar va aniq faktlar misolida yaqqol koʻrish mumkin. Agar eʼtibor qaratadigan boʻlsak, fuqarolarning davlat organlariga boʻlgan ishonchi va murojaatlar bilan ishlash madaniyati yuksalayotgan bir davrda, muammolarning joyida hal etilishi murojaatlar sonining kamayishiga xizmat qilmoqda. Masalan, 2024-yil davomida Virtual qabulxona orqali jami 171 ta murojaat kelib tushgan boʻlsa, 2025-yilga kelib bu koʻrsatkich 53 tani tashkil etdi. Bu esa murojaatlar sonining sezilarli darajada, yaʼni 69 foizga kamayganidan dalolat beradi. Bunday ijobiy natija, oʻz-oʻzidan paydo boʻlgani yoʻq, balki tizimdagi kamchiliklarni oldindan tahlil qilish va ularni bartaraf etish yoʻlidagi qatʼiy qadamlar hosilasidir.

Joylarda oʻtkazilayotgan sayyor qabullarda aholi tomonidan bildirilayotgan eʼtirozlar imkon qadar shu joyning oʻzida bartaraf qilinmoqda. Gaz taʼminotini yaxshilash borasidagi ushbu amaliy ishlar shunchaki rasmiyatchilik uchun emas, balki xalqimizning roziligini olish yoʻlidagi muhim qadamdir. Tizimli yondashuv va aniq hisob-kitob asosida olib borilayotgan ishlar yaqin istiqbolda hududning energetik xavfsizligini yangi bosqichga olib chiqadi. Zero, soha xodimlarining tinimsiz mehnati va davlatimiz tomonidan yaratilayotgan imkoniyatlar bir maqsadga – har bir xonadonda zangori olov oʻchmasligiga, har bir yurtdoshimizning turmushi farovon boʻlishiga qaratilgan. Maqsad aniq, rejalar esa izchillik bilan hayotga tatbiq etilmoqda, demak, koʻzlangan natijalarga albatta erishiladi.

M.RAJAPOV, “Amudaryotumangaz” gaz taʼminoti boʻlimining nazorat va murojaatlar boʻyicha yetakchi mutaxassisi