Tuman prokurori Doʻrman va Qoramon mahallalarida boʻlib, aholining yashash sharoitlarini xonadonma-xonadon oʻrgandi

Mamlakatimizda davlat va xalq oʻrtasidagi muloqotni yangi bosqichga olib chiqish, aholining muammolarini bevosita joyida oʻrganib, ularga amaliy yechim topish maqsadida joriy etilgan “mahallabay” va “xonadonbay” ishlash tizimi oʻzining yaqqol hamda ijobiy samarasini bermoqda. Bugungi kunda barcha darajadagi rahbarlar, jumladan, huquq-tartibot idoralari masʼullari oʻz xizmat xonalaridan chiqib, joylarga tashrif buyurgan holda, oddiy aholining dardu tashvishlari bilan hamnafas boʻlmoqdalar. Ayniqsa, chekka hududlarda yashovchi fuqarolarning ijtimoiy himoyasini kuchaytirish, ularning yashash sharoitlarini yaxshilash va roziligiga erishish davlatimiz olib borayotgan ijtimoiy siyosatning eng ustuvor yoʻnalishlaridan biriga aylangan.

Amudaryo tumanining ijtimoiy-iqtisodiy rivojlanishiga munosib hissa qoʻshish, aholi osoyishtaligi va farovonligini taʼminlash maqsadida tuman prokurori Bahrom Masharipov bevosita oʻziga biriktirilgan hududlarda boʻlib, keng koʻlamli oʻrganish va tahlil ishlarini olib bordi. Xususan, tuman prokurori Doʻrman hamda Qoramon mahallalari hududlarida yashovchi oilalar holidan xabar oldi. Bu jarayonda rasmiyatchilikdan butunlay yiroq boʻlgan, samimiy, ishonchli va ochiq muloqot muhiti yaratildi.

Rahbarning xonadonma-xonadon yurib, mahalla oqsoqollari, xotin-qizlar va yoshlar vakillari bilan yuzma-yuz koʻrishishi nafaqat ularning kayfiyatiga ijobiy taʼsir koʻrsatdi, balki hududdagi real ijtimoiy manzarani toʻlaqonli his qilish imkonini ham berdi. Bahrom Masharipov har bir oilaning ijtimoiy ahvoli hamda yashash sharoitlari bilan yaqindan tanishib chiqdi. Ayniqsa, ehtiyojmand, boquvchisini yoʻqotgan hamda qoʻllab-quvvatlashga muhtoj oilalarning turmush tarziga, ularning sogʻligʻi va bandligi masalalariga alohida eʼtibor qaratildi. Odamlarning kundalik turmushida duch kelayotgan qiyinchiliklari rahbar tomonidan diqqat bilan tinglandi.

Oʻrganishlar jarayonida muammolarni shunchaki qayd etish bilan cheklanilmadi, balki ularni ijobiy hal etish yuzasidan joyida zarur va kechiktirib boʻlmaydigan choralar koʻrildi. Vaqt va qoʻshimcha mablagʻ talab etadigan masalalar boʻyicha tegishli tashkilotlarga koʻrsatmalar berilib, ijrosi prokuratura nazoratga olindi.

Qolaversa, mahallalarda tinchlikni mustahkamlash, jinoyatchilik va turli huquqbuzarliklarning barvaqt oldini olish, oilaviy nizolarga yoʻl qoʻymaslik maqsadida aholi bilan keng qamrovli profilaktik suhbatlar oʻtkazildi.

Tadbir davomida hududda yangi qurilgan binolarda fuqarolar uchun yaratilgan mavjud turli xil imkoniyatlar boʻyicha maxsus tayyorlangan prezentatsiya loyihalari ishlab chiqilib, aholiga koʻrgazmali tarzda tanishtirildi. Ushbu taqdimotlar orqali mahalla ahli yangi infratuzilma obʼektlaridan, xizmat koʻrsatish majmualaridan qanday qilib unumli foydalanishi mumkinligi haqida toʻliq tushunchaga ega boʻldi.

Maʼlumki, yurtimizda tinchlik va xavfsizlikni taʼminlash masalasi davlat siyosatining eng ustuvor maqsadlaridan biri sanaladi. Shu boisdan, Oʻzbekiston Respublikasi Prezidentining “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi qarori qabul qilingan boʻlib, ushbu muhim hujjat joylarda xavfsizlikni taʼminlashning mutlaqo yangi mexanizmlarini belgilab berdi.

Amudaryo tumani prokurori boshchiligida oʻtkazilgan oʻrganishlar davomida aynan mana shu qaror ijrosi ham nazoratga olindi. Har bir koʻchadagi vaziyat tahlil qilinib, “xavfsiz mahalla” kontseptsiyasini toʻlaqonli hayotga tatbiq etish vazifalari belgilab olindi.

Amudaryo tumanida huquqni muhofaza qiluvchi idoralar tomonidan amalga oshirilayotgan bu kabi ishlar zamirida faqat bitta maqsad – inson qadrini ulugʻlash, uning haq-huquqlarini himoya qilish gʻoyasi yotibdi. Prokurorning bevosita xonadonlarga kirib borishi davlat idoralarining xalqqa qanchalik yaqinlashganining yana bir amaliy isbotidir. Mahallalarda yaratilayotgan bunday sogʻlom va xavfsiz muhit, aholi bilan oʻtkazilayotgan ochiq muloqotlar yaqin kelajakda albatta oʻz mevasini beradi va odamlarning ertangi kunga boʻlgan ishonchini yanada mustahkamlaydi.