TUMANDAGI BOSh VAZIR QABULXONASI TADBIRKORLAR KOʻMAKChISIGA AYLANDI

Oʻzbekiston Respublikasi Bosh vazirining Amudaryo tumanidagi Tadbirkorlar murojaatlarini koʻrib chiqish qabulxonasi tomonidan tegishli ishchi guruh, shtab, vakolatli organlar vakillari hamkorligida tadbirkorlarga ularni qiynayotgan, faoliyatiga toʻsiq boʻlayotgan muammolarni bartaraf etishda yaqindan koʻmak berilmoqda. Qabulxona huzuridagi faol tadbirkorlar, huquqshunoslar va tadbirkorlarning boshqa vakillaridan iborat Tadbirkorlar jamoatchilik kengashi bilan ham bu borada muntazam ravishda tegishli chora-tadbirlar amalga oshirilmoqda.

Taʼkidlash joizki, oʻtgan 2020-yil davomida qabulxona tomonidan hududlarda 42 ta sayyor qabullar tashkil etildi. Olib borilgan targʻibot-tashviqot ishlari hamda oʻtkazilgan suhbatlar davomida qabulxonada jami 326 ta masalalar boʻyicha 313 ta murojaatlar roʻyxatga olindi. Kelib tushgan murojaatlarning 10 tasi Respublika miqyosidagi, 102 tasi Qoraqalpogʻiston Respublikasi miqiyosidagi, 201 tasi tuman miqyosidagi murojaatlar boʻlib, murojaatlarning 71 tasi oʻtkazilgan sayyor qabullar orqali, 98 tasi bevosita qabulxonaga murojaat qilish orqali, 139 tasi “Ishonch telefoni” orqali, 5 tasi maxsus portal orqali elektron tarzda kelib tushgan.

Murojaatlar asosan kredit ajratish masalasida boʻlib, ushbu masala boʻyicha 104 ta murojaat qabul qilindi. Shuningdek, yer, kadastr va arxitektura qurilish masalalari boʻyicha 58 ta murojaat qabul qilingan boʻlib, ularda asosan yer resurslari va davlat kadastri masalasi,  fermerlik yer masalalari, bino-inoshootlar ajratish masalalari boʻyicha koʻmak berish soʻralgan. Undan tashqari, infratuzilma masalalari boʻyicha 20 ta, boshqa masalalar boʻyicha esa 144 ta murojaat qabul qilindi. Roʻyxatga olingan 313 ta murojaatdan 251 tasi qanoatlantirildi. Qolgan 72 tasiga tushuntirishlar berilib, 3 ta murojaat rad etildi.

Oʻtgan yil davomida tadbirkorlarning murojaatlari koʻrib chiqilishi mobaynida muddat buzilishi, yuzaki koʻrib chiqish holatlariga yoʻl qoʻygan korxona-tashkilot rahbarlariga ushbu kamchiliklarni bartaraf etish yuzasidan 7 ta taqdimnoma xatlari kiritilib, 4 nafar xodimga nisbatan intizomiy taʼsir choralari koʻrildi.

Qabulxonaga 2020-yil 8-iyul kuni Tosh yop ovulida yashovchi Davlatboy Jumaniyazovning tomorqasidagi issiqxonasini kengaytirish maqsadida “Har bir oila – tadbirkor” dasturi boʻyicha 30 mln. soʻm kredit ajratilishida amaliy yordam soʻrab qilgan murojaati atroflicha oʻrganib chiqildi. Shundan soʻng, Xalq bankining tuman filiali koʻmagida ushbu masalani hal etishga eʼtibor qaratilgani natijasida tadbirkor kredit mablagʻi evaziga tomorqasidagi 7 sotix yer maydoniga issiqxona tashkil qildi. Hozirgi kunda qoʻshimcha daromad manbaiga ega boʻlgan tadbirkor oila aʼzolari bilan birgalikda issiqxonada ikkinchi ekish mavsumiga tayyorgarlik koʻrishmoqda.

2020-yil 19-oktyabr kuni "Sarviniso-Mavjuda" masʼuliyati cheklangan jamiyati rahbari Kenjaboy Rajabov ham ruxsatnoma, litsenziya va boshqa hujjatlarni rasmiylashtirishda hamda bankdan kredit ajratilishida amaliy yordam soʻrab Qabulxonaga murojaat qildi. Ushbu murojaat ham atroflicha oʻrganib chiqildi va hal etilishiga yaqindan yordam koʻrsatildi. Korxonasida yangidan uchta ish oʻrnini yaratib, 3 nafar fuqaro ish bilan taʼminlandi.

Qabulxona huzurida tashkil etilgan faol tadbirkorlar, huquqshunoslar va tadbirkorlarning boshqa vakillaridan iborat Jamoatchilik Kengashi tomonidan kichik biznes va tadbirkorlikni rivojlantirishga toʻsiq va gʻov boʻlayotgan muammolar oʻrganilib borilmoqda. Oʻtgan yil mobaynida Kengash tomonidan 12-marta yigʻilish oʻtkazilib, aniqlangan muammolarni bartaraf etish boʻyicha Kichik biznes va tadbirkorlikni rivojlantirish agentligiga 17 ta takliflar kiritildi.

Qabulxonaning amaliy yordami tufayli, elimiz farovonligiga hissa qoʻshayotgan tadbirkorlar soni koʻpaymoqda. Tadbirkorlarning haq-huquqlarini himoya qilishda, muammolariga yechim topishda Qabulxona tomonidan koʻrsatilayotgan qator amaliy yordam ishbilarmonlikni ragʻbatlantirishga, aholiga xizmatlar koʻrsatishni yaxshilashga muhim hissa boʻlib qoʻshilmoqda.

O. Xudoyberganova.