“AYoLLAR DAFTARI”GA KIRITILGAN AYoLLAR TURMUShI OʻRGANILDI

Mamlakatimizda Prezidentimiz Sh.Mirziyoyev rahbarligida barcha fuqarolar uchun obod va farovon turmush tarzi  shakllantirish, aholining oʻz hayotidan rozi boʻlib yashashiga  erishish uchun uzluksiz saʼy-harakatlar olib borilayapti. Shu maqsadda mahallalar kesimida ishsiz ayollar va yoshlar roʻyxatlari shakllantirilib, ularning har biri bilan yangicha tizim asosida manzilli ishlash uchun “Ayollar daftari” va “Yoshlar daftari” tashkil etildi.

2020-yilning oktyabr-dekabr oylarida tumanimizda “Ayollar daftari”ni shakllantirish uchun fuqarolarning oʻzini oʻzi boshqarish organlari tavsiyasiga koʻra 40082 nafar xotin-qizlar bilan muloqot oʻtkazildi va yakuniga koʻra, 1932 nafar ayollar mazkur daftarga kiritildi. Shularning 1364 nafari ijtimoiy himoyaga muhtoj, 173 nafari boquvchisini yoʻqotgan ehtiyojmand, 74 nafari 1 va 11 guruh nogironligi boʻlgan ayollar, 13 nafari esa uy-joyi taʼmirlashga muhtoj 1 guruh nogironligi boʻlgan, 19 nafari qaramogʻida 1 va 2 guruh nogironligi boʻlgan farzandlari bor ayollar, 92 nafari tibbiy himoyaga, 12 nafari huquqiy yordam olishga, 75 nafari esa psixologik maslahatga muhtoj ayollar ekanligi belgilab olingan edi.

Oʻtgan davr  mobaynida imtiyozli foizlarda ularning 201 nafariga kreditlar berilib, tadbirkorlik faoliyatini tashkil etishiga koʻmaklashildi, hunar oʻrganib ishlash istagini bildirgan ayollar kasb-hunarga oʻqitilib, tikuv mashinalari berildi. Shuningdek, oilasi tomorqasida ishlab, oilasiga daromad keltirish istagidagi 55 nafar ayollar qoʻllab-quvvatlanib, zarur yordamlar berildi. Boquvchisini yoʻqotgan ehtiyojmand 173 nafar ayollarga moddiy yordamlar berildi, 5 nafariga goʻzallik saloni tashkil etish uchun jihozlar berildi.

Shu yilning 19-mayida Qoraqalpogʻiston Respublikasi Mahalla va oilani qoʻllab-quvvatlash vaziri oʻrinbosari Maryam Ahmedova rahbarligida maʼsul tashkilotlar, vazirliklar vakillaridan tuzilgan ishchi guruh aʼzolari tumanimizda boʻlib, “Ayollar daftari”ga kiritilgan  ayol-qizlarga moddiy, tibbiy, psixologik va maʼnaviy yordam koʻrsatishning ahvoli bilan tanishdilar.

Masʼullar  tumanimiz hududlarida boʻlib, “Ayollar daftari”ga kiritilgan 73 nafar ayollar xonadonlarida boʻlib, ularning yashash sharoitlari, turmush tarzi, muammolari bilan tanishdi.

Boʻzyop ovuli hududidagi ehtiyojmand oilalar holidan xabar olgan Qoraqalpogʻiston Respublikasi Mahalla va oilani qoʻllab-quvvatlash vaziri oʻrinbosari Maryam Ahmedova ijtimoiy himoyaga muhtoj oilalarga 20 tadan tovuq tarqatdi.

Kun davomida uyma-uy yurib, aholi turmushi bilan tanishgan masʼullar tuman Mahalla va oilani qoʻllab-quvvatlash boʻlimiga yigʻildilar va boʻlim xodimlari, fuqarolarning oʻzini oʻzi boshqarish organlari raislari ishtirokida “Ayollar daftari”ga kiritilgan ayollarni qoʻllab-quvvatlash borasidagi ishlarni muhokama etdilar.

Shunisi eʼtiborliki, shu kungacha roʻyxatga olingan 1832 nafar xotin-qizlardan 370 nafarining ish bilan bandligi taʼminlanib, tadbirkorlik faoliyatini tashkil etib, doimiy daromad topishga erishayotgani, turmushi yaxshilangani tufayli xalq deputatlari tuman Kengashi qaroriga muvofiq ehtiyojmandlar daftaridan chiqarilgan. Shuningdek koʻrsatilgan yordamlar tufayli sogʻligʻi tiklangan, dunyoqarashi sogʻlomlashgan ayollar ham bor.

Yigʻilishda ijtimoiy, maʼnaviy moddiy yordamga muhtoj ayollarga yordam koʻrsatish, qoʻllab-quvvatlashda erishilayotgan yutuqlar qatorida ayrim kamchiliklarga ham yoʻl qoʻyilayotganligi taʼkidlab oʻtildi hamda bartaraf etish yuzasidan yoʻl-yoʻriqlar berildi.

O.RAJABOVA.