MAQSADIMIZ – EKIN MAYDONLARINI SUV BILAN UZLUKSIZ TAʼMINLASh

Qoraqalpogʻiston Respublikasi suv xoʻjaligi vazirligiga qarashli Amudaryo tuman Irrigatsiya boʻlimi tumandagi suv isteʼmolchilarini Gurlan, Qilichboy, Qipchoq-Basu vetkalari va daryoda joylashgan nasos stantsiyalari orqali suv bilan taʼminlaydi.

Suv bilan taʼminlash, suvdan foydalanishni nazorat qilish Amudaryoning chap qirgʻogʻidagi Shixjamol, Qilichboy, Tosh yop, Mangʻit, Qipchoq boʻlimlari, Amudaryoning oʻng qirgʻogʻidagi Nazarxon, Berdaq boʻlimlari tomonidan amalga oshiriladi.

Tumandagi 39463 gektar sugʻoriladigan yer maydonlarini suv bilan taʼminlashda tuman Irrigatsiya boʻlimida jami 135 nafar muhandis-texnik va ishchi-xodimlar faoliyat olib boradi.

Tuman Irrigatsiya boʻlimi hisobida 296,65 km. uzunlikdagi xoʻjaliklararo kanallar, 38 ta gidrotexnik inshoot, 135 ta gidropost, 153 ta suv chiqarish nuqtalari, 5 ta ekskavator, 3 ta buldozer va 6 ta zemnasoslar mavjud.

Joriy dehqonchilik yilida tumanimizdagi ekinzorlarni suv bilan muntazam taʼminlash maqsadida xoʻjaliklararo kanallarda 29,91 km. uzunlikda, ichki xoʻjalik kanallarda 167 km. uzunlikda tozalash-taʼmirlash ishlari olib borildi. Xoʻjaliklararo kanallardagi 4 ta gidrotexnik inshoot, 7 ta gidropost, ichki xoʻjalik kanallaridagi 101 ta gidrotexnik inshoot, 63 ta gidropost taʼmirlandi.

Tumanda  sugʻorish ishlarini muvofiqlashtirish, kechayu-kunduz monitoring yuritish uchun Irrigatsiya boʻlimi binosida tuman suv xoʻjaligi shtabi tashkil qilingan.

2021-yil hosili uchun ekilgan 15030 gektar gʻoʻza va boshqa qishloq xoʻjalik ekinlarini oʻz vaqtida suv bilan taʼminlash, fermer xoʻjaliklariga sugʻorish ishlarida amaliy yordam berish maqsadida jami 3248 nafar malakali suvchi ajratilib, ularga kerakli boʻlgan 3248 dona ish anjomlari, 3248 dona etik, 1624 dona fonarlar  yetkazib berildi.

Bundan tashqari, 2021-yil vegetatsiya davri uchun Qoraqalpogʻiston Respublikasi suv xoʻjaligi vazirligi tomonidan tumanimizga 273,2 mln. kubometr suv limiti ajratildi. 209,9 mln. kubometr suv isteʼmolchilarga oʻz vaqtida yetkazib berildi. Mazkur dehqonchilik yilida tuman boʻyicha 760 gektar paxta, 5360 gektar sholi, 23950 gektar maydonda tomorqa, 27219 gektar maydonlarda boshqa ekinlarni sugʻorish ishlari sifatli olib borilmoqda.

Oʻzbekiston Respublikasi Prezidentining 2020-yil 11-dekabrdagi Qarori asosida tuman boʻyicha 3730 gektar maydonda tomchilatib sugʻorish, 30 gektar maydonda yomgʻirlatib sugʻorish, 40 gektar maydonda diskret sugʻorish tizimini joriy qilish rejalashtirildi. 165 ta fermer va bitta klaster tashkiloti tomonidan 2746 gektar maydonda tomchilatib sugʻorish, 2 ta fermer xoʻjaliklari tomonidan 30 gektar maydonda yomgʻirlatib, 3 ta fermer xoʻjaligi tomonidan 40 gektar maydonda diskret sugʻorish tizimini joriy qilish boʻyicha quruvchi pudrat tashkilotlari bilan shartnomalar tuzildi. Shu kungacha 32 ta fermer xoʻjaligi va 1 ta klaster tashkilotiga 558,3 gektar maydon uchun  13,7 mlrd. soʻm kredit mablagʻlari ajratildi. 31 ta fermer xoʻjaligi va 1 ta klaster tashkilotida qurilish ishlari boshlanib, 22 ta fermer xoʻjaligi va 1 ta klaster tashkilotida 415,8 gektar maydonda sugʻorish agregatlarini payvandlash ishlari yakunlandi. 16 ta fermer xoʻjaligi va 1 ta klaster tashkilotida  308,8 gektar maydonda tomchilatib sugʻorish texnologiyasi  ishga tushirildi.

Maqsadimiz – tumanimiz qishloq xoʻjaligi sohasini rivojlantirishga, sohaga yangi texnologiyalarni keng joriy etish orqali yuqori unumli suv tejovchi qurilmalardan samarali foydalanish va qishloq xoʻjaligi mahsulotlari yetishtirishni yanada koʻpaytirishga koʻmaklashishdir.

Ergash YOʻLDOShEV, tuman Irrigatsiya boʻlimi boshligʻi v.v.b.