Xitoy ovulida sayyor qabul oʻtkazildi

Mamlakatimizda Prezidentimiz tashabbusi bilan aholi murojaatlari bilan ishlash borasida yangicha tizim yaratilib, joylarda insonlarni qiynab kelayotgan, oʻz yechimini kutayotgan muammolarga yechim topish borasida samarali chora-tadbirlar amalga oshirilmoqda. Joylarda, ayniqsa, chekka hududlarda mutasaddi rahbarlar tomonidan oʻtkazilayotgan sayyor qabullarda aholi murojaatlaridagi masalalarga yechim topilmoqda.

Joriy yilning 30-iyul sanasida Amudaryo tumani 3-sektor hududidagi Xitoy ovulida aholi muammolarini oʻrganish hamda ularni hal qilish maqsadida sayyor qabul oʻtkazildi. Sayyor qabulda tuman hokimi, 1-sektor rahbari Sultonboy Yoʻldashev, Oʻzbekiston Respublikasi Prezidentining tumandagi Xalq qabulxonasi mudiri Erkin Rajabov hamda barcha sektorlar rahbarlari, tuman hokimi oʻrinbosarlari, korxona-tashkilotlar masʼullari, shuningdek aholi vakillari ishtirok etdilar. Xitoy ovuli binosida oʻtkazilgan sayyor qabul jarayoniga 30 nafardan ortiq aholi vakillari yigʻilishdi.

Taʼkidlash kerakki, mamlakatimizda inson manfaatlari oliy qadriyat darajasiga koʻtarildi. Bugun barcha davlat idoralari faoliyatida aholining murojaatlari bilan ishlash boʻyicha sifat jihatidan mutlaqo yangi ishlar tashkil etilmoqda. Joylarda oʻtayotgan sayyor qabullar xalqning dardini eshitish, ularning muammolarini hal etishda, shak-shubhasiz, kutilgan natijalarni bermoqda. Zero, Davlatimiz rahbari taʼkidlaganidek, xalq davlat organlariga emas, balki davlat organlari xalqimizga xizmat qilishi kerak.

Shu tamoyil asosida Xitoy ovulida oʻtkazilgan sayyor qabulda Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni talablari asosida aholi murojaatlari qabul qilindi.

Aytish keraki, mazkur qonun bilan murojaatlar bilan ishlash tizimidagi barcha tartib-qoidalar belgilab berilgan. Jumladan, jismoniy va yuridik shaxslar davlat organlariga murojaat etish huquqiga egaligi, murojaat etish huquqi ixtiyoriy ravishda amalga oshirilishi, hech kim biron-bir murojaatni himoya qilishga yoxud unga qarshi qaratilgan harakatlarda ishtirok etishga majbur qilinishi mumkin emaslisi, mazkur huquqining amalga oshirilishi boshqa jismoniy va yuridik shaxslarning huquqlarini, erkinliklarini hamda qonuniy manfaatlarini, shuningdek jamiyat va davlat manfaatlarini buzmasligi kerakligi kabi asosiy qoidalar belgilangan.

Mazkur qonun talablari asosida tumanimizning Xitoy ovulida oʻtkazilgan sayyor qabulda aholi vakillari tomonidan 20 ga yaqin murojaatlar qabul qilindi. Murojaatlar asosan, bandligini taʼminlash, ijtimoiy va moddiy yordam berish, tadbirkorlik bilan shugʻullanish uchun kredit olishda, elektr taʼminotidagi muammolarni hal etishda, obodonlashtirish va ichki yullarni taʼmirlash masalalarida amaliy yordam berish mazmunida boʻldi.

Murojaatlarni hal etishda tegishli tashkilotlarga topshiriqlar berildi. Ayrim murojaatlar tushuntirish berish orqali shu yerning oʻzida hal etildi.

 Tuman hokimligining Axborot xizmati.