«Oʻzbekiston Respublikasi mustaqilligining 30 yilligi» esdalik nishoni oʻz egalariga topshirildi

Ayni kunlarda Yangi Oʻzbekiston tarixidagi buyuk va shonli sana – Vatanimiz mustaqilligining oʻttiz yillik bayramini xalqimiz katta shod-u xurramlik bilan nishonlamoqda.

Ulugʻ ayyom arafasida mamlakatimizni har tomonlama taraqqiy ettirish, uning jahon miqyosidagi shon-shuhratini oshirishga katta hissa qoʻshayotgan, davlatimiz iqtisodiyoti va aholi farovonligini yuksaltirishda ibrat va namuna boʻlib kelayotgan, jamiyatimizda tinchlik va barqarorlikni, millatlararo totuvlik va bagʻrikenglikni taʼminlash, yosh avlodni sogʻlom va barkamol insonlar etib voyaga etkazish, ularni vatanparvarlik, milliy va umuminsoniy qadriyatlarga hurmat ruhida tarbiyalashda alohida fidoyilik koʻrsatayotgan yurtdoshlarimizning mehnatlarini munosib ragʻbatlantirishga alohida eʼtibor qaratilmoqda.

Shu maqsadda imzolangan Oʻzbekiston Respublikasi Prezidentining «Oʻzbekiston Respublikasi mustaqilligining 30 yilligi» esdalik nishoni bilan mukofotlash toʻgʻrisida”gi farmoniga asosan mamlakat taraqqiyoti yoʻlida turli sohalarida fidokorona mehnat qilayotgan hamyurtlarimiz munosib ragʻbatlantirildilar.

28-avgust kuni Amudaryo tuman hokimligining majlislar zalida Mustaqilligimizning 30 yilligi bayrami tadbiri odidan tumanimizda turli sohalarda samarali faoliyat yuritayotgan 100 nafardan ortiq yurtdoshlarimizga «Oʻzbekiston Respublikasi mustaqilligining 30 yilligi» esdalik nishoni Oʻzbekiston Respublikasi Prezidenti nomidan tantanali ravishda topshirildi.

Marosimda tuman hokimi Sultonboy Yoʻldashev masʼuliyat va shijoat bilan xalqqa xizmat qilayotgan insonlarning el-yurt oldidagi xizmatlarini eʼtirof etish va munosib taqdirlash vatandoshlarimiz, ayniqsa, yoshlarimizni yuksak marralar sari ruhlantirish, ular qalbida Vatanga muhabbat va sadoqat tuygʻularini kuchaytirishda muhim ahamiyat kasb etishini taʼkidladi.

Shuningdek, mamlakatimizda yangi demokratik davlat, fuqarolik jamiyati barpo etish yoʻlida oʻtgan davrda amalga oshirilgan ulkan ishlar, erishilgan yuksak natijalarda, hech shubhasiz, hayotimizning turli soha va tarmoqlarida fidokorona mehnat qilayotgan yurtdoshlarimizning beqiyos hissasi borligini alohida qayd etdi.

Taʼkidlash kerakki, bugungi kunda tumanimizning har tomonlama rivojlanishi yoʻlida turli sohalarda samarali mehnat qilib, elimiz ravnaqiga salmoqli hissa qoʻshgan, halol mehnatlari bilan xalqimiz nazariga tushgan, fidoyi va jonkuyar yurtdoshlarimiz talaygina.

Ana shunday fidoyi, jonkuyar, mehnatsevar bir guruh hamyurtlarimizga «Oʻzbekiston Respublikasi mustaqilligining 30 yilligi» esdalik nishoni tuman hokimi Sultonboy Yoʻldashev tomonidan Oʻzbekiston Respublikasi Prezidenti nomidan tantanali ravishda topshirildi.

Tuman hokimi Sultonboy Yoʻldashev tantanali marosimda ushbu mukofotga munosib deb topilgan hamyurtlarimizni, ular orqali butun mehnat jamoalarini, oila aʼzolarini mukofot hamda Oʻzbekiston Respublikasi davlat mustaqilligining oʻttiz yillik bayrami bilan samimiy tabrikladi hamda kelgusida Vatan ravnaqi yoʻlidagi ishlarida muvaffaqiyat tiladi.

Tuman hokimligining Axborot xizmati.