Toshqalʼa mahallasi yoshlari yaratilayogan imkoniyatlardan unumli foydalanishmoqda

Maʼlumki, 2021-yil 12-dekabr kuni Oʻzbekiston Respublikasi Prezidentining “Oilaviy tadbirkorlikni rivojlantirish va aholining daromad manbaini kengaytirishga doir qoʻshimcha chora-tadbirlar toʻgʻrisida”gi qarori qabul qilingan edi. Ushbu qarorga muvofiq, 2022-yil davomida oilaviy tadbirkorlikni rivojlantirish dasturlari doirasida tadbirkorlik qilish istagidagi fuqarolarga yillik 14 foiz stavkada 3 oydan 6 oygacha imtiyozli davr bilan kredit ajratilishi belgilangan.

 Eʼtiborlisi, kreditlar 30 yoshgacha boʻlgan yoshlarga mahalladagi yoshlar yetakchisi tavsiyasi asosida berilsa, 30 yoshdan yuqori aholiga mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchisi tavsiyasi asosida beriladi.

Amudaryo tumanining Toshqalʼa mahallasiga biriktirilgan hokim yordamchisi Botir Norimbetov hamda mahalladagi yoshlar yetakchisi Izzat Qurbanbayevlar oʻzaro hamkorlikni yoʻlga qoʻyib, yoshlar bandligini taʼminlash boʻyicha samarali tarzda faoliyat olib borishmoqda.

Jumladan, hokim yordamchisi va yoshlar yetakchisi tomonidan xatlovlar oʻtkazilib, tadbirkorlik qilish istagidagi yoshlar aniqlandi. Xatlovlar jarayonida har bir yosh bilan suhbatlar oʻtkazilib, tadbirkorlik qilish istagidagi yoshlarga imtiyozli kreditlar ajratilishi va onlayn elektron auktsionda qatnashish shartlari tushuntirib borildi.

Yaratilayotgan qoʻlay imkoniyat va shart-sharoitlardan vaqtida foydalanish zarurligini yaxshi anglagan yoshlardan Muhayyo Eshboyeva, Iroda Rajabboyeva, Ogʻabek Yoʻldashev, Alisher Xoʻjaqov, Rahmatjon Kenjayev, Doniyor Qurolbayev, Ahmadjon Ortiqov, Sherali Ortiqovlar onlayn auktsionda qatnashib, gʻolib boʻlishdi hamda 25 sotxdan yer maydonlarini ijaraga olishdi.

Bundan tashqari, Goʻzal Soatbayeva, Ahmad Masharipov hamda Maftuna Omonbayevalarga 9 mln 800 ming soʻm miqdorda imtiyozli kreditlar ajratilib, ushbu imtiyozli kreditlar evaziga motokultivator olib berildi. Shuningdek, Quvonchbek Ibodullayevning ham murojaatlari inobatga olinib 33 mln soʻm miqdorda imtiyozli kredit ajratildi va yuk tashishga moʻljallangan mototsikl olib berildi.

Bugungi kunda yoshlar uchun yaratilayotgan imkoniyatlar koʻlami har qachongidan ham yuqori. Ayniqsa, soʻnggi yillar davomida imkoniyat va imtiyozlar koʻlami sezilarli darajada oshdi. Yoshlarga berilayotgan bu eʼtibor bugungi kunga kelib oʻz mevasini bermoqda. Oʻz biznesini yoʻlga qoʻyib, tadbirkorlik bilan shugʻullanayotgan yoshlar safi kun sayin ortmoqda. Bu esa oʻz navbatida xalqimiz farovonligi, yurt ravnaqiga puxta zamin yaratadi. Zero, aynan bugungi yoshlar ertangi kunimizning egalari, Uchinchi Renessansning bunyodkorlari boʻlishadi.

Tuman hokimligining Axborot xizmati