9-may− Xotira va qadrlash kuni keng nishonlandi

Maʼlumki, 1999-yil 9-may kuni Oʻzbekiston poytaxtida Xotira maydoni ochildi va ushbu kundan buyon 9-may− Xotira va qadrlash kuni sifatida nishonlanib kelinadi.

Ushbu bayram arafasida fashizm ustidan qozonilgan Gʻalabaga beqiyos hissa qoʻshgan, mana shu yorugʻ kunlarga yetib kelolmagan vatandoshlarimizning soʻnmas xotiralari yod etiladi. Qolaversa, jang maydonlarida mardlik, jasorat koʻrsatgan, front ortida fidokorona mehnat qilgan va bugun oramizda sogʻ-omon yurgan faxriylarimizga ehtirom koʻrsatiladi.

9-may– Xotira va qadrlash kuni munosabati bilan Mangʻit shahridagi Xotira maydonida ham tantanali tadbir oʻtkazildi. Tadbirda dastlab, Oʻzbekiston va Qoraqalpogʻiston Respublikalarining davlat madhiyalari yangradi.

Shundan soʻng tumanimizning isteʼdodli sanʼatkorlari tomonidan ijro etilgan ona Vatan va tinchlikni tarannum etuvchi kuy-qoʻshiqlar yigʻilganlar dilida oʻzgacha gʻurur va iftixor uygʻotdi.

Tadbirda tuman hokimi Sultonboy Yoʻldashev soʻzga chiqib, mamlakatimizda 9-may – Xotira va qadrlash kunini keng nishonlash, Ikkinchi jahon urushida halok boʻlgan ajdodlarimiz xotirasiga chuqur hurmat bajo keltirish, fashizmga qarshi janglarda, mehnat frontida jonbozlik koʻrsatgan faxriylarimizga eʼtibor va ehtirom koʻrsatish, yoshlarni maʼnaviy-axloqiy jihatdan tarbiyalashga hissa qoʻshayotgan faxriylarni eʼzozlash borasida qilinayotgan ishlar haqida toʻxtalib oʻtdi.

Taʼkidlanganidek, fashizm ustidan qozonilgan Gʻalabaga munosib hissa qoʻshgan har bir yurtdoshimizning xotirasi kelgusi avlodlarimiz qalbida mangu yashaydi. Oramizda boʻlgan urush va mehnat fronti faxriylari davlatimiz va jamiyatimizning doimo eʼzozida boʻlib, ularning insoniyatni fashizm balosidan qutqarish yoʻlida qilgan fidoiyliklari kelgusi avlodlarimiz uchun ibrat maktabidir.

Tadbirda tuman Mudofaa ishlari boʻlimi boshligʻi Sherzod Murodov yigʻilganlarni ushbu qutlugʻ ayyom bilan samimiy muborakbod etib, Ikkinchi jahon urushi yillarida mardonavor jang qilib, jonini fido qilgan yurtoshlarimiz hamda mustaqillik yillarida xizmat burchini bajarish chogʻida halok boʻlgan harbiy xizmatchilar va huquqni muhofaza qilish organlari xodimlarining xotirasi barchaning dilida manguga muhrlanganligini taʼkidladi.

Shundan soʻng, marhumlar ruhiga Qurʼon tilovat qilinib, Motamsaro ona haykali poyiga gulchambarlar qoʻyildi.

Mehmonlar Xotira maydonidagi ramziy kitob sahifalarini varaqlab, urushda shahid ketgan ajdodlarimizni xotirlashdi. Qonli janggohlardan omon qaytgan, mehnat frontida fidoyilik namunalarini koʻrsatib, xalq xoʻjaligining qayta tiklanishiga hissa qoʻshgan yurtdoshlarimiz nomlarini iftihor bilan tilga olishdi.

Xotira va Qadrlash kunini nishonlashdan koʻzlagan bosh maqsadi – Ikkinchi jahon urushida shahid ketgan bobolarimiz ruhini shod qilish, oramizdagi fidoyi insonlarga hurmat-ehtirom koʻrsatish, aholi, ayniqsa yoshlarni yurtimizda hukm surayotgan tinchlik va osoyishtalikni qadrlashga chorlashdir. Zero xotira hamisha muqaddas, inson qadr-qimmati aziz, tinchlik esa eng buyuk neʼmatdir!

Tuman hokimligining Axborot xizmati