Fuqarolar yigʻinlari raislari saylovini munosib tarzda oʻtkazishga bagʻishlangan seminar boʻlib oʻtdi

Mahalla raislari saylovi – mamlakatimiz ijtimoiy-siyosiy hayotidagi muhim voqelik sanaladi. Maʼlumki, 2022-yil 16-mart kuni boʻlib oʻtgan Oliy Majlis Senati Kengashining yigʻilishida fuqarolar yigʻinlari raislarining vakolat muddati tugashi munosabati bilan Oʻzbekiston Respublikasi Konstitutsiyasining 105-moddasi hamda “Fuqarolarning oʻzini oʻzi boshqarish organlari toʻgʻrisida”gi va “Fuqarolar yigʻini raisi (oqsoqoli) saylovi toʻgʻrisida”gi qonunlariga muvofiq saylov joriy yilning may oyida oʻtkazilishi belgilangan edi.

Ushbu qonun ijrosini taʼminlash maqsadida Amudaryo tumanida mavjud 49 ta ovul va mahalla fuqarolar yigʻinlarida saylovga puxta tayyorgarlik koʻrildi.

Fuqarolar yigʻinlari raislari saylovini demokratik tamoyillarga rioya qilgan holda munosib tarzda oʻtkazish maqsadida fuqarolar yigʻinlari raislari saylovini tashkil qilish va oʻtkazishga koʻmaklashuvchi tuman komissiyasi aʼzolari, hamda mahallalardagi ishchi guruhlar uchun oʻquv seminarlari oʻtkazilib kelinmoqda.

Shunday seminarlardan biri 10-may kuni tuman hokimligining katta majlislar zalida Qoraqolpogʻiston Respublikasi Vazirlar Kengashi raisining oʻrinbosari — Oila va xotin-qizlar qoʻmitasi boshligʻi, Qoraqalpogʻiston Respublikasi Joʻqorgʻi Kengesining fuqarolar yigʻinlari raislari saylovini tashkil etish va oʻtkazishga koʻmaklashuvchi komissiyasi aʼzosi Maryam Ahmedova hamda Berdaq nomidagi Qoraqalpoq davlat universiteti oʻqituvchisi Ilhom Matchanov boshchiligida boʻlib oʻtdi.

Seminarda dastlab saylov jarayonlarini qonun talablari asosida tashkil qilish va oʻtkazish boʻyicha dolzarb masalalar muhokama qilindi.

Shundan soʻng, tuman Adliya boʻlimi boshligʻi Moʻminjon Matyusupovning saylov jarayonlarini qonun talablari asosida oʻtkazish, fuqarolarning saylovda ishtirok etishga oid konstitutsiyaviy huquqlarini toʻliq roʻyobga chiqarish uchun zarur boʻlgan barcha tashkiliy-huquqiy shart-sharoitlarni yaratish boʻyicha tavsiyalari tinglandi.

Seminar davomida tuman hokimligining tashkiliy nazorat guruhi yetakchi mutahassisi Azat Almuratov ishchi guruh vakolatlari va majburiyatlari haqida batafsil maʼlumot berdi.

Taʼkidlanganidek, ishchi guruh saylovni tashkil etish va oʻtkazish masalalari yuzasidan aholi oʻrtasida tushuntirish ishlarini olib boradi. Saylov oʻtkaziladigan sana, vaqt va joyni belgilaydi. Hovlilar, uylar, koʻchalar aholisining fuqarolar vakillari saylovi boʻyicha umumiy yigʻilishlarini tashkil etadi va oʻtkazadi.

Seminar davomida fuqarolar yigʻinlari raislari saylovini tashkil etish va oʻtkazishga koʻmaklashuvchi tuman komissiyasi raisi Gʻulomjon Yeshniyozovning aholini saylovga jalb qilish hamda saylov jarayonlarini keng yoritish boʻyicha maʼruzasi tinglandi.

Shundan soʻng Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenbayevning saylovni oʻtkazish tartibi, ovoz berish shakli hamda yakuniy natijalarni chiqarish borasidagi maʼlumotlari tinglandi. Qayd etilganidek, ovoz berish jarayoni yashirin tarzda, maxsus kabinalarda amalga oshiriladi.

Shundan soʻng, seminar ishtirokchilari oʻzlarini qiziqtirgan savollar bilan masʼullarga murojaat qilib, tegishlicha javoblar oldilar.

Shu oʻrinda aytish kerakki, bu galgi saylovlar mamlakatimiz rivojlanishining yangi bosqichida, jumladan, mahalla instituti faoliyatining samaradorligini oshirish, uni jamoatchilik boshqaruvi va nazoratining tayanch omiliga aylantirish borasidagi muhim islohotlar davrida oʻtkazilayotgani va ushbu yilning ham “Inson qadrini ulugʻlash va faol mahalla yili” deb nomlangani mahallaning Vatan taraqqiyotida katta ahamiyatga ega ekanligini yaqqol namoyon qiladi.

Tuman hokimligining Axborot xizmati