FUQAROLAR TAShABBUSLI BYuDJET JARAYoNINING FAOL IShTIROKChISIGA AYLANMOQDA

Oʻzbekiston Respublikasi Prezidentining 2021-yil 22-sentyabrdagi “Ochiq byudjet” axborot portali orqali jamoatchilik fikri asosida shakllangan  tadbirlarni moliyalashtirishni yanada kengaytirish chora-tadbirlari toʻgʻrisida”gi Qarori fuqarolarni byudjet jarayoniga jalb qilish orqali ularni qiynab kelayotgan muammolarning yechimini topish va jamoatchilikni byudjet jarayonining ishtirokchisiga aylantirishda muhim ahamiyat kasb etmoqda.

Amudaryo tumanida ham oʻtkazilayotgan tashabbusli byudjetlashtirish jarayonida fuqarolar oʻz murojaatlari bilan faol ishtirok etishib, oʻzlari yashab turgan hududlardagi oʻrinli va dolzarb muammolarni qisqa muddatlarda bartaraf etish, davlat byudjeti mablagʻlarining maqsadli sarflanishini taʼminlashga, shu bilan birga hududlarni ijtimoiy-iqtisodiy rivojlantirish loyihalarini ishlab chiqish jarayoniga oʻz hissalarini qoʻshishmoqda.

Xususan, tashabbusli byudjet jarayonining joriy yildagi birinchi bosqichida jamoatchilik fikri va takliflari asosida hududiy va ichki komissiyalar tomonidan oʻrganishlar olib borildi. Oʻrganishlar jarayonida eng dolzarb va yechimini kutayotgan muammoli murojaatlar saralab  olindi hamda eng koʻp ovoz toʻplagan murojaat va takliflar gʻolib deb topilib, moliyalashtiriladigan boʻldi.

Unga koʻra, har bir gʻolib, deb topilgan taklif va  murojaat uchun tuman gʻaznachilik boʻlimida alohida hisobraqam ochilib, mazkur hisobraqamlarga mablagʻ oʻtkazish boshlandi va pudratchi tashkilotlarni aniqlash, loyiha-smeta hujjatlarini tayyorlashga kirishildi.

Tashabbusli byudjet jarayonining joriy yilgi birinchi bosqichi yakunlariga koʻra, Toʻlqin ovuli hududidagi 33-sonli maktabga  oʻquvchilarning xavfsiz borib, kelishini taʼminlash maqsadida piyodalar yoʻlakchasini qurish boʻyicha bildirilgan taklif gʻolib, deb topilib, mazkur taklifni moliyalashtirish boʻyicha chora-tadbirlar rejasi ishlab chiqildi va Amudaryo tuman Obodonlashtirish boshqarmasi piyodalar yoʻlakchasini qurish boʻyicha buyurtmachi tashkilot qilib belgilandi.

Shuningdek, Amudaryo tumanining Tor yop mahalla fuqarolar yigʻini hududidan oʻtuvchi Xoʻja ovul – Qilichboy ichki yoʻlining 4 kilometr qismini joriy taʼmirlash toʻgʻrisidagi fuqarolar taklifi ham gʻolib, deb topilib, tuman Obodonlashtirish boshqarmasi tomonidan ushbu yoʻlda taʼmirlash-tiklash ishlarini amalga oshirish tez orada boshlanish arafasida.

Bundan tashqari, tashabbusli byudjet jarayoninig birinchi bosqichiga Amudaryo tumani Toryop mahallasi hududidagi Dehqonbirlik koʻchasining 1 kilometr qismini tuproq bilan koʻtarish va tosh yotqizib, taʼmirlash boʻyicha taklif ham gʻolib, deb topilib, mazkur taʼmirlash ishlari uchun zarur boʻladigan mablagʻlar hisob-kitob qilindi va byurtmachi tashkilot sifatida sifatida tuman Obodonlashtirish boshqarmasi belgilandi.

Fuqarolarning yana bir muhim taklifi – Toʻlqin ovuli hududidagi 28-sonli maktab binosining isitish tizimlarini elektr energiyasi orqali isitish tizimiga oʻtkazish toʻgʻrisida boʻlib, mazkur taklif ham gʻolib boʻldi. Haqiqatdan ham oʻrganishlar jarayonida maʼlum boʻldiki, ikki qavatli boʻlgan maktab binosi koʻmir bilan isitilgani uchun binoning ikkinchi qavatida qish mavsumida moʻʼtadil iqlimni saqlab turishning imkoni yoʻq. Shu bois, isitish tizimini elektr energiyasiga moslashtirish dolzarb masala. Mazkur muammoli masalani  hal etish maqsadida zarur mablagʻlar ajratish masalasi koʻrib chiqilib, Amudaryo tuman xalq taʼlimi boʻlimi byurtmachi tashkilot sifatida belgilandi.

Amudaryo tumanining Arna boʻyi mahallasidagi 27-sonli maktab binosini mukammal taʼmirlash, maktab uchun 4,5 kilometr uzunlikdagi tabiiy gaz tarmogʻini tortish, maktabning tom qismi, eshik va derazalar hamda isitish tizimini toʻliq almashtirish yoki taʼmirlash, shuningdek, Xizr eli mahalla fuqarolar yigʻini hududidagi 47-sonli maktabgacha taʼlim tashkiloti binosini joriy taʼmirlash boʻyicha  takliflar  ham tashabbusli  byudjet jarayonining birinchi bosqichi gʻoliblari, deb topildi.

Mazkur umumtaʼlim maktabi va maktabgacha taʼlim tashkiloti binolarida qurilish-taʼmirlash ishlarini amalga oshirish uchun zarur boʻladigan mablagʻlar, loyiha-smeta hujjatlari shakllantirilib, buyurtmachi tashkilotlar – Amudaryo tumani Xalq taʼlimi boʻlimi hamda tuman Maktabgacha taʼlim boʻlimi tomonidan saʼy-harakatlar boshlanmoqda.

Shunisi eʼtiborliki, fuqarolar tashabbusli byudjet jarayonida faol ishtirok etish oqrali oʻzlari yashab turgan hududlarni ijtimoiy-iqtisodiy rivojlantirish, infratuzilmani yanada yaxshilashga munosib hissalarini qoʻshmoqdalar.

Robiya Yoʻldosheva.