Jayxun ilhomlari

QALBI YoNIQ QORAQALPOQ FARZANDI

(Musa Yerniyazov xotirasiga bagʻishlayman)

Yaxshilarning men yaxshisin aytayin,

Hammaga teng boshchi eding kamtarin.

Oʻylading sen doimo elning gʻamin,

Qalbi yoniq qoraqalpoq farzandi.

 

Yigit eding arslonday tugʻilgan,

Xalq ishiga belin mahkam boylagan.

Sen kelding xabar ham keldi-ku suvdan,

Qalbi yoniq qoraqalpoq farzandi.

 

El ogʻziga elak tutib boʻlmaydi,

Hammaning ham koʻngli birday toʻlmaydi.

Halol mehnat hech vaqt yerda qolmaydi,

Qalbi yoniq qoraqalpoq farzandi.

 

Elim degan er yigitning birisan,

El buyursa, doim tayyor eding sen.

Fidoyilik namunasi oʻzingsan,

Qalbi yoniq qoraqalpoq farzandi.

 

Ishga qoʻshib ikki ulkan zavodni,

Oʻrta Osiyoda mashhur, qudratli.

Elaro qozonding eʼzoz, hurmatni,

Qalbi yoniq qoraqalpoq farzandi.

 

Rejasin bajarib paxta, bugʻdoyning,

Qoraqalpoq xalqi shaʼnin koʻtarding.

Bandasi ekansan suygan Xudoning,

Qalbi yoniq qoraqalpoq farzandi.

 

“Qahramon” unvoni berilgan onda,

Ishonch bildirdi Prezident senga.

Imkonsiz umrni qaytarmoq izga,

Qalbi yoniq qoraqalpoq farzandi.

 

Behisht boʻlsin Ogʻa, oʻrningiz yotgan,

Panohiga olgan boʻlsin Yaratgan.

Saqlaymiz nomingiz chiqarmay yoddan,

Qalbi yoniq qoraqalpoq farzandi.

Angsatbay QARAJANOV, huquqshunos.

Qoraqalpoq  tilidan

Oygul RAJABOVA tarjimasi.

 

Oʻsha yangi yil

Bir-birin quvlashib yillar ham oʻtdi,

Xotira bogʻiga moʻralar koʻngil.

Esingdami dildor, qaysi yil edi.

Bizni uchrashtirgan oʻsha Yangi yil.

 

Dillarga zavq berib bahori, yozi,

Qalbimga nur boʻlib kirdi bitta gul.

Yurakka oʻt yoqib ishvasi, nozi,

Majnun qilib ketgan, oʻsha Yangi yil.

 

Sirli nigohlaring, koʻzlaring qoʻmsab,

Devona oshiqning yuragi savil.

His-tuygʻu ummoni bagʻrimni oʻrtab,

Telba qilib ketgan, oʻsha Yangi yil.

 

Xotira sandigʻin titkilab sekin,

Avaylab eslayman, oʻtsa ham qirq yil.

Shoʻrlik yuragimga hech oʻchmas, metin,

Tamgʻa bosib ketgan, oʻsha Yangi yil.

Odil ShOMURODOV.

 

SAYLANMASI SAYRAGAN DILDAN

(Ustozim Saʼdulla Xoʻjaniyozovning “Koʻrganlarim, eshitganlarim” otliq kattagina kitobidan ilhomlanib aytgan baytlarim)

Saylanmasi sayragan dildan,

Oʻtar hali tillarga tildan.

Koʻrganlari eshitganlari,

Sayqallab soʻz pishitganlari.

 

Bulbul kabi menimcha, aniq,

Sohir soʻzi oʻziday yoniq.

Saʼdulla aka deb ul ustozni,

Jonday tutgan qalam-qogʻozni.

 

Ixlos oshib qilaman hurmat,

Vasfin aylab borida fursat.

Qalbim toshib qilaman eʼzoz,

Qalbim qaynab beraman ixlos.

 

Evaziga ibrat olaman,

Shogird shoir boʻlib qolaman.

Er yigit-u qiz kitobxonlar,

Elidagi biz – kitobxonlar.

 

Oʻrganamiz oʻrgatmoq uchun,

Koʻrgizay deb kitoblar kuchin.

Yana qaytay oʻz ustozimga,

Jarang qoʻshib bor ovozimga.

 

Kibri yoʻgʻ-u, kamtarligi bor,

Har dardliga hamdardligi bor.

Bezorligi bor pastkashlardan,

Andishasiz hazilkashlardan.

 

Yozganlari samimiy, sodda,

Neki boʻlgan boʻlsa hayotda.

Oʻqib koʻrgan bilar beshubha,

Boʻlganligin tuzuk bir tuhfa.

 

Kitobdagi hikoyalar ham,

Nafosatli, nazmdan emas kam.

Xullas, oʻqing, koʻngil joy boʻlgay,

Oʻqib koʻrgan maʼnan boy boʻlgay.

Jumaboy HIDOYaTOV.

 

Amudaryomsan

Jayhun boʻylarida gullab-yashnagan,

Amuni jilovlab, koʻprik tashlagan.

Toʻkin dasturxonda dehqon mehri jam,

Mening ona yurtim, Amudaryomsan.

 

Bobolar quvvatin bergan bu makon,

Yuzing yorugʻ boʻlsin, elim har qachon.

Mustaqil bu Vatan tinch turgay, omon,

Mening ona yurtim, Amudaryomsan.

 

Oqqosh, beshak, gurvak qovun senda bor,

Olma, anjir, uzum bogʻlar senda bor.

Ipagu surp ham bari senda bor,

Mening ona yurtim, Amudaryomsan.

 

Yurtboshim koʻrsatgan yoʻldan boraver,

Yuksak marralarga qadam qoʻyaver.

Mangu omon boʻlgin, mangu gullayver,

Mening ona yurtim, Amudaryomsan.

Rahimboy Prmilov.

 

Ishq fasli

 

Bugun koʻkdan xoʻrsinib,

Qaytayapti yerga qor.

Garchi erib ketsa-da,

Qalbida bir sevinch bor.

 

Yerga qoʻyganda mehr,

Mayli erib ketsa ham.

Toʻyolsa visoliga,

Rozi edi shunda ham.

 

Toʻrt faslda bir bora,

Oshiqlar koʻrishardi.

Qor eriydi na chora,

Yer ham koʻzin yoshlardi.

 

Yer bir "Majnun" misoli,

Kutar edi "Layli"sin.

Koʻnglin bosardi gʻubor,

Oʻylasa soʻng erishin.

"Layli" muhabbat uchun,

Rozi edi erishga.

Bir lahzalik visolga,

Barchasiga koʻnishga.

 

Shundan buyon har yili,

Laylisini kutar yer.

Qor erib ketayotib,

Yerga qarab, bir soʻz der:

 

– Hijronga hech oʻksima,

Sevgi dardga oʻxshaydi.

Olis boʻlsak ikkimiz,

U qalblarda yashaydi.

 

Qahraton deb oʻksimang,

Qishning qalbi pok asli.

Siz, oʻylamang bahor deb,

Aslida Qish ishq fasli.

Goʻzal Karimova,

41-maktab oʻquvchisi.

 

Vatan

Ona Vatan, hur Vatan,

Mehri daryoyim Vatan.

Oʻzbekiston bagʻrida,

Amudaryo gul-chaman.

Oʻzbek, qozoq va turkman,

Qoraqalpoq jon-u tan.

Bir yuz-u qirq millatga,

Oʻzbekiston hur Vatan.

Dilrabo Murodova,

24-maktab oʻquvchisi.

 

Fasllar

Qish oʻtib, bahor kelar,

Navroʻz gullari bilan.

Izida yoz gurkirar,

Toʻkin bogʻlari bilan.

Kuz kelar horib-tolib,

Xirmonlarni yelkalab.

Soʻngra uch oy qish gʻolib,

Muzlar yoʻl-u yoʻlaklar.

Farruh Amanboyev, 24-maktab oʻquvchisi.

 

Yangi yil

Qishning birinchi oyi,

Ayni qor yogʻar chogʻi.

Eski yildan kechamiz,

Yangi yilni kutamiz.

Yangi yilning shukuhi,

Hamma yerlarni kezar,

Jajji-jajji bolalar,

Koʻchaga bezak berar.

Hamma yoqda oppoq qor,

Qishdan daraklar berar.

Yana biroz vaqtdan soʻng,

Yangi yil kirib kelar.

Sohiba Sharipova,

41-maktab oʻquvchisi.