BEShOVULLIKLAR NAVROʻZ BAYRAMINI KOʻTARINKI RUHDA NIShONLAShDI

Yurtimiz boʻylab oʻtkazilgan Navroʻz tantanalari xalqimizga bahoriy va koʻtarinki kayfiyat baxsh etdi. Ayyom munosabati bilan tumanimizning barcha hududlarida, ovul va mahallalar, taʼlim muassasalari, korxona-tashkilotlarda kontsert dasturlari, sayillar va sport musobaqalari oʻtkazildi.

Navroʻz bayrami munosabati bilan Beshovul mahallasida ham katta sayil boʻlib oʻtdi. Mahalla hududidagi fermerlar homiyligida fuqarolar yigʻini tomonidan tashkil etilgan ushbu tadbirga yoshi ulugʻlardan tortib, kichik yoshdagi bolalargacha tashrif buyurishdi.

Mahalladagi 37-sonli maktabning sport maydonchasida oʻtkazilgan bayram tadbirini fuqarolar yigʻinidagi hokim yordamchisi Sherzod Toʻrayev ochib berdi va mahalla aholisini bayram bilan tabrikladi. U oʻz soʻzida hududni rivojlantirish, aholiga farovon turmush tarzini yaratish borasida olib borilayotgan ishlar xususida toʻxtaldi. Shuningdek, mahallada bandlikni taʼminlash, tadbirkorlikni yoʻlga qoʻyish va rivojlantirish boʻyicha amalga oshirilgan chora-tadbirlar toʻgʻrisida ham soʻzladi.

Fuqarolar yigʻinida tashkil etilgan Keksalar guruhi aʼzosi, qishloq xoʻjaligi sohasida uzoq yillar faoliyat koʻrsatgan nuroniy otaxon Farhod ota Iskandarov ham mahalladoshlarni bayram bilan qutlab, Navroʻz bayrami munosabati bilan faxriylar, keksa avlod vakillarini har tomonlama eʼzozlash, «Temir daftar», «Ayollar daftari», «Yoshlar daftari» va «Mehr daftari»ga kiritilgan hamda koʻmakka muhtoj insonlarning holidan xabar olish, ularga begʻaraz yordam berish bilan bogʻliq xayriya tadbirlari ham tashkil etilganini taʼkidladi. Bemorlar, yakka-yolgʻiz yashovchilar xonadonlarida obodonlashtirish, tomorqadagi ekish ishlariga koʻmaklashilgani, mahallada birdamlikda pishirilgan sumalaklar tarqatilgani, bayramni munosib kutib olishga qizgʻin tayyorgarlik koʻrilganini aytib oʻtdi.

Bayram saylida Qilichboy madaniyat markazi xodimlari va havaskorlari, 37-sonli maktab oʻquvchilari va mahalla hududidagi maktabgacha taʼlim tashkiloti tarbiyalanuvchilari tomonidan tayyorlangan katta musiqiy dastur namoyish etildi. Dastur davomida ijro etilgan bahor, Navroʻz, Vatan haqidagi kuy va qoʻshiqlar, xalq ogʻzaki ijodi namunalari, yor-yor va laparlar, kelinsalom, ona allasi, qiz uzatish kabi milliy qadriyatlarimiz aks etgan sahna koʻrinishlari ishtirokchilarga koʻtarinki kayfiyat bagʻishladi. Shuningdek, oʻyingohda turli sport musobaqalari ham tashkil etildi. Mahallaning sportchi yoshlari tosh koʻtarish, kuch sinashish, arqon tortish musobaqalarida faol qatnashishdi. Ayniqsa, sunʼiy qoplamali sport maydonchasida boʻlib oʻtgan futbol musobaqasidagi oʻyinlar juda qizgʻin kechdi. Bolajonlar oʻrtasida boʻlib oʻtgan varrak uchirish musobaqasi ham sayilning fayzli oʻtishini taʼminladi.

Tadbir davomida yoshi ulugʻ nuroniylarga, sport musobaqalari gʻoliblari va fermer xoʻjaliklarining ilgʻor ishchilariga bayram sovgʻalari topshirildi.

Bayram sayliga tashrif buyurgan mehmonlar dasturxonlarga tortilgan bahoriy taomlar, sumalaklar va boshqa turli noz-neʼmatlardan bahramand boʻldilar. Ularga milliy taomimiz osh ham tortildi.

Mahallada oʻtkazilgan Navroʻz bayrami tantanalari beshovulliklarga koʻtarinki ruh baxsh etib, katta taassurotlar qoldirdi.

Ozoda Xudoyberganova.