Yangilanayotgan Konstitutsiya targʻibotiga bagʻishlangan yigʻilish oʻtkazildi

Xabaringiz bor, 2023-yil 30-aprel kuni yurtimizda Oʻzbekiston Respublikasining yangi tahrirdagi Konstitutsiyasi toʻgʻrisidagi Konstitutsion qonun loyihasi boʻyicha referendum oʻtkaziladi.

Albatta, oʻz oilasi, farzandlari, yurti taqdiriga befarq boʻlmagan har bir vatandoshimiz unda faol ishtirok etishi lozim. Bosh qomusimizga kiritilayotgan oʻzgarishlar va ularning mazmun-mohiyatini aholiga keng tarzda tushuntirish maqsadida Oliy majlis Qonunchilik palatasi deputatlari, mahalliy Kengash deputatlari, Adliya vazirligi va uning hududiy boʻlimlari tomonidan yurtimiz boʻylab keng turda targʻibot tadbirlari olib borilmoqda.

Mana shunday targʻibot tadbirlaridan biri 25-mart kuni Amudaryo tumani hokimligining majlislar zalida boʻlib oʻtdi.

Tadbirda Oʻzbekiston Respublikasi Oliy Majlisi Qonunchilik palatasi deputati Zumrad Bekatova, Qoraqalpogʻiston Respublikasi Joʻqorgʻi Kengesi deputatlari Sanobar Xoʻjamuratova, Yaxshimurat Axmedovlar ishtirok etishdi. Shuningdek yigʻilishda xalq deputatlari tuman Kengashi deputatlari, ovul va mahalla fuqarolar yigʻinlari raislari, siyosiy partiya rahbarlari, tegishli tashkilot masʼullari va ommaviy axborot vositalari vakillari ishtirok etishdi.

Yigʻilishda Bosh qomusimizga kiritilayotgan oʻzgartishlarning mazmun-mohiyati, taʼlim rivojiga doir muhim jihatlar xususida maʼlumotlar berildi. Asosiy Qonunimiz mamlakatimizda yangi hayot, yangi jamiyat barpo etish yoʻlida qoʻlga kiritilayotgan barcha yutuq va marralarimizning huquqiy poydevori – kelajagimizning ishonchli kafolati ekanligi taʼkidlanib, Referendum joriy yilning 30-aprel, yakshanba kuniga belgilanganligi va unda har bir fuqaro faol ishtirok etib, konstitutsiyada belgilangan burchini bajarmogʻi lozimligi alohida qayd etib oʻtildi.

Aytish kerakki, Oʻzbekiston Respublikasining amaldagi Konstitutsiyasidagi moddalar soni 128 ta boʻlgan boʻlsa, yangi tahrirda moddalar soni 155 tani tashkil etib, undagi normalar esa 275 tadan 434 taga oshirilmoqda. Bir soʻz bilan aytganda, amaldagi Konstitutsiyamizning 65 foiziga oʻzgartirish kiritilmoqda.

Yigʻilish davomida deputat Sanobar Xoʻjamuratova yangilanayotgan konstituttsiyaviy qonun loyihasi matnining 50- va 52-moddalarida maktab va maktabgacha taʼlimni rivojlantirish boʻyicha qator huquqiy asoslar mustahkamlab qoʻyilayotganini aytib oʻtdi.

Shuningdek, yangilanayotgan Konstitutsiyamizda bolalar mehnati taqiqlanib, avvalgi yillardagidek paxta terimi, chopigʻi, tozalash supur-sidir ishlari bilan oʻquvchi va oʻqituvchilarni majburiy shugʻullantirish mutlaqo taʼqiqlanganini aytib, barchani 30-aprel kuni oʻz kelajagi va haq-huquqi uchun ovoz berishga chaqirdi.

Oliy Majlisi Qonunchilik palatasi deputati Zumrad Bekatova barcha deputatlardan oʻz saylov okruglarida targʻibot tadbirlarini jadal surʼatlarda olib borishlari lozimligini va bunda albatta ommaviy axborot vositalari bilan hamkorlikda ishlash zarurligini qayd etib oʻtdi. Deputat Zumrad Bekatovaning targʻibot tadbirlari tumandagi barcha mahallalarda davom etadi.

Tuman hokimligining Axborot xizmati.