GRANT LOYIHASI DOIRASIDA “KITOBLAR KARVONI” TADBIRI OʻTKAZILDI

“Mening oilam” gazetasi tahririyatining “Besh muhim tashabbus – yoshlarga qanot!” nomli grant loyihasi doirasida “Kitoblar karvoni” tadbiri oʻtkazildi.

27-iyul kuni Amudaryo tumanidagi “Barkamol avlod” bolalar maktabida boʻlib oʻtgan tadbirda “Taraqqiyot koʻzgusi” gazetasi, “Amudaryo” telekanali tahririyatlari xodimlari, maktab direktori Xonimjon Rajabova, toʻgaraklar rahbarlari va oʻquvchi-yoshlar ishtirok etishdi. Tadbir davomida ishtirokchilarga grant loyihasi doirasida tahririyat xodimlari tomonidan amalga oshirilayotgan ishlar xususida maʼlumot berildi.

Loyiha koordinatorlari mazkur grant loyihasi doirasida nogironligi boʻlgan yoshlarni “Besh muhim tashabbus” doirasidagi tadbirlarga faol jalb qilish maqsadida turli tanlovlar, davra suhbatlari, uchrashuvlar tashkil etilayotgani, ularda tuman yoshlari faol qatnashishayotgani, ijodkor yoshlarning ijod namunalari tuman gazetasida yoritilib borilayotgani xususida soʻzlab oʻtishdi.

Shuningdek, tadbirda ishtirok etgan “Taraqqiyot koʻzgusi” gazetasi muxbiri, jurnalist Oygul Rajabova yoshlarni kitobxonlikka jalb etish, ijodkor yoshlarni qoʻllab-quvvatlash, ularning ijod namunalarini yoritish borasida olib borilayotgan ishlar, tahririyat qoshidagi “Jayxun ilhomlari” nodavlat notijorat tashkiloti kutubxonasida 5 ming donaga yaqin kitoblar fondiga ega boʻlgan kutubxona, shuningdek, tahririyat tomonidan turli loyihalar doirasida tashkil etilayotgan maʼnaviy-maʼrifiy tadbirlar xususida maʼlumotlar berib oʻtdi.

Tadbirda loyiha koordinatorlari oʻquvchi-yoshlarni koʻrgazmaga qoʻyilgan “Jayxun ilhomlari” nodavlat notijorat tashkiloti qoshidagi kutubxonaga tegishli boʻlgan 100 tadan ziyod kitoblar bilan tanishtirdilar. Yoshlar shu joyning oʻzida kutubxonaga aʼzolikka qabul qilinib, oʻzlariga yoqqan kitoblarni tanlab oldilar.

Yosh kitobxonlar “Kitoblar karvoni” koʻrgazmasi orqali taqdim etilgan asarlarni qiziqish bilan varaqlab, albatta “Jayxun ilhomlari” NNT kutubxonasiga aʼzo boʻlish istagini bildirdilar.

Nogironligi boʻlgan kitobxon yoshlarning oʻzlari yoqtirgan asarlarni mutolaa qilishlariga sharoit yaratish maqsadida hududdagi maktablarning ijodiy-madaniy masalalar boʻyicha targʻibotchilari alohida roʻyxat tuzish orqali bunday toifadagi kitobxon yoshlarni qoʻllab-quvvatlash va albatta ular xohlagan badiiy adabiyotlarni beminnat yetkazib berishni yoʻlga qoʻyishlarini bildirdilar.

Tadbir davomida kitobxon yoshlar oʻzlari sevib oʻqigan badiiy asarlar qahramonlari hayotidan olgan taassurotlari haqida toʻlqinlanib soʻzladilar. Sheʼrlar aytishib, oʻzlarini qiziqtirgan savollarni berdilar. Kitobxon yoshlar bilan “Taraqqiyot koʻzgusi” gazetasi tahririyati ijodkorlari samimiy muloqotda boʻldilar va ularning barcha savollariga javoblar berdilar.

Kitob – ziyo nurini tarqatuvchi, toʻgʻri yoʻl koʻrsatuvchi chiroq. Kitobxon ana shu moʻʼjizalar olamiga kirgan sari zakovatli, har qanday vaziyatda fikrini erkin ifoda etaoladigan shaxs sifatida kamol topadi. Yoshlar uchun tashkil etilgan “Kitoblar karvoni” tadbiri aynan ana shunday zakovatli insonlarni kamol toptirishga qaratilgani bilan muhim ahamiyat kasb etdi.

O.Xudoyberganova.