OʻTA XAVFLI VA YuQUMLI ZOONOZ KASALLIKLARDAN OGOH BOʻLING!
Kunlarning issiq davri aholi uchun yuqumli kasalliklardan saqlanish
borasida masʼuliyatli mavsum hisoblanadi.
Bahor, yoz oylarida oʻta xavfli Qrim-kongo gemorragik isitma, quturish, kuydirgi, brutsellyoz kasalliklari koʻproq uchraydi.
Qrim-kongo gemorragik isitma (oʻtmishda qora halak, qora oʻlim deb ham nomlangan) kasalligi hayvonlarda uchraydi va kanalar chaqishi yoki kanani terish va ezib oʻldirish, qoʻy-echkilar junini qirqish vaqtida odamlarga yuqadi. Bemorlar oʻz vaqtida shifoxonaga murojaat qilmasa, ahvoli ogʻirlashib, ayrim holatlarda oʻlim bilan tugashi mumkin.
Qrim-kongo gemorragik isitma kasalligini yuqtirib olmaslik uchun aholi qoʻllariga rezina qoʻlqop kiyib, vaqti-vaqti bilan xonadonida boqilayotgan chorva mollarida kanalar bor-yoʻqligini tekshirib turishlari shart. Agar kanalar borligi aniqlansa, darhol veterinariya shifokorini chaqirib, ular tomonidan uy hayvonlarini hamda molxona va qoʻyxonalarni kanalarga qarshi maxsus dezinfektsiya vositalari yordamida ishlov berishni tashkil etish zarur.
Uy hayvonlaridagi kanalarni terish, ushlash va ularni ezib oʻldirish umuman mumkin emas. Kana chaqqanda yoki qoʻy junini qirqish vaqtida kanadan qon sachraganda zudlik bilan shifoxonaga murojaat qilish lozim.
Quturish kasalligi ham hayvonlar va odamlarda uchraydigan, asab tizimining ogʻir shikastlanishi bilan kechadigan hamda oʻlim bilan yakun topadigan oʻta xavfli yuqumli kasallikdir.
Odamlar uchun kasallik manbai quturgan uy hayvonlari hisoblanadi. Odamlarga quturish kasalligi koʻp holatlarda itlardan, shu kasallikka chalingan hayvonlarning tishlashi, tirnashi, tishlarining qadalishi, shuningdek, jarohatlangan teri va shilliq qavatlariga soʻlagi tushishi paytida yuqadi. Shuning uchun hayvon tishlagan odam darhol shifokorga murojaat qilib, quturish kasalligiga qarshi davo muolajalarini olishi zarur. Shunday yoʻl tutgan odam oʻz hayoti xavfsizligini taʼminlagan boʻladi.
Oʻzingiz, yaqinlaringiz va qoʻni-qoʻshnilaringizni yuqoridagi oʻta xavfli yuqumli kasalliklardan himoya qilishda befarq boʻlmang!
D.Bobojonov,
tuman SEO va JSB epidemiolog-shifokori.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
