HALOLLIKNING MUKOFOTI
Biz halollik haqida juda koʻp gapiramiz. Nasibangni halol mehnating ila topib, kundalik hayotingni xotirjam oʻtkazish, atrofingdagilarning hurmat-eʼtiboriga sazovor yashash hammaga ham nasib etavermaydi.
Buning uchun, avvalo insonda qatʼiyat, sabr-toqat, oʻz faoliyatini doimiy tahlil va tahrir etib yashash qobiliyati, mardonalik mujassam boʻlmogʻi joiz.
Mohir jurnalist Oygul Rajabovaning feʼlida aynan ana shu fazilatlar uygʻunligi uchun ham uning hayoti koʻplar havas qilishga arzigulik yorqin sahifalarga toʻla.
Ilk jurnalistik faoliyatini 1985-yilda “Amudaryo haqiqati” gazetasi tahririyatida qishloq xoʻjalik boʻlimi muxbiri lavozimida ishlashdan boshlagan Oygul Rajabova 38 yillik ijodiy izlanishlari, qaynoq mehnat jarayonida toblandi. Oʻzining qatʼiyati, sabr-toqati, oʻz ustida tinmay ishlashi, kasbiga boʻlgan cheksiz mehr-muhabbati bilan elning aziz farzandiga aylandi, shaxs sifatida shakllandi. Mehnatga halollik bilan munosabatda boʻlishni oʻziga hayotiy shior qilib olgan Oygul ijodda va umr yoʻllaridagi jamiki muvaffaqiyatlariga mardonalik bilan erishdi.
Biz uning shaxs sifatida shakllanish jarayonlariga guvoh, doʻst, hamkasb sifatida shuni dadil ayta olamizki, Oygul Rajabova oʻzining kamtarligi, xalq hayotiga doir muammolarni dadil koʻtarib chiqishi va boshqa olijanob fazilatlari bilan nafaqat ijodiy jamoa, balki el-yurt hurmatiga sazovor boʻla oldi. Tahririyatda qalami oʻtkir, sermulohaza jurnalist, talabchan ustoz, samimiy va mehribon doʻst sifatida eʼtibor topdi, yuzlab muxlislariga ega ijodkorga aylandi. Bugungi kunda yillar davomida ijodiy faollikni oʻziga hamroh qilgan Oygul deyarli har kuni aziz xalqi bilan birga. Kimningdir hayotidagi muammolar yechimini izlab, goh olis ovullarga, mahallalarga yoʻl olsa, yana kimlardir u qilgan yaxshiliklar uchun eng ulugʻ mukofot – minnatdorchilik izhor etish maqsadida tahririyat eshigidan kirib keladi. Ana shunday lahzalarda Oygulning yuz-u koʻzlari yashnab ketadi:
– Ming shukur, halollikka yetadigan neʼmatning oʻzi yoʻq, xalqqa nafim yetganiga shukur, – deya koʻngli togʻday yuksaladi uning.
Bu Oygulga xos fazilat, hayotining haqiqiy ziynati!
U jonajon Amu eliga har lahza oʻzining otashin soʻzini aytishga oshiqdi, xalqni yangi marralar sari ruhlantirishga intildi va pirovardida Amu elining oʻz qiziga aylandi.
Ijodiy faoliyati davomida “Mashaqqatlarda toblangan umr” ocherki, “Tushlarimga kirib turing” esse janridagi biri-biridan oʻqishli, badiiy yetuk ijod namunalarini aziz xalqiga kitob shaklida taqdim etdi. Mohir tarjimon sifatida qoraqalpoq shoir va yozuvchilarining asarlarini oʻzbek tiliga oʻgirib, millatlar va adabiyotlar doʻstligining qudratidan yuzlab kitobsevarlarni bahramand etib kelayotgani va bu xizmati uchun baʼzilarga oʻxshab davralarda oʻz “meni”ni oldinga olib chiqishga intilmaganining oʻzi ham faqat va faqat Oygul Rajabovaga xos halollik, fidoyilikdir.
Oygul oʻz iqtidori, bilim va tajribasi, qolaversa, ijodkorga xos ogʻir-vazminligi bois, tahririyatda turli yillarda oddiy muxbirlikdan boʻlim mudiri, masʼul kotiba kabi vazifalarni sharaf bilan ado etib kelayotgan yetuk ijodkor, oilada tadbirli beka, ikki oʻgʻil, ikki qizni umr yoʻldoshi Maqsud aka Salayev bilan oʻqimishli, kasb-korli, uyli-joyli qilgan hurmatga musharraf ona, sermulohaza qaynona, 7 nafar shirin-shakar nevaralarning sevimli buvijonisi. Oʻgʻil-qizlari kamolidan, biri-biridan oqila kelinlaridan koʻngli toʻq, kasbiy faoliyatidan ham qoniqish hissi bilan yashab, doimiy ijod bilan band.
Fidoyi mehnatlari davlatimiz tomonidan eʼtirof etilib, turli yillarda Qoraqalpogʻiston Respublikasi Joʻqorgʻi Kengesining, Oʻzbekiston Jurnalistlari ijodiy Uyushmasining Faxriy yorliqlari, “Oʻzbekiston Respublikasi mustaqilligiga 20-yil” koʻkrak nishonlari bilan taqdirlangan Oygul Rajabovaning el-yurt oldidagi fidoyi xizmatlari, halol mehnati davlatimiz tomonidan yana bir bor eʼtirof etilib, II Darajali “Mehnat faxriysi” koʻkrak nishoni bilan mukofotlandi.
Oddiy, oʻta kamtar, halollikni oʻzining hayot shioriga aylantirgan, fidoyi ijodkor, Oʻzbekiston Jurnalistlar uyushmasi aʼzosi Oygul Rajabovani butun ijodiy jamoamiz, muxlislari va shogirdlari nomidan samimiy muborakbod etamiz.
Samimiyat choʻgʻi lovullab turgan goʻzal feʼl-atvori, ibratga munosib ustozlik sharafi, eʼzoz va ehtiromga loyiq hayot yoʻli bilan yana uzoq yillar yosh ijodkorlar uchun chinakam ijod maktabi sohibasi boʻlib yashang va qoʻlingizdan aslo qalamingiz tushmasin, ijod zavqi hamrohingiz boʻlsin, Oygul!
Halollikdan umr yoʻlida
Izzat-hurmat oshyonin qurdi.
Bor boyligi – Qalam qoʻlida,
Soʻz mavjida javlonlar urdi.
Amu elga chin farzand boʻlib,
Tashvishiga yelka tutdi u.
El quvonsa, quvondi toʻlib,
Shu feʼlidan eʼzoz topdi u!
Tahririyat jamoasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
