ChOYKOʻL OVULIDA “IDEAL” DOʻKONLAR TARMOGʻINING YaNGI SAVDO ShOXOBChASI OʻZ FAOLIYaTINI BOShLADI

Mamlakatimizda tadbirkorlik sohasiga koʻrsatilayotgan eʼtibor, imtiyoz va ragʻbat tufayli turli sohalar boʻyicha oʻz tadbirkorlik faoliyatini yoʻlga qoʻyib, xalqimizning mushkulini oson, ogʻirini yengil qilayotgan ishbarmonlar safi tobora oshib bormoqda.

Amudaryo tumanida ham tadbirkorlik sohasidagi ijobiy oʻzgarishlar. mustahkam huquqiy asoslardan samarali foydalangan holda tadbirkorlik sohasida yuqori natijalarga erishayotgan ishbilarmonlar talaygina.

Asli kasbi rus tili va adabiyot fani oʻqituvchisi boʻlgan mangʻitlik Baxtiyor Oʻrozimbetov tadbirkorlik sohasiga qiziqib qolganida uni birinchi boʻlib otasi Rahimboy ota Oʻrozimbetov chin dildan qoʻllab-quvvatladi, oʻgʻliga zarur maslahat va tavsiyalar berdi. Ota duosini olib, 2005-yilda savdo-sotiq yoʻnalishida ilk faoliyatini boshlagan Baxtiyor Oʻrozimbetov tinimsiz izlandi, tadbirkorlik sohasiga oid qoʻllanmalar, hukumat qarorlari bilan tanishishdan aslo toʻxtamadi. Ayniqsa, otasi, uzoq yillar davlat idoralarida ishlab, xalq hayoti va ehtiyojlarini yaqindan oʻrgangan Rahimboy Oʻrozimbetovning maslahati bilan bozor talablarini puxta oʻrgandi. Faoliyatini kengaytirib, “Ideal” doʻkonlar tarmogʻini tashkil etdi.

Bugungi kunda Baxtiyor Oʻrozimbetov rahbarligidagi “Ideal” doʻkonlar tarmogʻi tarkibidagi savdo shoxobchalari Mangʻit va Nukus shaharlarida xalqqa maishiy texnika vositalari, zamonaviy uy jihozlari, xususan, mehmonxona va oshxona, ayvonlar uchun turkum jihozlar, shuningdek, avtomashinalar savdosi boʻyicha namunali xizmat koʻrsatib kelmoqda. Asosiysi, Baxtiyor Oʻrozimbetovning saʼy-harakatlari tufayli “Ideal” doʻkonlar tarmogʻi tasarrufidagi savdo shoxobchalarida 18 nafar yoshlarning doimiy ish bilan bandligi taʼminlandi.

Baxtiyor Oʻrozimbetov yana bir ezgu ishga qoʻl urdi. Choykoʻl ovulining Noʻgʻoy Eshon bobo aholi punkti hududidagi tashlandiq yerni obod qilib, bu yerda “Ideal Premer” doʻkonlar tarmogʻining yana bir shoxobchasini bunyod etdi. 17-avgust kuni maishiy texnika vositalari, turli toifadagi uy jihozlari hamda yengil avtomashinalar bilan savdo qilishga moʻljallangan savdo maskanining ochilish marosimida Amudaryo tumani hokimining oʻrinbosari Nodirbek Kamolov, Choykoʻl ovuli fuqarolar yigʻini raisi Begzod Aytekov, mehnat faxriysi, tadbirkor Baxtiyor Oʻrozimbetovning otasi Rahimboy ota Oʻrozimbetov hamda choykoʻllik nuroniy otaxonlar ishtirok etdilar.

Savdo shoxobchasining ochilish marosimida soʻzga chiqqan choykoʻllik nuroniylar tashlandiq joyni obod va soʻlim goʻshaga aylantirib, 3 nafar yoshning doimiy bandligini taʼminlagani, qishloq aholisi uchun qulaylik yaratgani, mushkulini oson, ogʻirini yengil qilgani uchun tadbirkorga chin dildan minnatdorchilik bildirishdi.

Tadbirkorning oʻz mablagʻi va imtiyozli kredit hisobiga bunyod etilgan ikki qavatli koʻrkam binoda oʻz faoliyatini boshlagan yangi savdo shoxobchasida shu kunning oʻzida xaridorlarga xizmat koʻrsatish boshlab yuborildi.

Robiya YOʻLDOShEVA.