Ustozlar milliy forumi doirasida "Maktabgacha taʼlim sifati: Hozirgi holat va kelajakdagi vazifalar" nomli anjuman oʻtkazildi

Amudaryo tumani Maktabgacha va maktab taʼlimi boʻlimida 2023-2024-oʻquv yili boshlanishi oldidan II Ustozlar milliy forumi oʻtkazildi.

Ustozlar milliy forumining ikkinchi kuni “Maktabgacha taʼlim sifati: Hozirgi holat va kelajakdagi vazifalar” mavzusiga bagʻishlandi. Anjumanda tuman Maktabgacha va maktab taʼlimi boʻlimi masʼullari, hududdagi davlat maktabgacha taʼlim tashkilotlari rahbarlari, tarbiyachi-pedagoglar va OAV xodimlari ishtirok etishdi.

Anjuman kun tartibidagi asosiy masala yuzasidan boʻlimning Davlat va nodavlat maktabgacha taʼlim tashkilotlari faoliyatini hamda oʻqitishning muqobil shakllarini tashkil etish boʻyicha shoʻʼba mudiri Soliya Bobojonova maʼruza qildi.

Bolalarni boshlangʻich taʼlimga majburiy, bepul bir yillik tayyorlash tizimi orqali maktabgacha taʼlim muassasalariga jalb etish, tizimini yanada takomillashtirish, sogʻlom, faol, barkamol, ijtimoiy moslashtirilgan bolalarni tarbiyalash, kelgusida muvaffaqiyatli oʻquv faoliyati uchun shart-sharoitlarni shakllantirish va ularni boshlangʻich taʼlimga sifatli tayyorlash va 6 yoshli bolalarni maktabgacha taʼlim bilan toʻliq qamrab olishning asosiy maqsadlari hisoblanadi.

Xususan, “Ilm yoʻli” variativ dasturi “Ilk qadam” maktabgacha taʼlim muassasasining davlat oʻquv dasturi sifatida Oʻzbekiston Respublikasi ilk va maktabgacha yoshdagi bolalarga qoʻyiladigan davlat talablari asosida ishlab chiqilgan. Bolalarni boshlangʻich taʼlimga majburiy. bepul bir yillik tayyorlov guruhida taʼlimiy - tarbiyaviy jarayon “Ilm yoʻli” muqobil dasturi asosida sifatli pedagogik tamoyillarga tayangan holda tashkil etiladi. Anjumanda shu va shu kabi maktabgacha taʼlim-tarbiya uslublari, yangi pedtexnologik jarayonlarni sohaga samarali tatbiq etish yuzasidan batafsil maʼlumotlar berildi.

Shundan soʻng, anjuman kun tartibiga qoʻyilgan pedagog kadrlar tarkibining sifati va ularni kasbiy rivojlantirishga doir masalalar yuzasidan tuman Maktabgacha va maktab taʼlimi boʻlimi, Davlat va nodavlat maktabgacha taʼlim tashkilotlari faoliyatini hamda oʻqitishning muqobil shakllarini tashkil etish shoʻʼba metodisti H.Bobojonova maʼruzasi tinglandi.

Shuningdek, sogʻlom va toʻgʻri ovqatlanish tartibi, mazkur tartibning maktabgacha taʼlim tashkilotlarida muntazam ravishda amal qilinishini taʼminlash kabi masalalar boʻyicha boʻlimning Maktabgacha taʼlim tashkilotlarida sogʻlom ovqatlantirishni tashkil etish boʻyicha metodisti Saule Patullayeva soʻzga chiqib, davlat maktabgacha taʼlim tashkilotlarida tarbiyalanuvchilarni sogʻlom ovqatlantirishni tashkil etish ishlarini yanada takomillashtirish, belgilangan sanitariya qoidalari va gigiyena normalariga muvofiq holda ovqatlantirishni tashkil etish orqali bolalarning sogʻlom va barkamol oʻsishini taʼminlash va shu asosda taʼlim-tarbiya sifatini oshirish yuzasidan oʻzining tavsiya va takliflarini bildirdi.

Darvoqe, joriy yilning 1-iyunidan boshlab Toshkent shahridagi, 2023-yil 1-sentyabrdan esa respublikaning barcha hududlaridagi davlat maktabgacha taʼlim tashkilotlarida yagona mavsumiy taomnoma asosida tarbiyalanuvchilarni ovqatlantirishni tashkil etish belgilangan boʻlib, “Yagona mavsumiy taomnoma”, “Aqlvoy-Oshpaz, bogʻchalar uchun taomlar retsepti” toʻplamidan foydalangan holda tuzilgan va bu taomnomalar roʻyxatiga kiritilgan mahsulotlar bolalarning garmonal rivojlanishida muhim ahamiyatga ega.

Anjumanda joriy yil davomida taʼlim-tarbiya borasida amalga oshirilishi lozim boʻlgan vazifalar ham tahlil qilinib, muhim topshiriqlar belgilab olindi.