MANZILLI QOʻLLAB-QUVVATLASh DAFTARLARIGA KIRITILGAN YoShLAR UChUN OChIQ DARS OʻTKAZILDI

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat!” loyihasining ish rejasi asosida aholining maʼnaviyatini yuksaltirish, yoshlarning isteʼdodlarini yuzaga chiqarish, ularning boʻsh vaqtlarini mazmunli oʻtkazish, turli zararli illatlardan ishonchli himoya qilish maqsadida turli tadbirlar, uchrashuvlar, tanlovlar oʻtkazilib kelinmoqda.

Loyihaning ish rejasi boʻyicha Prezidentimiz ilgari surgan besh muhim tashabbusning uchinchi tashabbusi doirasida tumanning Mangʻit shahri hududida yashovchi, manzilli qoʻllab-quvvatlash daftarlariga kiritilgan yoshlar uchun 40-sonli maktabda “Kompyuter texnologiyalari va internetdan samarali foydalanish” mavzusida ochiq dars tashkil qilindi.

Aytish joizki, tumanning barcha umumtaʼlim maktablaridagi kompyuter sinflarida oʻquvchilarga eng tajribali mutaxassis oʻqituvchilar saboq berib kelmoqda. Biz hikoya qilayotgan 40-sonli maktabda hozirgi kunda 1520 nafar oʻquvchi bilim olmoqda. Ularga 102 nafar pedagog ustozlar bilim sirlarini oʻrgatib kelishmoqda.

Maktabda ikkita kompyuter sinfxonalari boʻlib, oʻquvchilarga informatika fani oʻqituvchilari Dilshoda Abdiqodirov, Inobat Arslonova, Nurbek Xolboyev, Nilufar Soatboyevalar kompyuter texnologiyalari va internetdan samarali foydalanish boʻyicha dars mashgʻulotlari oʻtib kelmoqdalar.

“Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat!” loyihasining ish rejasi asosida shuningdek, Prezidentimiz ilgari surgan besh muhim tashabbusning birinchi tashabbusi doirasida yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirishga, isteʼdodini yuzaga chiqarishga qaratilgan tanlovlar, davra suhbatlari, tadbirlar oʻtkazilmoqda.

Ikkinchi tashabbus doirasida esa yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur sharoitlar yaratish maqsadida maxsus trenajyor xonasi tashkil qilingan.

Uchinchi tashabbus doirasida yoshlar oʻrtasida kompyuter texnologiyalari va internetdan samarali foydalanishga qaratilgan tadbirlar tashkil qilinayotgan boʻlsa, toʻrtinchi tashabbus doirasida yoshlar maʼnaviyatini yuksaltirish, ular oʻrtasida kitobxonlikni keng targʻib qilish boʻyicha tanlovlar, uchrashuvlar va tadbirlar oʻtkazib kelinmoqda.

Shuningdek, beshinchi tashabbus doirasida yosh ayol-qizlarni ishga joylashtirish maqsadida uchrashuvlar tashkil qilinib, oʻzini oʻzi band qilgan va tadbirkorlik bilan shugʻullanib, daromad topayotgan ayol-qizlarning tajribalarini ommalashtirish borasida keng koʻlamli ishlar amalga oshirilmoqda.

Grant loyihasi doirasida tashkil qilingan navbatdagi amaliy dars ham manzilli qoʻllab-quvvatlash daftarlariga kiritilgan yoshlar uchun foydali boʻldi. Zamonaviy oʻquv uskunalariga ega maktabda dars oʻtib, informatika va axborot texnologiyalari sohasiga havas qilgan oʻquvchilarning koʻngliga shu yoʻnalishdagi oliy oʻquv yurtlariga oʻqishga kirib, yetuk mutaxassis boʻlib yetishish orzusi joylangan boʻlsa ajab emas.

Oʻrozali REYIMOV, “Jayxun ilhomlari” NNT raisi.