“BARKAMOL AVLOD” BOLALAR MAKTABIDA “OChIQ EShIKLAR KUNI” TADBIRI BOʻLIB OʻTDI

Amudaryo tuman Maktabgacha va maktab taʼlimi boʻlimi tasarrufidagi “Barkamol avlod” bolalar maktabi tom maʼnoda har tomonlama yetuk va barkamol yoshlarni tarbiyalashda oʻz mavqeiga ega taʼlim-tarbiya maskanlaridan biri sanaladi. Ayni paytda mazkur muassasada 75 nafar xodim faoliyat olib borishadi. Shulardan 65 nafari turli yoʻnalishlar boʻyicha pedagoglar, 10 nafari texnik xodimlardir. Pedagog-xodimlarning 34 nafari oliy, 7 nafari tugallanmagan oliy, 26 nafari esa oʻrta maxsus maʼlumotga ega mutaxassislardir.

Maktabda 69ta toʻgarak tarkibidagi 139ta guruhda 1668 nafar oʻquvchi-yoshlar oʻzlari qiziqqan yoʻnalishlardagi toʻgarak mashgʻulotlarida qatnashish orqali qobiliyat va iqtidorlarini rivojlantirishlari uchun barcha zarur sharoitlar yaratilgan.

Asosiy 7ta, yaʼni madaniyat va sanʼat, texnika konstruktorlik va modellashtirish, jismoniy tarbiya va sport, hunarmandchilik va qoʻl mehnati, turizm va ekologiya, oliy taʼlim muassasalari va maktab taʼlimiga tayyorlov, xorijiy tillar yoʻnalishlari boʻyicha faoliyat olib boruvchi 69ta toʻgarakda shugʻullanayotgan oʻquvchi-yoshlar orasida turli musobaqalar, koʻrik-tanlovlar gʻolib va sovrindorlari bor.

Joriy yilning 15-sentyabr sanasida “Barkamol avlod” bolalar maktabida “Buyuk kelajakka barkamol avlod bilan” shiori ostida “Ochiq eshiklar kuni” tadbiri boʻlib oʻtdi. Yangi oʻquv yili boshlanayotgani munosabati bilan oʻtkazilgan “Ochiq eshiklar kuni” bayram tadbiriga Mangʻit shahridagi 40-, 82-, 76-, 31-sonli umumtaʼlim maktablarining oʻquvchi-yoshlari hamda mahallalardagi ota-onalar faollari taklif etildi.

Tadbir ishtirokchilari, avvalo, maktab oʻquvchi-yoshlarining tasviriy sanʼat, liboslar dizayni, robototexnika va konstruktorlik, yosh dasturchi, bichish-tikish, yumshoq oʻyinchoqlar, toʻqish va kashtachilik, badminton, shaxmat va shashka, stol tennisi, yosh oʻlkashunos va sayyoh, yosh ekolog va tabiatshunos hamda umumtaʼlim fanlari boʻyicha toʻgaraklarda egallagan mahorat, bilim va koʻnikmalari haqida hikoya qiluvchi koʻrgazma bilan yaqindan tanishdilar. Albatta, ota-onalar oʻz farzandlari tomonidan tayyorlangan va koʻrgazmaga qoʻyilgan buyumlarni, ularning turli bellashuv, koʻrik-tanlov va musobaqalarda erishgan yutuqlari haqida hikoya qiluvchi sovrinlarini faxrlanib tomosha qildilar.

Shundan soʻng, oʻquvchi-yoshlar “Barkamol avlod” bolalar maktabining milliy raqs, estrada-vokal toʻgaraklarida ustozlari rahbarligida oʻrgangan kuy-qoʻshiqlari va raqslaridan iborat kontsert dasturini namoyish etdilar. Kontsert dasturining milliy raqs yoʻnalishidagi qismida jajji raqqosa qizlar Xorazm xalq raqslarini, doira raqsi, Andijon polkasi, shuningdek, surxoncha hamda folklor raqslarini mahorat bilan ijro etib, tadbir ishtirokchilarining olqishlariga sazovor boʻldilar.

Estarada-vokal toʻgaragi aʼzolari tomonidan ijro etilgan Vatanni, onani, doʻstlik va tinchlikni, mustaqillikni madh etuvchi qoʻshiqlar ularning ota-onalariga zavq-shavq bagʻishladi, oʻz navbatida ota-onalar farzandlarining iqtidorli, bilimdon, hunarmand insonlar boʻlib kamol topayotganlaridan mamnun ekanliklarini izhor etdilar.

Robiya YOʻLDOShEVA