Ayanchli yoʻl-transport hodisasi sabablari muhokama qilinib, jinoyatchilik va huquqbuzarliklarning oldini olish boʻyicha choralar belgilandi

Mamlakatimizda tinchlik va osoyishtalikni saqlash, jinoyat va huquqbuzarliklarning oldini olish, fuqarolarning huquqlari, erkinliklari va qonuniy manfaatlarini himoya qilish eng asosiy ustuvor vazifalardan biri hisoblanadi.

19-sentyabr kuni Amudaryo tumani hokimligi binosida jinoyatchilik va huquqbuzarlikni oldini olish boʻyicha fuqarolarga tushuntirish ishlari olib borish maqsadida yigʻilish boʻlib oʻtdi.

Yigʻilishda Qoraqalpogʻiston Respublikasi Vazirlar Kengashi raisi Farhod Ermanov, tuman hokimi Sobir Xoʻjametov, Qoraqalpogʻiston Respublikasi Ichki ishlar vaziri, polkovnik Baxtiyar Torebekov, Oʻzbekiston Respublikasi Milliy gvardiyasining Qoraqalpogʻiston Respublikasi boʻyicha boshqarmasi boshligʻi, polkovnik Muxtorjon Yusupov, tumandagi sektorlar rahbarlari, hokim oʻrinbosarlari, profilaktika inspektorlari, mahalla raislari, hokim yordamchilari, xotin-qizlar faollari hamda yoshlar yetakchilari ishtirok etdi.

Prezidentimiz Shavkat Mirziyoyev oʻzining har bir chiqishlarida sohaga masʼul boʻlgan idoralarning asosiy vazifasi jinoyatchini topish va jazolash emas, balki jinoyat sodir etilishiga sharoit yaratib bergan holatlarni aniqlash, ayniqsa tizimli muammolar bilan ishlashga alohida urgʻu qaratishni koʻp bora taʼkidlab oʻtgan.

Yigʻilishda Qoraqalpogʻiston Respublikasi Vazirlar Kengashi raisi Farhod Ermanov soʻzga chiqib, ishtirokchilarga Respublikamiz miqyosidagi umumiy jinoyatchilik toʻgʻrisida maʼlumotlar berdi va tumanda jinoyatlar soni oshgan 12 ta “qizil” toifadagi mahallalar toʻgʻrisida gapirib oʻtib. Shuningdek, tumanda jinoyatchilik natijasida tan-jarohat olish, firibgarlik va yoʻl transport hodisalari bilan bogʻliq jinoyatlar soni oshganligi alohida qayd etildi.

Qoraqalpogʻiston Respublikasi Ichki ishlar vaziri, polkovnik Baxtiyar Torebekov Oʻzbekiston Respublikasi miqyosida joriy yilning 8 oyi davomida 5500 dan ortiq-yoʻl transporti bilan bogʻliq jinoyatlar sodir qilinganligini, shundan, 60 foizi tezlikni oshirish, 20 foizi spirtli ichimlik ichib avtotransport vositasini boshqarish orqali, 15 foizi yoʻl harakati qoidalariga amal qilmaslik hamda qolgan 5 foizi ehtiyotsizlik oqibatida sodir boʻlayotganligini tushuntirib oʻtdi.

Xususan, Ichki ishlar vaziri yaqinda sodir boʻlgan dahshatli yoʻl-transport hodisasi haqida ham toʻxtalib oʻtdi. 2023-yil 16-sentyabr kuni ertalab soat 8:00lar atrofida Amudaryo tumani Nazarxan ovuli hududidan oʻtuvchi A-380 avtomobil yoʻlining 748-kilometrida harakatlanib borayotgan transport vositasi Amudaryo tumanidan Nukus shahri tomonga bir tomonlama harakatlanuvchi oʻz yoʻlidan kelayotganida uning orqa tomonidan harakatlanib kelayotgan yana bir fuqaro boshqaruvidagi avtomashina quvib oʻtishni amalga oshirayotib, qarama-qarshi tomondan harakatlanishga ruxsat etilmagan yoʻnalishda Nukus shahridan Xorazm viloyati tomonga harakatlanayotgan boshqa fuqaro boshqaruvidagi avtomashina bilan toʻqnashib, yoʻl-transport hodisasini sodir qilgan. Natijada bitta avtomashina yonib ketib, avtomashina haydovchisi va 3 nafar yoʻlovchilar hodisa sodir boʻlgan joyda vafot etgan. Ikkinchi avtomashinadagi haydovchi va yoʻlovchi ham kasalxonaga olib ketayotganida yoʻlda vafot etgan. Yana bir fuqaro esa ogʻir tan jarohati olib, kasalxonada vafot etgan. Mazkur holat yuzasidan Qoraqalpogʻiston Respublikasi  IIV  Tergov  boshqarmasi tomonidan  Jinoyat Kodeksining 266-moddasi 3-qismi “a” bandi bilan jinoyat ishi qoʻzgʻatilgan.

Yigʻilishda ushbu ayanchli yoʻl-transport hodisasi sabablari va oqibatlari haqida soʻz borib, kelgusida bu kabi noxushliklarning oldini olish boʻyicha munozara yuritildi.

Umumiy jinoyatchilik muhokamasi chogʻida esa fuqarolar yigʻinlari raislariga ovul va mahallalar hududida jinoyatchilik va huquqbuzarliklar sodir qilishga moyil boʻlgan fuqarolarning roʻyxatini shakllantirib, ular bilan profilaktik suhbatlar oʻtkazish, aniqlangan muammolari boʻyicha profilaktika inspektori yoki sektor rahbarlarini xabardor qilish lozimligi taʼkidlab oʻtildi.

Yigʻilish davomida tuman Yoshlar ishlari agentligi tuman boʻlimi masʼullariga tumandagi barcha 14 yoshdan 30 yoshgacha boʻlgan yoshlarning roʻyxatini shakllantirib, jinoyat sodir qilishga moyil yoshlarni aniqlash va ular bilan tizimli profilaktik ishlarni tashkil qilish topshirildi.

Tuman IIB boshligʻi, podpolkovnik Jamoladdin Yusupov ham soʻzga chiqib, tumanda firibgarlik jinoyatining oshishiga asosiy sabab koʻpchilik fuqarolarning huquqiy bilimga ega boʻlmasligi natijasida uyali aloqa telefonlariga kelgan sms kodlarni ishonib boshqalarga berish hollari koʻp uchrayotgani, natijada koʻpchilik odamlar firibgarlarning tuzogʻiga tushib qolayotganini aytib, bu jinoyatlarning oldini olish maqsadida targʻibot tadbirlarini koʻpaytirish zarurligini taʼkidladi.

Yigʻilish yakunida jinoyatchilik va huquqbuzarliklarning oldini olish boʻyicha tegishli masʼullarga topshiriqlar berildi.

Tuman hokimligi Axborot xizmati