Sahna orqali fikrlashuv: muhokama markazida – ayol huquqlari
Ijtimoiy muammolarni jamoatchilik bilan birgalikda muhokama qilish madaniyati soʻnggi yillarda fuqarolik jamiyati institutlari faoliyatining ajralmas qismiga aylanib bormoqda. Nodavlat notijorat tashkilotlarining salohiyatini mustahkamlash, ularning davlat idoralari bilan hamkorligini yoʻlga qoʻyish esa bu boradagi ishlarning samarasini oshirishga xizmat qilmoqda. Ayniqsa, oila va xotin-qizlar mavzusidagi masalalar ochiq muloqot, oʻzaro ishonch hamda izchil hamkorlikni talab etadi. Amudaryo tumanida “Ayol taqdiri: sahna orqali fikrlashuv” loyihasi doirasida oʻtkazilgan tadbir ham shu maqsadga qaratilgani bilan ahamiyatlidir.
Tadbir Yevropa Ittifoqi tomonidan moliyalashtirgan “Oʻzbekistondagi nodavlat notijorat tashkilotlarining institutsional va dasturiy salohiyatini mustahkamlash hamda nodavlat notijorat tashkilotlari bilan davlat idoralari oʻrtasidagi munosabatlarni yanada yaxshilash” loyihasi doirasida tashkil etildi.
Loyihani Fuqarolik tashabbuslarini qoʻllab-quvvatlash markazining Qoraqalpogʻiston hududiy boʻlimi amalga oshirmoqda. Davra suhbatining asosiy maqsadi — loyiha vazifalarini jamoatchilikka tanishtirish, hamkor tashkilotlar bilan aloqalarni kuchaytirish hamda oilaviy zoʻravonlik va xotin-qizlar huquqlari yuzasidan ochiq fikr almashish uchun qulay muhit yaratishdan iborat.
Loyihaning oʻziga xosligi shundaki, ijtimoiy masalalar anʼanaviy seminar va lektsiyalar bilan cheklanmay, forum-teatr hamda interaktiv fikrlashuv usullari orqali koʻrib chiqildi. Tajribali aktyorlar ishtirokida real hayotda uchraydigan holatlarni aks ettiruvchi sahna koʻrinishlari namoyish etilishi esa murakkab mavzularni quruq maʼruza shaklida emas, balki jonli voqea tarzida yetkazish imkonini berdi.
Spektakl namoyishi vaqtida tomoshabinlar shunchaki kuzatuvchi boʻlib qolmadi. Sahna koʻrinishi davomida ishtirokchilarga “Agar siz shu vaziyatga tushib qolsangiz, qanday yoʻl tutgan boʻlardingiz?” degan savol asosida fikr bildirish imkoniyati berildi, ular vaziyatni turli nuqtai nazardan baholab, yechim yoʻllarini taklif qilishdi. Shu tariqa muhokama zaldagi har bir ishtirokchining fikri hisobiga boyib bordi.
Loyiha doirasida shuningdek, fuqarolarga huquqiy va psixologik koʻmak ham koʻrsatildi. Murojaatlar yuzasidan tajribali yurist va psixologlar maslahat berdi, bu esa aholining oʻz huquqlarini anglashi, mavjud himoya mexanizmlaridan xabardor boʻlishiga yoʻl ochadi.
Stsenariy muallifi Nargiza Qalandarova, rejissyor Lizaxon Oʻrazimbetova tomonidan sahnalashtirilgan ushbu spektakl va shu mavzudagi davra suhbati Qoraqalpogʻistonning uchta hududida, kamida 600 nafarga yaqin ishtirokchini jalb qilgan holda oʻtkazilishi rejalashtirilgan. Bu kabi tashabbuslar ayollarning huquqiy savodxonligini kuchaytirish, oilaviy zoʻravonlikning oldini olish, fuqarolar, fuqarolik jamiyati institutlari va davlat organlari oʻrtasidagi sheriklikni yanada mustahkamlashga xizmat qilishi shubhasiz.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
