Tumanimizda “Bolalarni erta yoshdan rivojlantirishni takomillashtirish” mavzusida seminar boʻlib oʻtdi

Maktabgacha taʼlim tashkilotlarida taʼlim-tarbiya sifati va samaradorligini oshirish koʻp jihatdan u yerda faoliyat olib borayotgan pedagog-xodimlar, tarbiyachilarning bilim, malaka va tajribasiga bogʻliq. Shu bois ham, ularning bilim va malakasini oshirib borish muhim vazifalardan biri hisoblanadi. Shularni inobatga olgan holda Maktabgacha va maktab taʼlimi vazirligi tomonidan maktabgacha taʼlim tashkilotlari pedagog-xodimlarining malakasini oshirish boʻyicha qisqa muddatli kurslar tashkil etilib, oʻquv mashgʻulotlari, seminarlar oʻtkazilmoqda.

Amudaryo tumanida ham tuman Maktabgacha va maktab taʼlimi boʻlimiga qarashli Maktabgacha taʼlim tashkilotlarida joriy yilning 20-noyabrdan 24-noyabri oraligʻida qisqa muddatli malaka oshirish kurslari tashkil etildi.

Maktabgacha taʼlim tashkilotlari xodimlarining bilim va malakalarini oshirish maqsadida qisqa muddatli oʻquv kurslari Oʻzbekiston Respublikasi Maktabgacha va maktab taʼlimi vazirligi huzuridagi Maktabgacha taʼlim agentligi hamda Jahon banki bilan hamkorligidagi “Bolalarni erta yoshdan takomillashtirish” investitsion loyihasining 1-komponenti – “Maktabgacha taʼlim sifatini oshirish” dasturi doirasida boʻlib oʻtdi.

Ushbu dastur 40 soatga moʻljallangan boʻlib, unda tumandagi 52ta maktabgacha taʼlim tashkilotlaridan jami 90 nafar pedagog xodimlar ishtirok etdilar. Qisqa muddatli malaka oshirish kurslariga xorijiy mutaxassislar ham jalb etilib, mashgʻulotlar uch bosqichda oʻtkazildi.

Keyingi yillarda davlatimiz rahbarining tashabbusi bilan maktabgacha taʼlim tizimini rivojlantirishga alohida eʼtibor qaratilmoqda. Jumladan, maktabgacha taʼlim tizimini tubdan isloh qilish, yangi muassasalar barpo etish, mavjudlarini rekonstruktsiya qilish, ularning moddiy-texnik bazasini mustahkamlash ustuvor masala sifatida qaralmoqda. Bolalarni maktab taʼlimiga tayyorlash darajasini tubdan yaxshilash, taʼlim-tarbiya jarayoniga zamonaviy dastur va texnologiyalarni tatbiq etish, bolajonlarning intellektual salohiyatini yuksaltirish, har jihatdan barkamol etib tarbiyalash borasida ham keng koʻlamli ishlar amalga oshirilmoqda.

Mashgʻulotlar davomida mamlakatimizda oʻsib kelayotgan avlodni har tomonlama yetuk qilib voyaga yetkazish, taʼlim-tarbiya jarayoniga taʼlimning samarali shakllari va usullarini joriy etish maktabgacha taʼlim tashkilotlari zimmasiga ulkan masʼuliyat yuklashi yana bir bora eʼtirof etildi. Uzluksiz taʼlimning bosh boʻgʻini hisoblanmish maktabgacha taʼlim tashkilotlarining asosiy vazifasi bolani sogʻlom, har tomonlama rivojlangan va erkin shaxs sifatida shakllantirish, bolalarning qobiliyatlarini aniqlab, rivojlantirish, taʼlim olishga boʻlgan intilishini tarbiyalashdan iborat ekani alohida taʼkidlandi.

Seminar yakunida ishtirokchilarga maxsus sertifikatlar topshirildi.

Koʻp yillik tajribaga ega soha xodimlari shuningdek, xorijiy mutaxassislar tomonidan bolalarning bilim va intellektual salohiyatini, fikrlash qobiliyatini erta yoshdan rivojlantirishdagi zamonaviy metodikalar, ilgʻor xorijiy tajribalar va psixologik yondashuvlarning uzviyligi boʻyicha qiziqarli maʼruzalar oʻqilgan ushbu seminarda bu boradagi ilgʻor xorijiy tajribalar haqida ham maʼlumotlar berildi.

Ishtirokchilar tomonidan maʼruzalar hamda mazkur yoʻnalishdagi ishlarni yanada yuqori bosqichga koʻtarish yuzasidan taklif, fikr va mulohazalar bildirildi.

Mashgʻulotlarda ishtirokchilar oʻzlarining faoliyatiga doir koʻpgina bilimlarga ega boʻldilar hamda oʻzlarini qiziqtirgan savollarga mutaxassislar tomonidan batafsil javob oldilar.

Tuman hokimligi Axborot xizmati