31-sonli maktabda qoraqalpoq tili kuni munosabati bilan tadbir oʻtkazildi

Til – davlat timsoli, mulki, ruhi, millatning madaniy va maʼnaviy boyligi, xalqning madaniyati, urf-odati, uning turmush tarzi, tarixidir.

1989-yilning 1-dekabr kuni qoraqalpoq tilining huquqiy asoslarini belgilash boʻyicha “Davlat tili toʻgʻrisida”gi Qonun qabul qilinib, unga koʻra qoraqalpoq tiliga – Davlat tili maqomi berildi. Qoraqalpoq tili oʻzining qonuniy maqomi va himoyasiga ega boʻldi.

Respublikamizda har yili ushbu bayram keng nishonlanib, turli uchrashuvlar, badiiy kechalar oʻtkazilib kelinmoqda.

Sana munosabati bilan 2-dekabr kuni Amudaryo tumani Maktabgacha va maktab taʼlimi boʻlimiga qarashli 31-sonli maktabda “Marteben balent bolsin, ana tilim” deb nomlangan tadbir boʻlib oʻtdi.

Tadbirda maktab direktori Nilufar Davletova, uning maʼnaviy-maʼrifiy ishlar boʻyicha oʻrinbosari Dilbar Oʻrozaliyeva, maktabning qoraqalpoq tili va adabiyoti fani oʻqituvchilari hamda oʻquvchilar ishtirok etdilar.

Tadbirni maktab direktori Nilufar Davletova ochib berdi hamda yigʻilgan oʻquvchi-yoshlarni qoraqalpoq tiliga davlat tili maqomi berilgan kun bilan tabrikladi.

Milliy til davlatning rivoji, qolaversa, uning millat sifatida dunyo tamaddunida oʻz munosib oʻrnini egallashi uchun muhim ahamiyat kasb etadi. Buyuk tariximiz va ajdodlarimizning merosi ham aynan til orqali bizgacha yetib keladi.

Tadbir davomida maktabning qoraqalpoq tili va adabiyoti oʻqituvchisi Goʻzal Kamolova qoraqalpoq tilining tarixi, ahamiyati va uni yanada rivojlantirish borasida qilinayotgan ishlar hamda tilning jamiyatimiz hayotida tutgan oʻrni haqida tushunchalar berib oʻtdi.

Til har bir xalqning milliy oʻzligining timsoli, maʼnaviyatining asosi hisoblanadi. Soʻnggi yillarda qoraqalpoq tiliga davlat tili maqomi berilgan kun yurtimizda yangicha mazmun va ruhda bayram qilinayotgani tilining mavqei hamda kuch-qudrati yuksalayotganini koʻrsatmoqda.

Tadbir davomida soʻzga chiqqanlar oʻquvchilarga qoraqalpoq tilini boyitish maqsadida amalga oshirilayotgan chora-tadbirlar, qabul qilinayotgan normativ-huquqiy hujjatlarning mazmun-mohiyati haqida batafsil maʼlumot berdi. Shuningdek, oʻquvchilarga qoraqalpoq tilining sofligini saqlash zarurligi, uni yanada boyitish uchun har bir shaxs hissa qoʻshishi lozimligini aytib oʻtdi.

Darhaqiqat, bugungi kunda qoraqalpoq tilining oʻrni va obroʻsini orttirish boʻyicha koʻplab amaliy ishlar qilinmoqda. Bir qator ilmiy va badiiy kitoblar qoraqalpoq tilida chop etilib, oʻquvchilar qoʻliga yetib bormoqda.

Aytish kerakki, amalga oshirilayotgan bu kabi chora-tadbirlar qoraqalpoq tiliga boʻlgan yuksak eʼtiborning yorqin namunasidir.

Tadbir davomida namoyish etilgan sahna koʻrinishlari hamda yangragan kuy-qoʻshiqlar yigʻilganlarga yanada koʻtarinki kayfiyat ulashdi.

Oygul Rajabova