KITOB – MAʼNAVIYaT SARChAShMASI

Kitob insonning eng yaqin doʻsti va eng yaxshi yoʻldoshidir. U donolik va bilim manbaidir. Kitob men uchun haqiqiy xazina kaliti va tafakkur sarchashmasi. Shu bois menda kitobga muhabbat va uni oʻqishga ishtiyoq kuchli. Menimcha, insonning maʼnaviyati va fikrlashi oʻqigan kitoblari orqali yuksaladi. Ilmni chuqur egallashning eng yaxshi yoʻli – kitob oʻqishdir. “Kitob – bilim manbai”, deydi dono xalqimiz. Bu gap isbot talab qilmas haqiqatdir, chunki inson har qanday hayotiy bilimni asosan kitobdan oladi.

Badiiy asar yoki jahon adabiyotini oʻqigan insonning dunyoqarashi va hayotga munosabati oʻzgaradi, boshqacha koʻz bilan qaray boshlaydi. Alisher Navoiy bobomiz deydilarki: “Kitob – beminnat ustoz, bilim va maʼnaviy yuksalishga erishishning eng asosiy manbaidir”. Darhaqiqat, barcha bilimlar, maʼnaviy boyliklar kitobda mujassam.

Men Zulfiya Moʻminovaning sheʼrlarini, ayniqsa, “Bolaga kitob bering” sheʼrini juda sevib oʻqiyman.

Bola oqqush, oq kaptar,
Dunyolardan bexabar,
Yovuzlik topmay xabar,
Bolaga kitob bering.
Bu sheʼr mening sevimli sheʼrlarim sirasiga kiradi. Har safar shu misralarni oʻqiganimda kitob insonni oʻzgartira olishi rost ekanligini tushunib yetaman.

Men bir insonni bilardim. U gʻirt dangasa, hayotga befarq, hech kimning gapini qulogʻiga olmaydigan kimsa edi. Kunlardan bir kun unga Tohir Malikning “Alvido, bolalik” asarini sovgʻa qilgan edim. Kitobni oʻqib chiqqanidan keyin u birdan oʻzgardi. Shundan soʻng, badiiy asarlar oʻqishga juda qiziqa boshladi va boʻsh vaqtini kitob oʻqish bilan oʻtkazadigan boʻldi.

Kitobni koʻp oʻqigan odam odobli, samimiy va toʻgʻrisoʻz boʻladi, qingʻir va yomon ishlarga qoʻl urmaydi. Hayotda toʻgʻri yoʻl tanlashni biladi. Shu sababli ota-onalarning oʻz farzandlariga kitob sovgʻa qilishlarini istar edim. Oʻzim ham yaqin doʻstlarimga koʻpincha kitob sovgʻa qilaman.

Soʻnggi yillarda yoshlar oʻrtasida kitobxonlikni targʻib qilishga jiddiy eʼtibor qaratilmoqda. Chunki millatning yorqin kelajagi yuksak maʼnaviyatli avlod tarbiyasi bilan bogʻliqdir. Shu maqsadda taʼlim muassasalarida kitobxon yoshlar bilan ishlash, turli kitobxonlik tadbirlarini tashkil etish yoʻlga qoʻyilgan.

Bizning maktabimizda ham “Yosh kitobxon” toʻgaragi faoliyat yuritmoqda. Toʻgarak aʼzolari koʻplab tashkiliy ishlarni amalga oshirmoqdalar. Jumladan, oʻquv yilining birinchi choragida oldindan belgilab berilgan kitoblar tahlili, ikkinchi chorakda esa badiiy asarlar boʻyicha zakovat oʻyini oʻtkazildi. Hozirda ham 6-sinf oʻquvchilariga “Sariq devni minib”, 7-sinf oʻquvchilariga “Shum bola”, 8-sinf oʻquvchilariga “Mehrobdan chayon”, 9-sinf oʻquvchilariga “Chinor”, “Oʻtgan kunlar”, 10-sinf oʻquvchilariga “Asrga tatigulik kun” asarlarini oʻqib chiqish topshiriq qilib berilgan. Maktabimizda darslardan keyin ham oʻquvchilarning, tengdoshlarimning qoʻllarida badiiy kitoblarni koʻrib, juda xursand boʻlaman.

Yoshlarni kitob oʻqishga qiziqtirish nafaqat oʻqituvchilar, balki ota-onalar ham oʻz farzandlarini boʻsh vaqtlarida kitob oʻqishga qiziqtirib borishlari kerak.

Zulfiya Moʻminova yozgan satrlardagi:
Qingʻir yoʻlga kirmasdan,
Peshonaga urmasdan,
Kimdir pichoq bermasdan,
Bolaga kitob bering – degan jumlalar ham hammamizni yana bir bor ogohlikka chaqirayotganday goʻyo.

Kitobni behudaga maʼnaviyat sarchashmasi, deyishmaydi. Kitobning hayotimizdagi oʻrni beqiyos. Shuning uchun barcha tengdoshlarimni, oʻzim kabi yoshlarni kitoblar bilan oshno boʻlishga chaqirib qolaman.

Diana Sarsenboyeva, Amudaryo tumani ixtisoslashtirilgan maktabining 8-sinf oʻquvchisi.