NAVOIYXONLIK TADBIRI BARChAGA MAʼNAVIY RUH BAGʻIShLADI

Buyuk mutafakkir, shoir, davlat va jamoat arbobi, ulugʻ bobokalonimiz Mir Alisher Navoiy dahosiga sadoqat buyuk xalq va millatga nisbatan ehtirom va hurmat ifodasidir. Chunki dunyo xalqlari Navoiy deganlarida oʻzbek millatini, uning betakror soʻz sanʼatini, milliy maʼnaviy qadriyatlarini oʻzida mujassam etgan bebaho mumtoz adabiyotini tushunadilar. Bu goʻzal adabiyot Navoiy asarlari bilan shunchalar qadr-qimmatliki, 583-yildan beri bu dilbar sheʼriyat, nafis gʻazaliyot, yuksak tafakkur qudratini oʻzida mujassam etgan adabiy-badiiy, falsafiy dostonlarni hamon ahli dunyo oʻqib-oʻrganishdan, ibratlar olishdan, bu asarlardagi hikmatlar ummonidan hayratlanishdan aslo toʻxtamaydilar.

Har yili ulugʻ bobokalonimiz tavallud topgan 9-fevral sanasida nafaqat mamlakatimizda, balki butun turkiy olamda, butun dunyoda shoir asarlarining millionlab muxlislari Navoiy dahosiga cheksiz hurmat va ehtirom koʻrsatadilar. Shu kuni Navoiy gʻazal va ruboiylari, tuyuq va masnaviy, muxammaslari turfa xalqlar tillarida jaranglar sochadi.

Mamlakatimizda esa yil davomida Navoiyxonlik tadbirlari, Navoiy asarlari bilimdonlari koʻrik-tanlovlari oʻtkazilishi doimiy anʼanaga aylangan. Talaba-yoshlar, umumtaʼlim maktablarining oʻquvchi-yoshlari oʻrtasida oʻtkaziladigan, “Xamsa”xonlik, gʻazalxonlik kechalari, guruhlararo, sinflararo bellashuvlar oʻsib kelayotgan yosh avlod qalbida vatanparvarlik, doʻstlik va totuvlik, bagʻrikenglik tuygʻularini yanada mustahkamlab, Navoiy asarlarini oʻrganishga boʻlgan ishtiyoqlari ortishiga xizmat qilmoqda.

Amudaryo tuman maktabgacha va maktab taʼlimi boʻlimi tasarrufidagi 1-sonli umumtaʼlim maktabi oʻquvchi-yoshlari uchun Navoiyxonlik kechalari haqiqiy sheʼriyat bayrami kabi joʻshqin kayfiyat bagʻishlaydi. Maktabning ona tili va adabiyot fani oʻqituvchilari tomonidan hamjihatlikda tashkil etiladigan “Biz – Navoiy avlodlarimiz”, “Navoiy asarlari bilimdonlari”, “Navoiy gʻazallari – yuksak maʼnaviyat sarchashmasi” mavzularidagi sinflararo bellashuvlar, sheʼriyat va gʻazalxonlik kechalari har galgi oʻquv yili davomida anʼanaviy tarzda oʻtkazilib kelinayotgani oʻquvchi-yoshlarning Navoiy asarlari mazmun-mohiyatini chuqur tushunishlariga, qiziqish bilan oʻrganishlariga imkoniyat yaratmoqda.

Oʻquvchi-yoshlar esa oʻz tashabbus va intilishlari tufayli tez-tez Navoiy asarlari asosida bahri-baytlar aytishib, oʻzaro fikr almashadilar, bir-birlarining bilimlarini sinovdan oʻtkazadilar. Alisher Navoiy tavallud topgan 9-fevral sanasi oldidan maktabda har bir sinf alohida dastur asosida bayramona tadbirlar tashkil etishadi, shoir dostonlaridan parchalar oʻqib, gʻazalxonlik kechalarini oʻtkazishadi.

“Ulugʻ bobokalonimiz hayoti biz uchun ibrat” mavzusida Alisher Navoiy tavalludining 583 yilligi munosabati bilan tashkillashtirilgan tadbir ham oʻquvchi-yoshlarning shoir dahosiga hurmat va ehtiromining yorqin ifodasi boʻldi.

Tadbirni maktab direktori Dilrabo Yoʻldosheva ochdi va barchani buyuk mutafakkir, shoir, davlat va jamoat arbobi, gʻazal mulkining sultoni Alisher Navoiy tavalludining 583 yilligi bilan samimiy tabrikladi. Shu bilan birga Alisher Navoiyning turkiy xalqlar adabiyotiga qoʻshgan buyuk hissasi, oʻzbek mumtoz adabiyotining asoschisi sifatidagi beqiyos katta xizmati va asarlarining hech qachon qadr-qimmatini yoʻqotmaydigan hikmatlar xazinasi ekanligini alohida taʼkidlab oʻtdi.

Tadbir davomida oʻquvchilar Alisher Navoiy hayoti va ijodi xususida maʼruzalar qildilar, shoir gʻazallari, ruboiy va tuyuqlaridan aytib berdilar.

Navoiy asarlari asosida savol-javoblar orqali bir-birlarining bilimlarini sinovdan oʻtkazdilar, bahri-baytlar aytishdilar.

Oʻquvchi-yoshlar tomonidan tayyorlangan sahna koʻrinishi orqali Alisher Navoiyning shoir va davlat arbobi sifatidagi faoliyati, ilm-u zakovatda tengsizligi, xalqparvar va saxovatpesha insonligi mahorat bilan koʻrsatib berildi.

“Ulugʻ bobokalonimiz hayoti biz uchun ibrat” mavzusida tashkillashtirilgan mazkur tadbir haqiqatan ham har bir ishtirokchi uchun biri-biridan hikmatli gʻazal va ruboiylar, tuyuqlar haqiqiy ibrat va saboq boʻldi va barchaga maʼnaviy ruh bagʻishladi.

Robiya YOʻLDOShEVA.