DURUNKI MAHALLASIDA YoZUVChI-ShOIR VA IJODKORLARNING YoShLAR BILAN UChRAShUVI OʻTKAZILDI

Mahallalarda, oilalarda ijtimoiy-maʼnaviy muhit barqarorligini taʼminlashga hissa qoʻshish maqsadida amunews.uz veb-saytining “Sogʻlom muhit – sogʻlom hayot” nomli grant loyihasi doirasida turli tadbirlar oʻtkazilib kelinmoqda. Grant loyihasi ish rejasiga muvofiq ijrochilar tomonidan joylarga borgan holda aholi oʻrtasida oʻtkazilayotgan mazkur tadbirlar oilalardagi maʼnaviy muhit barqarorligiga salbiy taʼsir koʻrsatuvchi turli illatlar koʻpayishining oldini olishda, sogʻlom hayotning ahamiyatini anglab yetishlarida muhim oʻrin tutmoqda.

16-fevral kuni loyihaning navbatdagi ish rejasiga koʻra Durunki mahallasidagi 56-sonli maktabda “Jayhun ilhomlari” nodavlat notijorat tashkiloti bilan hamkorlikda yozuvchi-shoir va ijodkorlarning yoshlar bilan uchrashuvi tashkil etildi. Uchrashuvda “Jayhun ilhomlari” nodavlat notijorat tashkiloti aʼzolari Qoraqalpogʻistonda xizmat koʻrsatgan jurnalist, Oʻzbekiston Yozuvchilar uyushmasi va Jurnalistlar ijodiy uyushmasi aʼzosi Robiya Yoʻldosheva, Oʻzbekiston Jurnalistlar ijodiy uyushmasi aʼzosi, jurnalist Ozoda Xudoyberganovalar hamda maktab oʻqituvchilari va oʻquvchilari qatnashishdi. Tadbirni maktab direktori Arzigul Xudoyberganova ochib berdi va tashrif buyurgan ijodkorlarni yoshlarga tanishtirib oʻtdi.

Tadbirda dastlab amunews.uz veb-saytining “Sogʻlom muhit – sogʻlom hayot” nomli grant loyihasi hamda ushbu grant loyihasi doirasida amalga oshirilayotgan tadbirlar, ularning ahamiyati, erishilayotgan natijalar haqida batafsil maʼlumotlar berildi. Loyiha doirasida ovul va mahallalarda aholi oʻrtasida ichkilikbozlik, giyohvandlikka berilish, yaqin qarindoshlar oʻrtasidagi va erta turmushning oldini olish borasida tajribali shifokorlar, nuroniy otaxon va onaxonlar ishtirokida davra suhbatlari tashkil qilinayotgani, shu mavzularda maqolalar, telelavhalar tayyorlanib, tumandagi ommaviy axborot vositalarida yoritilayotgani xususida soʻz yuritildi. Shuningdek, loyiha doirasidagi tadbirlar Prezidentimizning 5ta muhim tashabbusini chekka qishlovlarda yanada faol amalga oshirishda muhim oʻrin tutayotgani, kitobxon yoshlarning safini kengaytirishga qaratilgan sayyor kitoblar karvonlari, turli tanlovlarga koʻplab yoshlar qamrab olinayotgani bayon qilindi.

 Uchrashuv tadbiri davomida kitobxonlikning ahamiyati, badiiy ijod, oʻzbek mumtoz adabiyoti namoyandalari va turli davrlarda yashab ijod qilgan taniqli adiblarning hayoti, ijodi, ularning milliy adabiyotimizni rivojlantirishga qoʻshgan hissalari toʻgʻrisida qizgʻin suhbat oʻtkazildi. Undan tashqari, milliy adabiyotimizni rivojlantirish, qalam ahlining samarali ijod qilishi uchun qulay shart-sharoit yaratish, yosh isteʼdod egalarini aniqlash va har tomonlama qoʻllab-quvvatlashga alohida eʼtibor qaratilayotgani, yurtimizning turli hududlarida ijod qilayotgan yosh isteʼdod egalarini har tomonlama ragʻbatlantirish, jamiyatda oʻz oʻrnini topishiga koʻmaklashish davlatimiz siyosatining ustuvor yoʻnalishlaridan biriga aylangani eʼtirof etildi.

Tadbirda mamlakatimizda yosh avlodning taʼlim olishi, isteʼdod va iqtidorlarini namoyon etishlari uchun yaratilgan sharoitlar ham tilga olindi. Oʻquvchilarning bugun ustozlaridan fan sirlarini chuqur oʻrganib, kelajakda jamiyat taraqqiyotiga munosib hissa qoʻshadigan shaxs boʻlib voyaga yetishlari zarurligi uqtirildi. Shuningdek, har bir shaxsning, ayniqsa, yoshlarning bilimli, zukko boʻlishida, intellektual rivojlanishida kitoblarning oʻrni va ahamiyati tushuntirildi.

Taniqli ijodkorlar yoshlarga oʻz ijodiy faoliyati, hayotidagi qiziqarli voqealar, ilk va bugungi kundagi ijodiy ishlari haqida ham soʻzlab berishdi. Yoshlarning adabiyot sohasidagi savollariga javob berar ekan, oʻz ijodlaridan namunalar oʻqib berdilar. Oʻz navbatida yoshlar ham zavqlanib, oʻzlari sevgan ijodkorlar qalamiga mansub boʻlgan sheʼrlarini yod aytdilar.

Durunki mahallasida grant loyihasi doirasida tashkil etilgan ijodiy uchrashuv nihoyatda qiziqarli oʻtdi va sheʼriyatga, adabiyotga qiziquvchi yoshlar uchun haqiqiy mahorat darsi boʻldi.

M.Xalillayeva.