Tumanimizdagi kichik sanoat zonasidagi tadbirkorlar faoliyati yanada rivojlantirilmoqda

Amudaryo tumanida tadbirkorlik faoliyatini rivojlantirish borasida samarali ishlar amalga oshirilmoqda. Davlatimiz tomonidan tadbirkorlarga berilayotgan imkoniyatlar targʻib qilinib, tadbirkorlar har tomonlama qoʻllab-quvvatlanmoqda.

Tumandagi kichik sanoat zonasida ish yuritayotgan tadbirkorlar bu kabi imtiyoz va imkoniyatlardan unumli foydalanib, oʻz faoliyatlarini yanada kengaytirmoqdalar.

Jumladan, kichik sanoat zonasida joylashgan “Tamara Tekstil” MChJ Prezidentimizning “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi farmonida belgilab berilgan imkoniyatlardan foydalanib, ishchi ayol-qizlar soni 15 nafardan 44 nafarga oshirdi. Ayni paytda, tumanimizdagi ovul mahallalarda band boʻlmagan xotin-qizlar kasb-hunarga oʻqitilib, mazkur MChJga ishga joylashmoqda hamda ularning bandligi taʼminlanmoqda.

Taʼkidlash joizki, davlatimiz rahbarining Qoraqalpogʻiston Respublikasiga tashrifi mobaynida hududni ijtimoiy-iqtisodiy rivojlantirish borasida qator islohotlarni ilgari surildi. Xususan, Qoraqalpogʻiston Respublikasida tadbirkorlik faoliyatini tashkil etishni va yuqori qoʻshilgan qiymatli raqobatbardosh mahsulotlar ishlab chiqarishni ragʻbatlantirish orqali hududga investitsiyalarni jalb qilish uchun qulay sharoitlar yaratish, shuningdek, tadbirkorlarning takliflarini bevosita oʻrganish asosida kelgusi yetti yilda rivojlantirishning belgilangan pirovard natijalariga erishish maqsadida imzolangan “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi Prezident farmoni tadbirkorlik faoliyati rivojini yangi bosqichga koʻtarishda muhim dasturulamal boʻlmoqda.

Kichik sanoat zonasidagi tashabbuskor tadbirkorlardan yana biri Jasur Bobojonov davlatimiz rahbarining mazkur farmoniga asosan imtiyozli kredit olgan. Ushbu kredit mablagʻlarini temir mahsulotlari ishlab chiqarish uchun zarur boʻlgan zamonaviy uskunalarni olib kelishga yoʻnaltirgan. Hozirda tadbirkor 15 nafardan ortiq yigitlarni ish bilan taʼminlab, tuman iqtisodi rivojiga munosib hissa qoʻshmoqda. Kelgusida yangi zamonaviy uskunalar xarid qilib, yangi ish oʻrinlari yaratish hamda ish bilan band boʻlmagan fuqarolarning bandligini taminlashni rejalashtirmoqda.

Kichik sanoat zonasidagi chorva mollari uchun omuxta yem ishlab chiqarishga ixtisoslashgan “Yuksalish Broker Servis” MChJ ham yaratilayotgan imkoniyatlardan samarali foydalanib faoliyat yuritmoqda. Mazkur MChJ mototransport vositalarining ehtiyot qismlarini chet davlatlaridan olib kelish hamda yigʻib terish ishlarini amalga oshirib kelmoqda. Endilikda tadbirkor chet eldan kerakli uskunalarni olib kelib, mototransport vositalarining ehtiyot qismlarini ishlab chiqarishni ham rejalashtirmoqda.

Qayd etish joizki, davlatimiz rahbarining “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi farmoni hududdagi tadbirkorlar uchun keng imkoniyat eshiklarini ochdi.

Mazkur hujjat Qoraqalpogʻiston Respublikasining mavjud ijtimoiy-iqtisodiy, shu jumladan ishlab chiqarish va investitsiya salohiyatidan samarali foydalanish, tadbirkorlik faoliyatini rivojlantirish va yuqori qoʻshilgan qiymatga ega raqobatbardosh mahsulotlar ishlab chiqarishni ragʻbatlantirish, tadbirkorlarga koʻrsatiladigan moliyaviy xizmatlar koʻlamini kengaytirish, infratuzilmaviy shart-sharoitlarni yaratib berish orqali aholi bandligini taʼminlash hamda hududning iqtisodiy va ijtimoiy rivojlanishini yangi bosqichga olib chiqish kabi ustuvor maqsadlarga xizmat qilmoqda.

Charos Arslonova, tuman hokimligining Axborot xizmati rahbari.