“EZGULIK – ShIORIMIZ, MAʼRIFAT – QUROLIMIZ” ShIORI OSTIDA MAʼNAVIY-MAʼRIFIY TADBIR BOʻLIB OʻTDI

Maʼnaviy-maʼrifiy ishlar samaradorligini yanada oshirish maqsadida Qoraqalpogʻiston Respublikasining barcha tumanlari boʻylab 13-20-mart kunlari mobaynida “Ezgulik – shiorimiz, maʼrifat – qurolimiz” shiori ostida joylarda maʼnaviy-maʼrifiy tadbirlar tashkil etilmoqda. Ana shunday tadbirlardan biri Amudaryo tumani 9-sonli Bolalar musiqa va sanʼat maktabida boʻlib oʻtdi.

Targʻibot tadbirida tuman Maktabgacha va maktab taʼlimi boʻlimi boshligʻi Yalgʻash Shomurodov, Joʻqorgʻi Kenges deputati Sanobar Xoʻjamurodova, Maʼnaviyat va maʼrifat markazi tuman boʻlimi boshligʻi Islom Matkarimov hamda tumandagi umumtaʼlim maktablarining maʼnaviy-maʼrifiy ishlar boʻyicha direktor oʻrinbosarlari ishtirok etdilar.

Tadbir ishtirokchilari dastlab musiqa maktabi oʻquvchilarining ijod mahsullaridan tashkil etilgan koʻrgazma bilan tanishdilar. Ular oʻquvchilar tomonidan did bilan tayyorlangan ijod namunalarini katta qiziqish bilan tomosha qilib, har biriga yuqori baho berdilar.

Tadbirga tashrif buyurgan masʼullar yurtimiz boʻylab 13-20-mart kunlari mobaynida “Ezgulik – shiorimiz, maʼrifat – qurolimiz” shiori ostida joylarda maʼnaviy-maʼrifiy tadbirlar oʻtkazilayotgani, jumladan, tumanimizda ham faol xotin-qizlar, ibratli oila bekalari, fan, taʼlim, madaniyat kabi yoʻnalishlarda muvaffaqiyatga erishgan yoshlarni jalb etgan holda tashkil etish lozimligini taʼkidlashdi.

Mazkur tadbirlarda yurtimiz ayollariga hurmat-ehtirom koʻrsatish, ularning jamiyatdagi oʻrnini yuksaltirishga alohida eʼtibor qaratish kerakligi aytilib, Ramazon oyi va Navroʻz bayrami sharofati bilan ehtiyojmand oilalar holidan xabar olish, umuman, xalqimiz va yoshlarimiz ong-u shuurida vatanparvarlik, yurtga sadoqat tuygʻularini yanada kamol toptirish kabi ezgu ishlarni amalga oshirish lozimligi toʻgʻrisida soʻz bordi.

Taʼkidlab oʻtilganidek, mamlakatimizda xotin-qizlarimiz uchun ham munosib sharoitlarni yaratib berish, ularni har tomonlama qoʻllab-quvvatlash davlat siyosatining muhim yoʻnalishiga aylangan. Davlatimiz rahbari ham joriy yil 7-mart kuni Xalqaro xotin-qizlar kuniga bagʻishlangan tantanali marosimdagi nutqida bunga alohida eʼtibor qaratdi. Barcha ayollarga murojaat qilib, maʼnaviy tarbiya ishlarini endi mutlaqo yangicha usulda olib borish, “Ezgulik – shiorimiz, maʼrifat – qurolimiz” degan gʻoya asosida bu jarayonni avvalo oiladan, mahalladan boshlash borasida vazifalar belgilab berildi.

Tadbir davomida soʻzga chiqqanlar shu xususda soʻz yuritib, mamlakatimizda xotin-qizlarimiz uchun ham munosib sharoitlarni yaratib berish, ularni har tomonlama qoʻllab-quvvatlash davlat siyosatining muhim yoʻnalishiga aylanganini eʼtirof etishdi. Ayol-qizlarimizning oʻqib, oliy maʼlumotli boʻlishi, kasb-hunar egallashi oila baxti, farzandlar kamoli uchun, shu asosda butun jamiyat ravnaqi uchun xizmat qilishini taʼkidlashdi.

Shuningdek, muhtaram Prezidentimizning Qoraqalpogʻiston Respublikasini har tomonlama rivojlantirish maqsadida ilgari surgan islohotlari, Farmon va Qarorlari mazmun-mohiyati hamda ularning ijrosi yuzasidan amalga oshirilayotgan ishlar xususida ham soʻzlab, ularning bugungi kundagi samarasini tilga olib oʻtishdi.

Maʼnaviy-maʼrifiy tadbirda kontsert dasturlari ham namoyish etilib, samimiy suhbatlarga hamohang tarzda “Ezgulik – shiorimiz, maʼrifat – qurolimiz” degan gʻoyaga alohida urgʻu berildi.

O.Xudoyberganova.