SOGʻLOM HAYoT SOGʻLOM MUHITDA ShAKLLANADI

Yurtimiz mahallalarida ijtimoiy-maʼnaviy muhit barqarorligini taʼminlash, oilalarning oʻzaro ahil-inoq boʻlib yashashiga erishish, yosh avlodni sogʻlom va barkamol qilib voyaga yetkazish, ularga milliy qadriyat va urf-odatlarimizni keng targʻib etish bugungi kunning asosiy vazifalaridandir. Boisi, hududlarda ijtimoiy-maʼnaviy muhit sogʻlom boʻlsa, yoshlarning diniy aqidaparastlik, turli tahdidlar, yot gʻoyalar taʼsiriga tushib qolishining oldi olinadi, sogʻlom muhitda sogʻlom hayot tarzi shakllanadi.

Buningdek xayrli ishga hissa qoʻshish maqsadida Amudaryo tumanida faoliyat yuritayotgan amunews.uz veb-sayti tahririyati Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan grant tanlovida “Sogʻlom muhit – sogʻlom hayot” nomli loyihasi bilan qatnashib, gʻolib boʻlgan edi. Ayni kunlarda mazkur davlat granti loyihasi muvaffaqiyatli amalga oshirilmoqda.

18-aprel kuni mazkur loyiha ish rejasiga muvofiq tumanimizning Doʻrman ovulida bir guruh ijodkorlarning ovul aholisi bilan uchrashuvi oʻtkazildi. Unda ovul fuqarolar yigʻini masʼullari, aholi vakillari, taʼlim xodimlari va faxriylar ishtirok etdilar.

Tadbirni veb-sayt muxbiri, loyiha koordinatori Oygul Rajabova ochdi va olib bordi. U oʻz soʻzida grant loyihasi rejasiga muvofiq amalga oshirilayotgan ishlar, mazkur tadbirni oʻtkazishdan kutilayotgan natijalarga toʻxtaldi.

Inson zoti doimo maʼnaviy ozuqa olishga intiladi. Bunda ommaviy axborot vositalarining, badiiy asarlarning oʻrni alohida. Ha, badiiy asarlar mutolaasi har birimizga betakror taassurotlar hadya etadi, shuurimizni oydinlashtiradi, dunyoqarashimizni kengaytiradi, yashash, tiriklik qadrini yanada chuqurroq anglashga oʻrgatadi.

Ana shunday kitoblar mualliflari bilan yuzma-yuz uchrashuv, ularning ijod namunalarini oʻzlaridan eshitishning esa zavqi oʻzgacha. Bu – grant loyihasi doirasida oʻtkazilgan navbatdagi tadbirda ham yaqqol aks etib turdi. Shu sababli ham butun Amudaryo tumanidagina emas, respublikada tanilgan, qator kitoblar muallifi, oddiy va samimiy tilda yozilgan sheʼrlari bilan oʻz muxlislariga ega boʻlgan ijodkor, asli doʻrmanlik, ayni kunda Mangʻit shahrida yashab, ijod etayotgan Shomurod Xoʻjanovning, iqtidorli ijodkor Zuhra Ahmedovalarning oʻqigan har bir sheʼrini yigʻilganlar berilib tingladilar va qarsaklar bilan olqishlab turdilar.

Sheʼrxonlik tugagach, hududdagi 84-sonli maktab direktori Erkin Qurbonboyev, ovul nuroniylaridan biri, xalq taʼlimi faxriysi Farhod Oʻrozboyevlar soʻzga chiqib, tadbirdan barcha ulkan taassurotlar olganligini taʼkidlab, ovul aholisi bilan uchrashuvga tashrif buyurgan ijodkorlarga cheksiz minnatdorchilik bildirdilar.

“Sogʻlom hayot – sogʻlom muhit” nomli grant loyihasi doirasida oʻtkazilgan ijodkorlar bilan uchrashuv doʻrmanliklarda ulkan taassurotlar qoldirdi, ularni yanada koʻproq kitoblar mutolaa qilishga undadi.

Sevara ISMOILOVA.