Besh yil davomida “Venus academy” oʻquv markazining 70 foiz oʻquvchisi OTM talabalari boʻlishdi

Mustaqillik – xalqimiz hayotinigina emas, balki ongini ham oʻzgartirdi. Avvallari Mangʻitdan narini koʻrmagan amudaryolik yoshlar bugungi kunda sportda, ilmda, qoʻyingki, hayotimizning barcha jabhalarida dunyo yoshlari bilan bellashishga qodir, mustaqil fikrga ega insonlar sifatida voyaga yetishmoqda. Ular orasida ilm-u salohiyatda sobit, tadbirkor yoshlar, taniqli sportchilar, sanʼatkor va ijtimoiy-siyosiy jihatdan faol, maʼnaviy tafakkur dunyosi keng ijodkor yoshlar talaygina. "Venus academy" oʻquv markazi rahbari Zuhra Yerlapasova ana shunday yoshlardan.

Boshlangʻich sinf oʻquvchilarini kichik yoshidan boshlab, intilish va qiziqishlari asosida maʼlum yoʻnalish boʻyicha oʻqitish orqali ularning yashirin imkoniyatlari va iqtidorlarini yuzaga chiqarish maqsadida Zuhra Yerlapasova 2019-yilda xususiy oʻquv markazi faoliyatini yoʻlga qoʻydi. Avval "AmuKids", keyinchalik "Venus academy" nomi bilan faoliyat yuritayotgan oʻquv markazida oʻzbek va rus tillarida mashgʻulotlar olib borishga moʻljallangan mental arifmetika, maktabga umumiy tayyorlov guruhi, ingliz tili, rus tili, rus tili savodxonligi, yaʼni bolalarni taʼlim rus tilida olib boriluvchi maktab­ga tayyorlov guruhi, mashgʻulotlar rus va oʻzbek tillarida olib boriladigan matematika fani yoʻnalishlari hamda Prezident maktablariga tayyorlov kursi tashkil etilib, nutqida nuqsoni bor bolalar uchun logoped xizmatidan foydalanish imkoniyati yaratildi.

Oʻquv markazida tashkil etilgan noanʼanaviy taʼlim-tarbiya uslubi, markazda faoliyat olib boruvchi malakali mutaxassis oʻqituvchilarning izlanuvchanligi tufayli qisqa fursat ichida katta qiziqish va eʼtibor bilan farzandlarini oʻquv markaziga yetaklab keluvchi ota-onalar safi oshdi. Oʻquv markazida taʼlim olayotgan bolajonlar orasida noyob qobiliyatli vunderkind bolalar paydo boʻldi.

Ayni paytda "Venus academy" oʻquv markazida 20 nafar mutaxassis oʻqituvchilar bolajonlarga oʻzlari va ota-onalari tanlagan yoʻnalishlar boʻyicha taʼlim-tarbiya berishmoqda.

Tashkil etilganiga 5-yil boʻlgan mazkur taʼlim dargohida oʻtgan davr mobaynida 4 ming nafardan ortiq iqtidorli oʻquvchilar taʼlim-tarbiya olishdi. Oʻquv markazida taʼlim olgan oʻquvchilarning 70 foizi mamlakatimizdagi nufuzli oliy taʼlim muassasalarida tahsil olishmoqda.Ulardan 3 nafari Vestminster universiteti talabalari boʻlishdi. 2 nafar bitiruvchi esa ayni paytda Germaniya davlatida oʻqishni davom ettirishmoqda.

Oʻquv markazining xotirasi kuchli, vunderkind oʻquvchilari orasida mental arifmetika boʻyicha Qoraqalpogʻiston chempionatlarining gʻoliblari va Oʻzbekiston, shuningdek, mazkur yoʻnalishda Toshkent, Samarqand va Xiva shaharlarida boʻlib oʻtgan musobaqalarning gʻolib va sovrindorlari bor. Qardosh Qirgʻiziston davlatida boʻlib oʻtgan mental arifmetika boʻ­yicha xalqaro musobaqalarda esa oʻquv markazi oʻquvchilari faxrli 2-oʻrinni qoʻlga kiritdilar.

– Qobiliyatsiz bola boʻlmaydi, – deydi oʻquv markazi rahbari Zuhraxon Yerlapasova, – birinchi galda ota-ona oʻz farzandining qiziqishlarini shunchaki bolalik orzusi-da, deb eʼtiborsiz qoldirmasligi, u bilan kattalarday muomalada boʻlishi, qiziqishlarini maʼlum maʼnoda ragʻbatlantirib borishi zarur. Ayniqsa, shirin, katta orzular ogʻushida uchib-qoʻnib yurgan bolaga nojoʻya gap aytib, kamsitish kerak emas. Bunday xatti-harakati bilan ota-ona bolasining orzu-umidini, eng yomoni, koʻnglini sindiradi. Koʻngli singan bolaning nutqida nuqsonlar paydo boʻladi. Ota-onasiga biron fikr aytishdan hadiksirab qoladi. Logoped yoʻnalishiga qabul qilingan, nutqida nuqsoni bor bolalarning aksariyati ana shunday notoʻgʻri muomala va oiladagi nosogʻlom muhit – urush- janjallar taʼsiridagi stresslar tufayli qoʻrquv iskanjasidagi bolalardir. Bunday bolalar bilan taj­ribali logoped-oʻqituvchilar tizimli ravishda mashgʻulotlar olib borish orqali samarali natijalarga erishishmoqda.

Aql bovar qilmas katta-katta sonlarni bir zumda, yoddan hisob­lab berayotgan, ingliz tilida va rus tili boʻyicha maktabga tayyorlov guruhlarida tutilmasdan, oʻqituvchisiga burro-burro javob berayotgan, logoped-oʻqituvchisi koʻmagida nutqidagi nuqsonlardan xalos boʻlib, quvonayotgan va matematika guruhi oʻquvchilarining eng murakkab misol, masalalarni aniq, puxta yechishning uddasidan chiqayotganidan ota-onalar mamnun.

Farzandini yetaklab, "Zuhraxonning maktabi shumi?" deb kelayotganlarni koʻrib, taʼlim -tarbiya sohasidagi tadbirkorlikning bu kabi muvaffaqiyatidan biz ham quvondik. Oʻquv markazi pedagogika jamoasiga amudaryolik bilimdon yoshlarni tarbiyalash yoʻlidagi ezgu ishlarida yutuqlar tiladik.

Robiya Yoʻldosheva.