АМУДАРЁ ТУМАНИДА “INFOLIB ЎЗБЕКИСТОН – 2024” XIII МИЛЛИЙ АХБОРОТ-КУТУБХОНА ҲАФТАЛИГИ ДОИРАСИДА ОНА ТИЛИ БАЙРАМИ ТАДБИРЛАРИ ЎТКАЗИЛМОҚДА
Мамлакатимизда ёшлар китобхонлигини ривожлантириш, китобхон ёшларнинг интилиш ва қобилиятларини маънавий қўллаб-қувватлаш ва рағбатлантириш мақсадида ҳар йили анъанавий тарзда “Infolib Ўзбекистон” миллий ахборот-кутубхона ҳафталиги ўтказилиб келинмоқда. Ҳафталик доирасидаги адабий-мусиқий тадбирлар, таниқли ёзувчи ва шоирлар билан учрашувлар, шеърият кечалари ва мушоираларда нафақат китобхон ёшлар, балки минглаб адабиёт ихлосмандлари иштирок этишмоқда.
Жорий йилнинг 21 октябрь санасидан “Infolib Ўзбекистон – 2024” XIII Миллий Ахборот-кутубхона ҳафталиги ҳам Республикамиз бўйлаб барча кутубхоналарда кўтаринки руҳда бошланди. Бутун Ўзбекистон бўйлаб 21-25 октябрь кунлари бўлиб ўтадиган мазкур маънавий-маърифий тадбир доирасидаги адабий-мусиқий кечалар ва давра суҳбатлари ўзбек тилига давлат тили мақоми берилганининг 35 йиллигига бағишланган она тили байрами тантаналари билан бошланди.
Амударё туман Ахборот-кутубхона марказида ҳафталикнинг очилиш маросимига бағишлаб ўтказилган тадбир ҳам амударёлик китобсеварлар қалбида маънавият ва маърифатга, миллий қадриятларимизга чексиз ҳурмат-эҳтиром уйғотгани билан муҳим аҳамият касб этди.
Ҳафталик доирасида кутубхонада ўзбек тилига давлат тили мақоми берилганининг 35 йиллиги муносабати билан ташкил қилинган “Тил – фахримиз” номли китоблар кўргазмаси орқали тадбир иштирокчилари ҳозирги замон ўзбек ва жаҳон адабиёти ҳамда мумтоз абабиётимизнинг ноёб дурдоналари билан яқиндан танишдилар.
Тадбир давомида “Она тилим – сарчашмангдан сархуш дилим” деб номланган адабий кеча ҳам ташкил қилинди. Унда Ахборот-кутубхона марказининг фаол китобхонлари, Амударё туман ихтисослаштирилган мактаби ҳамда 3-сонли умумтаълим мактаби ўқувчиларидан иборат “Билимлилар” ва “Зукколар” жамоалари орасида билимдонлар беллашуви ўтказилди.
Билимдонлар беллашувида китобхон ўқувчи-ёшлар ўзлари ўқиган китоблардан олган таассуротлари билан ўртоқлашдилар ҳамда бир-бирларига мумтоз ва ҳозирги замон ўзбек адабиёти намояндаларининг асарлари юзасидан саволлар беришиб, ўз билимларини, қобилиятларини синовдан ўтказдилар.
Ҳафталик давомида китобхонликни тарғиб қилиш, бадиий адабиётнинг инсоннинг шахс сифатида шаклланишидаги бебаҳо аҳамиятини ёшларга тўлақонли етказиш мақсадида фахрий кутубхоначи Одинахон ая Мусаева билан китобхонлар учрашуви ҳам ўтказилди.
Қизиқарли савол-жавобларга бой тарзда ўтган учрашувда Одинахон ая Мусаева китоб туфайли ўз ҳаёти давомида эришган муваффақиятлари, оилавий бахти, шу билан бирга, инсон камолоти ва жамият тараққиётида адабиётнинг, хусусан, китобхонликнинг тенгсиз аҳамияти ҳақида сўз юритди. Шунингдек, она тилимизнинг софлигини сақлашда, уни янада жарангдор ва сержило тил сифатида шакллантириш, янада бойитишда бадиий адабиётимизнинг жонкуяр намояндалари қаторида ҳар бир инсон масъул эканлигини таъкидлади. Фахрий кутубхоначи Одинахон ая Мусаева билан китобхон ёшлар ўртасидаги қизиқарли савол-жавоблар иштирокчилар учун таассуротларга бой бўлди.
Кеча сўнггида тадбир иштирокчиларига Амударё туман Ахборот-кутубхона Маркази маъмурияти томонидан эсдалик совғалари топширилди.
Роҳатой Рамонова, Амударё туман Ахборот-кутубхона маркази ахборот-библиография хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
