AMUDARYo TUMANIDA “INFOLIB OʻZBEKISTON – 2024” XIII MILLIY AXBOROT-KUTUBXONA HAFTALIGI DOIRASIDA ONA TILI BAYRAMI TADBIRLARI OʻTKAZILMOQDA

Mamlakatimizda yoshlar kitobxonligini rivojlantirish, kitobxon yoshlarning intilish va qobiliyatlarini maʼnaviy qoʻllab-quvvatlash va ragʻbatlantirish maqsadida har yili anʼanaviy tarzda “Infolib Oʻzbekiston” milliy axborot-kutubxona haftaligi oʻtkazilib kelinmoqda. Haftalik doirasidagi adabiy-musiqiy tadbirlar, taniqli yozuvchi va shoirlar bilan uchrashuvlar, sheʼriyat kechalari va mushoiralarda nafaqat kitobxon yoshlar, balki minglab adabiyot ixlosmandlari ishtirok etishmoqda.

Joriy yilning 21-oktyabr sanasidan “Infolib Oʻzbekiston – 2024” XIII Milliy Axborot-kutubxona haftaligi ham Respublikamiz boʻylab barcha kutubxonalarda koʻtarinki ruhda boshlandi. Butun Oʻzbekiston boʻylab 21-25-oktyabr kunlari boʻlib oʻtadigan mazkur maʼnaviy-maʼrifiy tadbir doirasidagi adabiy-musiqiy kechalar va davra suhbatlari oʻzbek tiliga davlat tili maqomi berilganining 35 yilligiga bagʻishlangan ona tili bayrami tantanalari bilan boshlandi.

Amudaryo tuman Axborot-kutubxona markazida haftalikning ochilish marosimiga bagʻishlab oʻtkazilgan tadbir ham amudaryolik kitobsevarlar qalbida maʼnaviyat va maʼrifatga, milliy qadriyatlarimizga cheksiz hurmat-ehtirom uygʻotgani bilan muhim ahamiyat kasb etdi.

Haftalik doirasida kutubxonada oʻzbek tiliga davlat tili maqomi berilganining 35 yilligi munosabati bilan tashkil qilingan “Til – faxrimiz” nomli kitoblar koʻrgazmasi orqali tadbir ishtirokchilari hozirgi zamon oʻzbek va jahon adabiyoti hamda mumtoz ababiyotimizning noyob durdonalari bilan yaqindan tanishdilar.

Tadbir davomida “Ona tilim – sarchashmangdan sarxush dilim” deb nomlangan adabiy kecha ham tashkil qilindi. Unda Axborot-kutubxona markazining faol kitobxonlari, Amudaryo tuman ixtisoslashtirilgan maktabi hamda 3-sonli umumtaʼlim maktabi oʻquvchilaridan iborat “Bilimlilar” va “Zukkolar” jamoalari orasida bilimdonlar bellashuvi oʻtkazildi.

Bilimdonlar bellashuvida kitobxon oʻquvchi-yoshlar oʻzlari oʻqigan kitoblardan olgan taassurotlari bilan oʻrtoqlashdilar hamda bir-birlariga mumtoz va hozirgi zamon oʻzbek adabiyoti namoyandalarining asarlari yuzasidan savollar berishib, oʻz bilimlarini, qobiliyatlarini sinovdan oʻtkazdilar.      

Haftalik davomida kitobxonlikni targʻib qilish, badiiy adabiyotning insonning shaxs sifatida shakllanishidagi bebaho ahamiyatini yoshlarga toʻlaqonli yetkazish maqsadida faxriy kutubxonachi Odinaxon aya Musayeva bilan kitobxonlar uchrashuvi ham oʻtkazildi.

Qiziqarli savol-javoblarga boy tarzda oʻtgan uchrashuvda Odinaxon aya Musayeva kitob tufayli oʻz hayoti davomida erishgan muvaffaqiyatlari, oilaviy baxti, shu bilan birga, inson kamoloti va jamiyat taraqqiyotida adabiyotning, xususan, kitobxonlikning tengsiz ahamiyati haqida soʻz yuritdi. Shuningdek, ona tilimizning sofligini saqlashda, uni yanada jarangdor va serjilo til sifatida shakllantirish, yanada boyitishda badiiy adabiyotimizning jonkuyar namoyandalari qatorida har bir inson masʼul ekanligini taʼkidladi. Faxriy kutubxonachi Odinaxon aya Musayeva bilan kitobxon yoshlar oʻrtasidagi qiziqarli savol-javoblar ishtirokchilar uchun taassurotlarga boy boʻldi.

Kecha soʻnggida tadbir ishtirokchilariga Amudaryo tuman Axborot-kutubxona Markazi maʼmuriyati tomonidan esdalik sovgʻalari topshirildi.

Rohatoy Ramonova, Amudaryo tuman Axborot-kutubxona markazi axborot-bibliografiya xizmati rahbari.